ខេត្តព្រះសីហនុ ៖ នៅព្រឹកថ្ងៃព្រហស្បតិ៍ ទី១២ ខែធ្នូ ឆ្នាំ២០១៩ រដ្ឋបាលខេត្តព្រះសីហនុ បានរៀបចំហោមពិធី និងបញ្ចុះថ្មព្រះភូមិ ក្នុងមង្គលស្តេចរាជសីហ៍ ប្រចាំក្រុងព្រះសីហនុ នៅរង្វង់មូលតោពីរ មានទីតាំងស្ថិតនៅសង្កាត់លេខ៤ ក្រុងព្រះសីហនុ ខេត្តព្រះសីហនុ ។
ពីធីនេះធ្វើឡើងក្រោមអធិបតីភាពឯកឧត្តម ជាម ហ៊ីម ប្រធានក្រុមប្រឹក្សាខេត្ត ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ និងលោកជំទាវ ព្រមទាំងមានការចូលរួមពី មន្ត្រីរាជការ កងកម្លាំងប្រដាប់អាវុធ អាជីវករ ពាណិជ្ជករ និងប្រជាពលរដ្ឋយ៉ាងច្រើនកុះករ ក្នុងពិធីនេះ ក៏មានរៀបចំរាប់បាត្រប្រគេន ព្រះសង្ឃចំនួន៩៩ អង្គផងដែរ ។
បើតាមហ្វេសប៊ុកផេកផ្លូវការរបស់ឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ បានអោយដឹងថា «ហោមពិធី និងបញ្ចុះថ្មព្រះភូមិ ក្នុងមង្គលស្តេចរាជសីហ៍ ប្រចាំក្រុងព្រះសីហនុ ដើម្បីសុំសេចក្តីសុខសប្បាយនៅក្នុងទឹកដីខេត្តព្រះសីហនុទាំងមូល កុំអោយមានគ្រោះភ័យឧបទ្រពចង្រៃ និងសុំអោយមានសិរីសួស្តី នាំវិនិយោគចូលមកអភិវឌ្ឍ លើទឹកខេត្តព្រះសីហនុអោយបានច្រើន» ។
KBN សូមលើកយករឿងជំនឿអរូបីយ៍ ពាក់ព័ន្ធនឹងរូបសំណាកតោពីរនៅរង្វង់មូលក្នុងក្រុងព្រះសីហនុនេះ អោយបានជ្រាបថា ៖ កាលពីថ្ងៃទី៥ ខែកក្កដា ឆ្នាំ២០១៩ លោក ពុយ គា ដែលបច្ចុប្បន្នជាអ្នកឆ្លើយឆ្លងឲ្យទីភ្នាក់ងារសារព័ត៌មានក្យូដូរបស់ប្រទេសជប៉ុន បានសរសេរនៅលើបណ្តាញសង្គមហ្វេសប៊ុករបសលោក អោយដឹងថា «កន្លងមក មានរឿងដំណាល ជាច្រើន ស្តីពីចៅហ្វាយខេត្តព្រះសីហនុ ដែលខ្លាចតោស៊ី ឱ្យធ្លាក់ពីដំណែង ។ នៅពេលមួយនោះ មានចៅហ្វាយខេត្តមួយរូប ដាច់ចិត្តអញ្ជើញគ្រូទាយ មកពីហុងកុង ដើម្បីរកវិធីទប់ដំណែងគាត់ ។ គ្រូហុងស៊ុយនោះ បានឱ្យឳវាទថា ត្រូវតែដាក់គ្រាប់ឃ្លីចូលក្នុងមាត់តោ ដើម្បីកុំឱ្យខាំបាន (កាលដើមឡើយរូបសំណាកតោ ហាមាត់ពុំមានគ្រាប់ឃ្លី នៅខាងក្នុងឡើយ) » ។
លោក ពុយ គា ដែលជាអ្នកកាសែតអាជីពជាង២០ឆ្នាំ បានបន្តអោយដឹងថា «រាប់ទសវត្សរ៍មកហើយ ពុំមាននរណាម្នាក់ ហ៊ានសង់សំណង់ ឬបើកហាងលក់ដូរនៅលើដីច្រមុះជ្រូក ដ៏ធំមួយ នៅទល់មុខតោពីរ កណ្តាលក្រុងព្រះសីហនុឡើយ ព្រោះអ្នករស៊ីមានជំនឿថា ជំនួញរបស់គេ អាចនឹងត្រូវស្រុតចុះ ឬខាតឡុងចុង ព្រោះរូបសំណាកតោពីរ សំឡឹងចំពីមុខ នឹងធ្វើឱ្យហុងស៊ុយធ្លាក់ ប៉ុន្តែដោយសារដី នៅក្រុងព្រះសីហនុឡើងថ្លៃហួសពីការស្មាន (ជំនាន់ឯកឧត្តម យន្ត មីន អតីតអភិបាលខេត្តព្រះសីហនុ) និងពិបាករកកន្លែងល្អៗបានតទៅទៀត ក្រុមហ៊ុនចិន ក៏ជំនះកសាងអគារដ៏ធំមួយ តែរកមធ្យោបាយការពារ ដោយសង់រូបសំណាកដំរីចំនួន៥ ដើម្បីទប់ទល់មហិទ្ធិរិទ្ធ ដ៏ខ្លាំងខ្លារបស់តោទាំងពីរ ។ យោងតាមឯកសារសត្វ « យកដំរីទប់ជាមួយតោ» សត្វដំរីអាចសម្លាប់តោបាន ហើយដំរីមួយ អាចទប់ទល់ជាមួយតោញីចំនួន៧ ឬតោឈ្មោលពីរ ទើបអាចសំលាប់សត្វដំរីមួយបាន» ។
រហូតដល់ពីថ្ងៃទី២២ ខែសីហា ឆ្នាំ២០១៩ នៅលើហ្វេសប៊ុកលោក ពុយ គា ដដែលបានសរសេរអោយដឹងថា «ដំរីរបួសបាក់ប្រម៉ោយ ក្រោយប៉ះតោមួយប្រាវ មិនទាន់បានពីរខែស្រួលបួលផង ដំរី៥ក្បាល ប៉ះតោពីរ ទីបំផុត មេដំរីក៏រងគ្រោះ បាក់ប្រម៉ោយគួរឱ្យអាណិត ។ អ្នកជឿលើអបិយជំនឿ និយាយថា អាចជាការប្រយុទ្ធគ្នាក្នុងផ្លូវងងឹត រវាងស្តេចសត្វទាំងពីរ ។
យ៉ាងណាក៏ដោយនេះគ្រាន់តែជាការអង្កេតមួយរបស់លោក ពុយ គា តែប៉ុណ្ណោះ រីឯជំនឿ ជារឿងរបស់បុគ្គល ព្រោះអ្នកមានគេមិនជឿលើជំនឿអរូបីយ៍ណាដែលគ្មានហេតុផលច្បាស់លាស់នោះទេ ។ រីឯ រូបសំណាកដំរីបាក់ប្រម៉ោយ តែបែបវិទ្យាសាស្ត្រវិញ វាជាការធ្វេសប្រហេសរបស់អ្នកសាងសង់តែប៉ុណ្ណោះ ៕
