រាជធានីភ្នំពេញ ៖ នៅថ្ងៃទី១០ ខែធ្នូ ឆ្នាំ២០១៩នេះ អ្នកនាំពាក្យការបរទេស និងអ្នកនាំពាក្យរដ្ឋាភិបាលកម្ពុជា បានប្រតិកម្មព្រមគ្នា ទៅនឹងសហរដ្ឋអាមេរិកតាមរយៈក្រសួងរតនាគាររបស់ខ្លួន បានសម្រេចដាក់ទណ្ឌកម្មហិរញ្ញវត្ថុ និងរឹតត្បិតទិដ្ឋាការលោក ទ្រី ភាព និងអតីតអគ្គមេបញ្ជាការរង នៃកងយោធពលខេមរភូមិន្ទ លោក គន់ គីម ព្រមទាំងសមាជិកគ្រួសារលោក៣រូប និងក្រុមហ៊ុនចំនួន១៦ទៀត ។
អ្នកនាំពាក្យក្រសួងការបរទេសកម្ពុជា សម្តែងការខកចិត្ត ចំពោះអាមេរិក ដែលបានដាក់ទណ្ឌកម្មលើឧកញ៉ាទ្រី ភាព និងលោក គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស និង ជាអនុប្រធានទីមួយនៃគណៈកម្មាធិការជាតិគ្រប់គ្រងគ្រោះមហន្តរាយ ដោយចោទប្រកាន់លោកទាំងពីរ ថាប្រព្រឹត្តអំពើពុករលួយ ។
តាមរយៈសេចក្តីថ្លែងការណ៍ របស់អ្នកនាំពាក្យការបរទេស តបនឹងអាមេរិកដូច្នេះថា ទង្វើនេះ ធ្វើឲ្យមានការស្រងាកចិត្តយ៉ាងខ្លាំង នៅពេលបុគ្គលសាធារណៈរបស់ប្រទេសមួយ ត្រូវបានក្លាយទៅជាកម្មវត្ថុនៃវិធានការទណ្ឌកម្មរបស់ប្រទេសដទៃទៀត ដោយផ្អែកលើការចោទប្រកាន់គ្មានមូលដ្ឋាន និងគ្មានការគោរពទាល់តែសោះ ចំពោះឯករាជ្យនៃច្បាប់និងយុត្តិធម៌របស់ប្រទេសមួយ ។ ទង្វើរបស់អាមេរិក គឺជាការបំពានយ៉ាងធ្ងន់ធ្ងរ លើគោលការណ៍ស្តីពីស្មើភាពនៃអធិបតេយ្យ និងការមិនជ្រៀតជ្រែកកិច្ចការផ្ទៃក្នុងរបស់ប្រទេសដទៃ ដូចមានចែងក្នុងធម្មនុញ្ញអង្គការសហប្រជាជាតិ និងច្បាប់អន្តរជាតិផ្សេងទៀត។
លើសពីនេះ អ្នកនាំពាក្យការបរទេស បានហៅការដាក់ទណ្ឌកម្មនេះ ថាជាការវាយប្រហារប្រឆាំងនឹងកិច្ចប្រឹងប្រែងក្នុងការស្តារទំនុកចិត្តរវាងកម្ពុជានិងអាមេរិក តាមរយៈសាររបស់សម្តេចនាយករដ្ឋមន្ត្រី ហ៊ុន សែន និង លោកប្រធានាធិបតី ដូណាល់ ត្រាំ ដែលបានផ្ញើឲ្យគ្នាទៅវិញទៅមកនាពេលថ្មីៗនេះ។
ប្រតិកម្មនឹងអាមេរិកដូច្នេះរួចហើយ អ្នកនាំពាក្យការបរទេស ក៏សរសើរថា លោក គន់ គីម ត្រូវបានទទួលស្គាល់ជាសាធារណៈ ចំពោះការរួមចំណែកយ៉ាងច្រើន ក្នុងការថែរក្សាសុខសន្តិភាព ស្ថិរភាព និងសណ្តាប់ធ្នាប់សង្គម ហើយលោក ទ្រី ភាព បានដើរតួនាទីដ៏សកម្មក្នុងការជួយអភិវឌ្ឍសេដ្ឋកិច្ចកម្ពុជា ។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា ក៏មិននៅស្ងៀមដែរ លោកបានសរសេរលើគណនីហ្វេសប៊ុកបែបនេះថា «ជាការភ្ញាក់ផ្អើលមួយ នៅពេល ដែលខ្ញុំទទួលបានព័ត៌មានផ្សព្វផ្សាយជាសាធារណៈពីការចោទប្រកាន់ និងការដាក់ទណ្ឌកម្ម ក្នុងលក្ខណៈឯកតោភាគីពីស្ថាប័នហិរញ្ញវត្ថុរបស់អាមេរិកមកលើប្រជាពលរដ្ឋខ្មែរ» ។
ប៉ុន្តែ លោក ផៃ ស៊ីផាន យល់ថា ទំនាក់ទំនងនិងកិច្ចសហប្រតិបត្តិការរវាងកម្ពុជានិងអាមរិក មិនមានអ្វីប៉ះពាល់ឡើយ ពោលគឺ ប្រទេសទាំងពីរ នៅតែបន្តគោរពគ្នាទៅវិញទៅមក ។
ការប្រតិកម្មទៅនឹងអាមេរិកបែបនេះ បន្ទាប់ពីក្រសួងសេដ្ឋកិច្ចនិងហិរញ្ញវត្ថុអាមេរិកនៅថ្ងៃទី០៩ ខែធ្នូ ចំថ្ងៃទិវាប្រយុទ្ធប្រឆាំងអំពើពុករលួយអន្តរជាតិបានប្រកាសដាក់ទណ្ឌកម្ម បង្កកទ្រព្យសម្បត្តិលើលោកឧកញ៉ា ទ្រី ភាព អគ្គនាយកក្រុមហ៊ុនទ្រី ភាពគ្រុប និងលោកគន់ គីម អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយ។ ការដាក់ទណ្ឌកម្មនេះ គឺអាមេរិកបានចោទប្រកាន់ពួកគេថាបានប្រព្រឹត្តអំពើពុករលួយ។ ក្រៅពីកម្ពុជា អាមេរិកក៏បានដាក់ទណ្ឌកម្មដូចគ្នានេះទៅលើមន្ត្រីនៃប្រទេសឡេតូនី និង វេណេស៊ុយអេឡាផងដែរ។
ក្រសួងសេដ្ឋកិច្ច និង ហិរញ្ញវត្ថុអាមេរិកបានសម្រេចដាក់ទណ្ឌកម្មបង្កកទ្រព្យសម្បត្តិលោកឧកញ៉ាទ្រី ភាព និង លោកនាយឧត្តមសេនីយ៍ គន់ គីម នៅក្នុងសហរដ្ឋអាមេរិកឬនៅក្នុងកម្មសិទ្ធិដែលគ្រប់គ្រងដោយជនជាតិអាមេរិក ។ មិនតែប៉ុណ្ណោះ ក៏បានហាមឃាត់មិនឱ្យជនជាតិអាមេរិកទៅពាក់ព័ន្ធជាមួយថែមទៀត។ ក្រសួងសេដ្ឋកិច្ចអាមេរិក បានចោទប្រកាន់លោកទ្រី ភាព និង លោកគន់ គីម ដូចគ្នាថា បានជាប់ពាក់ព័ន្ធដោយផ្ទាល់ និងដោយប្រយោលក្នុងអំពើពុករលួយជាច្រើនករណីដូចជា ការគ្រប់គ្រងទ្រព្យសម្បត្តិរបស់រដ្ឋដោយមិនត្រឹមត្រូវ ការរឹបអូសទ្រព្យសម្បត្តិឯកជនដើម្បីផលប្រយោជន៍ផ្ទាល់ខ្លួន អំពើពុករលួយទាក់ទងនឹងកិច្ចសន្យារបស់រដ្ឋាភិបាលកម្ពុជា ឬ ការទាញយកធនធានធម្មជាតិ ឬ ស៊ីសំណូក ។
សម្រាប់លោកទ្រី ភាព ក្រសួងសេដ្ឋកិច្ចអាមេរិកបានអះអាងថា បានប្រើប្រាស់នូវបណ្តាញដ៏ធំនៅកម្ពុជា ដើម្បីបង្កើតការសម្របសម្រួលការកាប់ឈើដោយខុសច្បាប់ដោយឃុបឃិតនឹងមន្ត្រីរដ្ឋាភិបាល ទិញការការពារពីរដ្ឋាភិបាល និង ទិញការការពារពីយោធា ដើម្បីបម្រើការធ្វើចរាចរផលិតផលឈើខុសច្បាប់របស់ខ្លួនទៅកាន់ប្រទេសវៀតណាម ចិន រុស្ស៊ី និងអឺរ៉ុប។ ចំណែក លោកគន់ គីមវិញ ក្រសួងសេដ្ឋកិច្ចអាមេរិកអះអាងថា ជាមនុស្សសំខាន់ម្នាក់នៅក្នុងគម្រោងអភិវឌ្ឍក្នុងខេត្តកោះកុង ហើយទទួលបានផលប្រយោជន៍យ៉ាងច្រើនពីក្រុមហ៊ុនចិន។ បើតាមអាមេរិក លោកគន់ គីម បានប្រើប្រាស់កងកម្លាំងយោធា ដើម្បីបំភិតបំភ័យ រុះរើ និងឈូសឆាយដីយកទៅប្រគល់ឱ្យក្រុមហ៊ុនចិន។
បន្ថែមពីលើបុគ្គលអ្នកទាំងពីរ សមាជិកគ្រួសារលោកគន់ គីម ៣នាក់ ព្រមទាំងក្រុមហ៊ុនអ្នកទាំង២សរុប១៦ក្រុមហ៊ុនទៀតក៏ស្ថិតនៅក្នុងបញ្ចីទណ្ឌកម្មរបស់អាមេរិកផងដែរ។ គួរបញ្ជាក់ថា នេះ គឺជាបន្ថែមការដាក់ទណ្ឌកម្មរបស់អាមេរិកមកមន្ត្រីរដ្ឋាភិបាលកម្ពុជា។ កាលពីខែមិថុនា ឆ្នាំ២០១៨ អាមេរិកក៏បានដាក់ទណ្ឌកម្មដូចគ្នានេះមកលើលោកហ៊ីង ប៊ុនហៀង ដែលជាមេបញ្ជាការបញ្ជាការដ្ឋានអង្គរក្សរបស់លោកនាយករដ្ឋមន្ត្រីកម្ពុជាហ៊ុន សែនផងដែរ ដោយចោទថា រំលោភសិទ្ធិមនុស្សធ្ងន់ធ្ងរ ៕