កំពង់ចាម ៖ លោក អ៊ុន ចាន់ដា អភិបាលខេត្តកំពង់ចាម បានអនុញ្ញាតឲ្យក្រុមគណៈប្រតិភូរបស់ក្រុមហ៊ុន ខនវេនធ័រ ហូលឌីង គ្រុប (CONVENTER Holding Group) មកពីប្រទេសចិន ដែលជាក្រុមហ៊ុនឯកជន ផ្នែកកែច្នៃសំរាមទៅជាអគ្គិសនី ចូលជួបសម្តែងការគួរសម និងពិភាក្សាការងារ នៅសាលាខេត្តកំពង់ចាម នាសៀលថ្ងៃទី០២ ខែធ្នូ ឆ្នាំ២០១៩ ។
ក្នុងជំនួបនោះ លោក ជី ឈីយីន ប្រធានក្រុមហ៊ុន ខនវេនធ័រ ហូលឌីង គ្រុប បានជម្រាបអំពីគោលបំណងរបស់ក្រុមហ៊ុនថា ចង់បង្កើតរោងចក្រកែច្នៃសំរាម ទៅជាថាមពលអគ្គីសនី នៅក្នុងខេត្តកំពង់ចាម ដោយហេតុថា សំរាមនៅប្រទេសកម្ពុជា នៅតែជាសំរាមដដែល ដោយពុំមានកែច្នៃទៅជាអ្វីឡើយ វានៅតែបំពុលបរិស្ថានដដែល ។
ប្រធានក្រុមហ៊ុន អះអាងថា ក្រុមហ៊ុនរបស់លោក ជាក្រុមហ៊ុនឯកជនធំមួយ ក្នុងប្រទេសចិន ដែលទទួលជោគជ័យក្នុងការកែច្នៃសំរាម បំប្លែងទៅជាថាមពលអគ្គីសនី ដែលមានបច្ចេកវិទ្យាពីប្រទេសជប៉ុន បច្ចុប្បន្ននេះ ក្រុមហ៊ុនមានគម្រោងប្រមាណជាង២០០ នៅជុំវិញពិភពលោក ។
លោក ជី ឈីយីន បន្តថា ក្រុមហ៊ុនទទួលជោគជ័យ និងបទពិសោធន៍ជាច្រើន ក្នុងការកែច្នៃសំរាម ដូចជានៅប្រទេសវៀតណាម និងប្រទេសថៃ ហើយពេលនេះ លោកមានបំណងចង់បង្កើតរោងចក្រកែច្នៃសំរាម នៅក្នុងប្រទេសកម្ពុជា ពោលគឺក្នុងខេត្តកំពង់ចាម ។
បើតាមលោក អ៊ុន ចាន់ដា អភិបាលខេត្តកំពង់ចាម ក៏បានសម្តែងការស្វាគមន៍ចំពោះក្រុមហ៊ុនចិនមួយនេះ ដែលជាក្រុមហ៊ុនកែច្នៃសំរាម ទៅជាអគ្គិសនី ព្រោះការបង្កើតរោងចក្រមួយនេះក្នុងខេត្តកំពង់ចាម អាចបម្រើដល់ជីវិតរស់នៅរបស់ប្រជាពលរដ្ឋ និងធ្វើឲ្យបរិស្ថានក្នុងខេត្តល្អថែមទៀតផង ។
លោកអភិបាលខេត្ត លើកឡើងថា នៅក្នុងខេត្តកំពង់ចាម ជាមធ្យមសំរាមក្នុងមួយថ្ងៃ អាចមានប្រមាណជាង២៥០តោន ដូច្នេះប្រសិនបើក្រុមហ៊ុនមានបំណងដាក់ទុនវិនិយោគទុនកែច្នៃសំរាម ទៅជាអគ្គិសនីបាន ពិតជាការប្រសើរណាស់ ដែលធ្វើឲ្យបរិស្ថានក្នុងខេត្តល្អ និងបានផ្តល់នូវផាសុខភាពជូនប្រជាពលរដ្ឋ ហើយប្រជាពលរដ្ឋបានអគ្គិសនីប្រើប្រាស់ថែមទៀត៕
