រាជធានីភ្នំពេញ ៖ នៅថ្ងៃទី០៣ ខែធ្នូ ឆ្នាំ២០១៩នេះ លោក ធាម ចន្ទ័ពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចឃុំខ្លួនមន្ត្រីនគរបាលព្រហ្មទណ្ឌខេត្តព្រៃវែងម្នាក់ ដាក់ពន្ធនាគាររាជធានីភ្នំពេញ (PJ) បណ្ដោះអាសន្នដើម្បីរង់ចាំការការក្តីនៅពេលក្រោយតាមកំណត់ច្បាប់ ព្រោះតែលេងល្បែងចាញ់នៅកាស៊ីណូ បែកគំនិតប្លន់រថយន្តរបស់ពលរដ្ឋបានសម្រេច ត្រូវសមត្ថកិច្ចតាមចាប់ខ្លួនបាន ។
ជនសង្ស័យឈ្មោះ ជុត ជីវន្ត័ អាយុ២៧ឆ្នាំ មានតួនាទីជាមន្ត្រីនគរបាលព្រហ្មទណ្ឌនៅខេត្តព្រៃវែង រស់នៅភូមិបឹងព្រះ ស្រុកបារភ្នំ ខេត្តព្រៃវែង ។ ចំណែកឯជនរងគ្រោះឈ្មោះ ពុធ រិទ្ធី អាយុ៣៣ឆ្នាំ រត់តាក់ស៉ី រស់នៅភូមិត្រពាំងបុណ្យ ឃុំព្រៃគគីរ ស្រុកចន្ទ្រា ខេត្តព្រៃវែង ។
ជនត្រូវចោទ ជុត ជីវន្ត័ ត្រូវបានឃាត់ខ្លួនកាលពីនៅថ្ងៃទី២៧ ខែវិច្ឆិកា ឆ្នាំ២០១៩ ជាមួយវត្ថុតាង មានកាំភ្លើងវែង ចំនួន០៣ដើម និងរថយន្តម៉ាក HILANDER ពណ៌ទឹកប្រាក់ ពាក់ស្លាកលេខ ស្វាយរៀង 2B-4517 ជារបស់ជនរងគ្រោះ ចំនួន១គ្រឿង ។
យោងតាមរបាយការណ៍របស់ស្នងការដ្ឋាននគរបាលរាជធានីភ្នំពេញ បានបញ្ជាក់ថា កាលវេលាម៉ោងប្រហែល១និង៣០នាទីរំលងអាធ្រាត្រឈានចូលថ្ងៃទី១២ ខែវិច្ឆិកា ឆ្នាំ២០១៩ ជនសង្ស័យឈ្មោះ ជុត ជីវន្ត័ បានចេញពីលេងល្បែងនៅណាហ្គាវើល ជិះម៉ូតូឌុប ទៅច្បារអំពៅ ដើម្បីម៉ៅរថយន្ត ជិះទៅខេត្តព្រៃវែង ពេលទៅដល់ ក៏បានឃើញរថយន្ត០១គ្រឿង ម៉ាកហាយឡេនដឺ ពណ៌ទឹកប្រាក់ ពាក់ស្លាកលេខ 2B-4517
ដែលម្ចាស់រថយន្ត ជាមនុស្សធ្លាប់ស្គាល់គ្នា ក៏ជិះរថយន្ត ជូនទៅខេត្តព្រៃវែង ។ ពេលបើករថយន្តដល់ខេត្តព្រៃវែង ជនសង្ស័យបានឲ្យម្ចាស់រថយន្តឈប់ចាំនៅច្រកខាងកើតចូលស្នងការដ្ឋាននគរបាលខេត្តព្រៃវែង ដោយជនសង្ស័យ ចូលទៅក្នុងបន្ទប់ដេក ក្នុងស្នងការដ្ឋាន រួចយកអាវុធ AK ស្វាយបត់០១ដើម ដាក់ក្នុងសាក់កាដូស្ពាយក្រោយ ត្រឡប់ចូលរថយន្តវិញ ។ ហើយឲ្យអ្នកបើករថយន្តជិះត្រឡប់ចូលមកភ្នំពេញវិញ ។
បើតាមរបាយការណ៍ដដែល អោយដឹងថា ពេលជិះតាមផ្លូវមកវិញ ជិតដល់ក្រុងភ្នំពេញ ជនសង្ស័យរកមើលកន្លែងស្ងាត់ ដើម្បីធ្វើសកម្មភាពប្លន់ រហូតមកដល់ផ្លូវបំបែកចូលរោងចក្រថៃហ្គ័រ ក្នុងសង្កាត់ព្រែកឯង ។
ស្រាប់តែជនសង្ស័យបានឲ្យអ្នកបើករថយន្ត ទៅតាមរោងចក្រថៃហ្គ័រ បានប្រហែល១គីឡូម៉ែត្រ ក៏ដកអាវុធពីក្នុងសាក់កាដូ ភ្ជង់ម្ចាស់រថយន្ត ឲ្យចុះ រួចប្លន់យកកាបូបលុយជនរងគ្រោះថែមទៀត ។ រួចហើយជនសង្ស័យ ជិះរថយន្តចូលក្រុងភ្នំពេញវិញ តាមផ្លូវជាតិលេខ១ មកចូលដេកនៅផ្ទះសំណាក់ និងយកសាកកាដូ និងអាវុធទុកក្នុងបន្ទប់ផ្ទះសំណាក់ រួចហើយក៏បើករថយន្តដែលប្លន់បាន ជិះចូលកាស៊ីណូណាហ្គាវើល ។ រហូតដល់ម៉ោងប្រហែល០៨ព្រឹក ជនសង្ស័យបានពឹងសន្តិសុខនៅណាហ្គាវើល ឲ្យនាំមនុស្សប្រុសម្នាក់(មិនស្គាល់ឈ្មោះ)មកទិញរថយន្តក្នុងតម្លៃ ១៤,០០០ដុល្លារ ហើយក៏គេចខ្លួនបាត់ ។
ក្រោយពីទទួលពាក្យបណ្តឹងរបស់ជនរងគ្រោះ នៅថ្ងៃទី១៥ ខែវិច្ឆិកា ឆ្នាំ២០១៩ សមត្ថកិច្ចបានដកហូតរថយន្តម៉ាកហាយឡេនដឺខាងលើ ពីឈ្មោះ យ៉ាន សំអុល នៅកន្លែងលាងឡាន ម្តុំបឹងត្របែកស្ថិតក្នុង សង្កាត់បឹងត្របែក ។
លុះដល់ថ្ងៃទី២៧ ខែវិច្ឆិកា ឆ្នាំ២០១៩ វេលាម៉ោងប្រហែល៨យប់ ពេលដែល ជនសង្ស័យកំពុងស្នាក់នៅផ្ទះក្នុងបុរីផុនស៊ុយ សង្កាត់ចោមចៅទី១ ខណ្ឌពោធិ៍សែនជ័យ ក៏ត្រូវសមត្ថកិច្ចធ្វើការឃាត់ខ្លួន យកមកធ្វើការសាកសួរនៅការិយាល័យនគរបាលព្រហ្មទណ្ឌកំរិតធ្ងន់តែម្តង ។ ក្រោយមក ត្រូវបញ្ជូនទៅតុលាការរាជធានីភ្នំពេញ រហូតតុលាការសម្រេចឃុំខ្លួនដាក់ពន្ធនាគារ (PJ) ៕
