ខេត្តបាត់ដំបង ៖ កាលពីថ្ងៃទី៥ ធ្នូ ២០១៩ ក្រុមអ្នកលេងតុងទីន មានប្រុស-ស្រីជាង១០០នាក់ នាំគ្នាមកមុខសាលាដំបូងខេត្តបាត់ដំបង ដើម្បីប្ដឹងសុំឲ្យតុលាការជួយអន្តរាគមន៍ រឿងមេតុងទីនបោកលុយក្នុងម្នាក់ៗ អស់រាប់លានរៀល ដែលគិតសរុបជាង៧០០លានរៀល ក្រោយពីកម្លាំងអាវុធហត្ថខេត្តចាប់ខ្លួនមេតុងទីននោះ បាន ២ថ្ងៃរួចមក។
អ្នកលេងតុងទីនម្នាក់ ប្រាប់អោយដឹងថា ពួកគាត់មកពីភូមិផ្សេងៗគ្នា តែនៅក្នុងឃុំស្នឹងស្រុកបាណន់ ហើយមេតុងទីនមានឈ្មោះ រស់ បូរិន ហៅគ្រូនី អាយុ៤៩ឆ្នាំ មុខរបរគ្រូបង្រៀន និងរស់នៅភូមិស្នឹងកើត ឃុំស្នឹង ស្រុកបាណន់ និងប្រពន្ធឈ្មោះ ណែម ផល អាយុ៤៨ឆ្នាំ បានកើបប្រាក់តុងទីនជាង៧០០លានរៀល រត់តែត្រូវកម្លាំងអាវុធហត្ថចាប់បានប្ដី (រស់ បូរិន) ២ថ្ងៃបន្ទាប់ពីរត់គេចខ្លួន ។
កូនមេតុងទីនមួយចំនួន បាននិយាយថា ពួកគាត់បានដឹងតម្រុយមុន ពីរឿងមេតុងទីន វេចលុយរត់នេះ រៀបចំផែនការរំដោះប្រពន្ធកូនចេញពីផ្ទះជាមួយនឹងបង្វិចប្រាក់រាប់រយលានរៀលផង ទើបពួកគេនាំគ្នាដាក់ពាក្យបណ្ដឹង ទៅអាវុធហត្ថស្រុកឲ្យជួយអន្តរាគមន៍ភ្លាមៗ ហើយឃាត់ខ្លួនបានតែប្តី ធ្វើគ្រូបង្រៀន រីឯប្រពន្ធនិងកូនរត់អស់ ។ កូនតុងទីនក្នុងម្នាក់ៗ អស់ប្រាក់យ៉ាងតិចក៏៥លានរៀលដែរ និងខ្លះទៀតអស់ពី៥ទៅ៦០លានរៀល ។
ក្រុមកូនតុងទីន បានបញ្ជាក់ថា គោលបំណងដែលពួកគេនាំគ្នាមកមុខសាលាដំបូងខេត្ត គឺទាមទាឲ្យមេតុងទីនឈ្មោះ រស់ បូរិន ហៅ គ្រូនី សងលុយឱ្យពួកគេវិញ ព្រោះម្នាក់ៗអស់ប្រាក់ច្រើនណាស់។ អ្នកខ្លះអស់ទាំងប្លង់ដីធ្លីទៀតផង ដោយសារតុងទីន ។
ទោះជាយ៉ាងណា មេតុងទីន ឈ្មោះ រស់ បូរិន អ្នកសារព័ត៌មានយើង នៅមិនទាន់សុំការបំភ្លឺបាននៅឡើយទេ ជុំវិញការចោទពីសំណាក់ក្រុមកូនតុងទីន ។
បើតាមព័ត៌មានចុងក្រោយអោយដឹងថា មេតុងទីនរូបនេះ ត្រូវបានតុលាការដោះលេងវិញហើយ នៅរសៀលថ្ងៃទី៥ ខែធ្នូ ។ ក្រុមអ្នកតវ៉ា បានសំណូមពរសុំឲ្យលោកអភិបាលខេត្ត និងលោករដ្ឋមន្ត្រីក្រសួងយុត្តិធម៌ ជួយអន្តរាគមន៍ដល់ពួកគាត់ផង៕
