បាងកក ៖ ក្រុមមន្ត្រី បាននិយាយថា វីរុសមិនស្គាល់អត្តសញ្ញាណថ្មីមួយកំពុងបង្កការផ្ទុះឡើង នៃជំងឺរលាកសួតធ្ងន់ធ្ងរនៅប្រទេសចិន ជាហេតុនាំអោយអាជ្ញាធរថៃ និងសឹង្ហបុរី កំពុងបង្កើនការត្រួតពិនិត្យតឹងរឹងជាងមុនខចំពោះភ្ញៀវទេសចរចិន ដែលមកពីទីក្រុង វូហាន បន្ទាប់ពីមានការឆ្លងជំងឺរលាកសួតយ៉ាងចម្លែក ប្រហាក់ប្រហែលនឹងរោគ SARS ដែរ ។
ប្រទេសថៃជាប្រទេសទី៣ហើយ បន្ទាប់ពីប្រទេសសឹង្ហបុរី និងហុងកុង បានសម្រេចដាក់ក្រុមត្រួតពិនិត្យសុខភាពសម្រាប់អ្នកដំណើរមកពីទីក្រុង វូហាន ប្រទេសចិន ។
អង្គការសុខភាពពិភពលោក (WHO) បាននិយាយកាលពីថ្ងៃពុធទី៨ មករា ២០២០នេះថា ជំងឺរលាកសួតជាង៥០ករណី នៅទីក្រុងវូហាន ក្នុងប្រទេសចិន អាចបណ្តាលមកពីក្រុមវីរុសជំងឺផ្លូវដង្ហើមប្រភេទថ្មី វាមិនមែនជាជំងឺ SARS ដែលធ្លាប់កើតនៅចិន និងរោគសញ្ញាផ្លូវដង្ហើមជំងឺ MERS នៅមជ្ឈិមបូព៌ានោះទេ ។
យោងទៅតាមមន្ត្រីសុខាភិបាលក្នុងទីក្រុងវូហាន បានអោយដឹងថា ជំងឺដែលមិនស្គាល់អត្តសញ្ញាណ ដែលបានធ្វើអោយមនុស្សរាប់សិបនាក់ នៅក្នុងទីក្រុងវូហាន Wuhan ប្រទេសចិន ធ្លាក់ខ្លួនឈឺភ្លាមៗ ។
ក្រុមមន្ត្រី ក៏បានបញ្ជាក់ផងដែរថា ជំងឺអាថ៌កំបាំងនេះ មិនមែនជារោគសញ្ញាផ្លូវដង្ហើម ជំងឺ(MERS) នៅមជ្ឈឹមបូព៌ា និងជំងឺ SARS ផ្តាសាយបក្សី ឬជំងឺ adenovirus ទេ ។
គិតត្រឹមថ្ងៃអាទិត្យ ទី៥ ខែមករា មនាមនុស្ស៥៩នាក់ នៅទីក្រុងវូហាន ត្រូវបានគេធ្វើរោគវិនិច្ឆ័យ ឃើញថាមានផ្ទុកវីរុសមិនស្គាល់អត្តសញ្ញាណនេះ ដោយមានអាការៈក្តៅខ្លួន ឈឺខ្លួន ពិបាកដកដង្ហើម និងរងរបួសសួត។
បើតាមរបាយការណ៍កាលពីសប្តាហ៍មុន ចំនួនអ្នកឆ្លង មាន៤៤ករណី ។ លើសពីនេះទៀត មនុស្សចំនួន ២១នាក់ ដែលបានមកលេងទីក្រុងវូហាន នាពេលថ្មីៗនេះ ត្រូវបានបញ្ជូនទៅកាន់មន្ទីរពេទ្យ ទីក្រុងហុងកុង ។
នាយកដ្ឋានសុខាភិបាល និងអាជ្ញាធរទីក្រុងវូហាននេះ បាននិងកំពុងបង្កើនកិច្ចខិតខំប្រឹងប្រែង ដើម្បីស្វែងរកអ្នកដំណើរដែលមានគ្រុនក្តៅ ដែលធ្វើដំណើរឆ្លងកាត់អាកាសយានដ្ឋានអន្តរជាតិ និងតាមប្រព័ន្ធផ្លូវដែកល្បឿនលឿនរបស់ខ្លួន ។
ចំណែកអាជ្ញាធរសុខាភិបាលក្នុងប្រទេសសិង្ហបុរីវិញ ក៏កំពុងប្រុងប្រយ័ត្ន ចំពោះអ្នកដំណើរ ដែលឆ្លងមេរោគ ព្រោះថាថ្មីៗនេះ បើយោងតាមក្រសួងសុខាភិបាលសិង្ហបុរី បានអោយដឹងថា ក្មេងស្រីវ័យក្មេងម្នាក់ មានអាការក្តៅខ្លួនខ្លាំង បន្ទាប់ពីនាងធ្វើដំណើរទៅទីក្រុងវូហាន ក្រោយមកនាងត្រូវបានគេធ្វើរោគវិនិច្ឆ័យថា មានមេរោគមួយប្រភេទ ប៉ុន្តែមិនស្គាល់អត្តសញ្ញាណនៃវិរុសនេះ ៕