ខេត្តបាត់ដំបង៖ កសិករដាំស្ពៃជើងទាម្នាក់ឈ្មោះអ៊ឹម សុភ័ក្រ នៅភូមិតាគ្រក់ ឃុំត្រែង ស្រុករតនមណ្ឌល ខេត្តបាត់ដំបង បានសំដែងនូវភាពអស់សង្ឃឹមដែលចំការដំណាំស្ពៃជើងទារបស់ខ្លួនដល់ពេលដែលត្រូវប្រមូលផលហើយ តែបែរជាពុំសូវមានទីផ្សារលក់ចេញទៅវិញ តែបើមានក៏ឈ្មួញឲ្យតម្លៃទាបដែល ដូច្នេះហើយលោកបានប្រកាសចែកស្ពៃជើងទាជាង១០តោន ឲ្យពលរដ្ឋដែលមានបំណងចង់បាន ដោយឥតគិតថ្លៃ ចាប់ថ្ងៃទី២៥ ដល់២៧ ធ្នូ ឆ្នាំ២០១៩។
កសិករវ័យ៤០ឆ្នាំរូបនេះ បានដាំស្ពៃជើងទាលើផ្ទៃដី២ហិកតា ដែលទទួលបានផលប្រមាណជិត៥០តោន ។ លោកបានកាត់ស្ពៃជើងទាលក់អស់មួយចំនួនធំ ក្នុងតម្លៃ៤០០ទៅ៥០០រៀល នៅអំឡុងថ្ងៃទី១០ដល់ថ្ងៃទី២០ ធ្នូ នេះ។ លុះដល់ថ្ងៃ២៥ ធ្នូនេះ លោក សុភ័ក្រ បានសម្រេចចិត្តចែកស្ពៃដែលនៅសល់ជាង១០តោន ឲ្យពលរដ្ឋមកកាត់យកដោយខ្លួនឯង។ ហើយបើគ្មានអ្នកយកស្ពៃទាំងនេះទេ លោក សុភ័ក្រ នឹងភ្ជួរ(ឈូសឆាយ)ស្ពៃចោល ក្រោយថ្ងៃទី២៧ ធ្នូ ព្រោះវាដល់អាយុកាល ដូច្នេះបើមិនភ្ជួរចោល វាក៏រលួយដែរ។
យ៉ាងណាមិញយោងតាមគណនីហ្វេសប៊ុកផ្ទាល់របស់លោកអ៊ឹម សុភ័ក្ដ្រ បានបង្ហោះរូបភាពចំការស្ពៃក្នុងទឹកមុខសោកសៅបំផុត ដោយភ្ជាប់ជាមួយពាក្យពេជន៏មួយចំនួនថា«ខ្ញុំមិនចង់លក់ស្ពៃទាំងនេះទេ ដោយសារតម្លៃទាបពេកត្រឹម៣០០រៀល ហើយអ្នកទិញ ទិញចំនួនតិចៗ (ទិញយកទៅបរិភោគ ឬលក់ខ្លះ) មិនមែនម៉ៅទិញទាំងអស់ផង។ អ៊ីចឹង ខ្ញុំសម្រេចចិត្តឲ្យពលរដ្ឋនៅក្នុងស្រុកដែលចង់បានមកកាត់យក»។
សូមបញ្ជាក់ថា កាលពីពេលថ្មីៗនេះ កសិកររូបនេះ បានអំពាវនាវឲ្យស្ថាប័នពាក់ព័ន្ធ ជួយដោះស្រាយនិងរកទីផ្សារសម្រាប់គាត់ ខណៈស្ពៃជាច្រើនតោនកំពុងប្រឈមមុខនឹងការខូចខាត ដោយសារគ្មានអ្នកបញ្ជាទិញ។ ក្រោយការអំពាវនាវនេះ មន្ទីរកសិកម្មខេត្តបាត់ដំបង និងប្រធានកសិកម្មស្រុករតនមណ្ឌល បានចុះទៅពិនិត្យ ស្ពៃដែលបានដាំដុះលើដីខ្ញុំ ហើយថាមន្ទីរក៏មិនដឹងធ្វើយ៉ាងដែរ ព្រោះស្ពៃដល់ពេលកាត់ហើយ។ មន្ទីរថា នឹងជួយរកទីផ្សារឲ្យហើយពេលហ្នឹង ខ្ញុំក៏សុំឲ្យមន្ទីរជួយបង្រៀនពីបច្ចេកទេសនៃដាំបន្លែនិងប្រើប្រាស់ថ្នាំផងដែរ» ៕
ដោយសហការី “KBN”
ប្រភព៖ អុឹម សុភ័ក្រ