ហ្វីលីពីន ៖ ពិតជារំភើបណាស់! ក្រុមកីឡាបាល់ទាត់ជម្រើសជាតិអាយុក្រោម២២ឆ្នាំកម្ពុជា បានយកឈ្នះម៉ាឡេស៊ី ៣-១ នាការប្រកួតចុងក្រោយនៅក្នុងពូល A នៃព្រឹត្តិការណ៍កីឡា SEA Games 2019 នៅប្រទេសហ្វីលីពីន ខណៈម្ចាស់ផ្ទះហ្វីលីពីនឈ្នះទីម័រខាងកើត ៦-១ ។
លទ្ធផលនេះ នាំឲ្យកម្ពុជាឡើងទៅវគ្គពាក់កណ្តាលផ្តាច់ព្រ័ត្រ ជាប្រវត្តិសាស្ត្រ ដែលមិនធ្លាប់មាន ក្នុងរយៈពេល៦០ឆ្នាំ នៃព្រឹត្តិការណ៍ប្រចាំតំបន់អាស៊ាននេះ ។
នារសៀលថ្ងៃពុធ ទី០៤ ខែធ្នូ ឆ្នាំ២០១៩ នេះក៏ជាជំនួបដ៏តានតឹងបំផុតផងដែរ ដ្បិតទាំងកម្ពុជា និងម៉ាឡេស៊ី សុទ្ធតែមាន ៤ពិន្ទុស្មើគ្នា ក្រោយឆ្លងកាត់៣ប្រកួត ឈ្នះ១ ស្មើ១ និងចាញ់១ ដូចគ្នា ហើយស្របពេលក្រុមម្ចាស់ផ្ទះ U22 ហ្វីលីពីន ក៏មាន៤ពិន្ទុទាមទារឈ្នះដូចគ្នា ។ ថ្វីបើ ក្រុម U22 កម្ពុជា បានបញ្ចប់ត្រឹមចំណាត់ថ្នាក់លេខ២ក្នុងពូលAក្តី ប៉ុន្តែមាន៧ពិន្ទុ ស្មើក្រុមម្ចាស់ផ្ទះហ្វីលីពីន ដែរ ប៉ុន្តែកម្ពុជាមានគ្រាប់បាល់ចំណេញច្រើនជាង ទើបក្រុម U22 កម្ពុជា និងក្រុមកំពូលតារាង U22 មីយ៉ាន់ម៉ា បានដឹកដៃគ្នាឡើងទៅវគ្គពាក់កណ្ដាលផ្ដាច់ព្រ័ត្រ ។
នៅកីឡដ្ឋាន Rizal Memorial នាទីក្រុងម៉ានីល សម្រាប់វគ្គទី១ ក្រុមទាំងពីរមិនអាចបំប៉ោងសំណាញ់ទីគ្នាបានឡើយ ប៉ុន្ដែនៅវគ្គទី២ កីឡាករកម្ពុជា អ៊ិន សូដាវីដ បានស៊ុតបាល់បញ្ចូលទី នៅនាទី ទី៥៦ ហើយ២នាទីក្រោយមក សៀង ចន្ធា បន្ថែមគ្រាប់ទីពីរ បន្ទាប់មក នៅនាទី ទី៦៧ កែវ សុខផេង បានស៊ុតបាល់បញ្ចូលទីគ្រាប់ទី៣ ចប់ការប្រកួត U22 កម្ពុជា ឈ្នះ U22 ម៉ាឡេស៊ី ៣-១ ៕