រាជធានីភ្នំពេញ ៖ ផ្ទុះរឿងអធិករណ៍ជាថ្មីទៀត នៅវត្តគោកបញ្ជាន់ ដែលរឿងដដែលនេះធ្លាប់បានកើតឡើងជាបន្តបន្ទាប់ រយៈពេល៣ឆ្នាំមកហើយៗក្រសួងធម្មការ ក៏ធ្លាប់ធ្វើការដោះស្រាយបញ្ចប់ផងដែរ ស្រាប់តែនៅព្រឹកថ្ងៃទី១ ធ្នូ ២០១៩ មានប្រជាពលរដ្ឋប្រមាណ១ពាន់នាក់បានលើកគ្នា ដោយមានកាន់បដាព្រោងព្រាត នាំគ្នាស្រែកទាមទារសុំឲ្យមានការដកតំណែងព្រះចៅអធិការវត្ត និងបណ្ដេញចេញពីវត្តជាបន្ទាន់ ។
សូមបញ្ជាក់ថា វត្តគោកបញ្ជាន់ មានទីតាំងស្ថិតនៅក្នុងភូមិចោមចៅ២ សង្កាត់ចោមចៅទី២ ខណ្ឌពោធិ៍សែនជ័យ ។ ហើយក្រុមអ្នកតវ៉ាប្រាប់ថា ពួកគាត់ គឺជាអ្នករស់នៅភូមិចោមចៅទី១ ទី២ និងទី៣ ក្នុងសង្កាត់ចោមចៅ២ ខណ្ឌពោធិ៍សែនជ័យ ហើយការប្រមូលផ្ដុំគ្នា នាពេលនេះ គឺទាមទារ ៖
ទី១- សុំឲ្យមានការដកបញ្ចប់តំណែងភិក្ខុ សង ថង ចេញពីចៅអធិការវត្តគោកបញ្ជាន់ ។
ទី២- ក្រោយពេលដកតំណែងរួចសុំឲ្យភិក្ខុសង ថង និមន្តចេញពីវត្តគោកបញ្ជាន់ជាបន្ទាន់ដោយគ្មានលក្ខខណ្ឌ ។
ទី៣- សុំទាមទារដីទំហំ៧ម៉ែត្រ គុណនឹង១៥០ម៉ែត្រ ដែលភិក្ខុសេង ថង លក់ឲ្យឈ្មួញក្នុងពេលកន្លងមកយកមកទុកជាសម្បត្តិគរុភណ្ឌវត្តវិញ ។
ទី៤- សុំឲ្យមានការរៀបចំតែងតាំងព្រះចៅអធិការថ្មី ដើម្បីគ្រប់គ្រងដឹកនាំវត្តគោកបញ្ជាន់នេះបន្តទៀត ព្រោះភិក្ខុសេង ថង អសមត្ថភាពមិនអាចគ្រប់គ្រងដឹកនាំវត្តគោកបញ្ជាន់ឡើងវិញបានឡើយ ។
ទី៥- សុំឲ្យមានការរៀបចំបោះឆ្នោតជ្រើសរើសអាចារ្យគណៈកម្មការវត្តគោកបញ្ជាន់សាជាថ្មីឡើងវិញ ។
និងទី៦- សុំឲ្យមានការដកតំណែងភិក្ខុ សេង ថង ចេញពីធម្មធរអនុគណខណ្ឌពោធិ៍សែនជ័យ ។
ខណៈដែលក្រុមអ្នកតវ៉ា បានធ្វើការចោទប្រកាន់ទៅលើចៅអធិការអង្គវត្តថា ប្រព្រឹត្តផ្ទុយពីករណីយកិច្ច និងពុទ្ធវិន័យ បានកាត់ដីវត្តខាងលើ លក់ទៅឲ្យឈ្មួញដោយស្ងាត់ៗ ក្នុងពេលកន្លងមកនោះ ចៅអធិការវត្តគោកបញ្ជាន់ មិនបានចេញមកតទល់ឡើយ ប៉ុន្តែកន្លងមក ព្រះអង្គធ្លាប់បានបដិសេធជាបន្តបន្ទាប់ថា ព្រះអង្គមិនបានប្រព្រឹត្តដូចការចោទប្រកាន់របស់អ្នកតវ៉ានោះទេ ។
ដោយឡែក ប្រជាពលរដ្ឋ ដែលនៅខាងព្រះចៅអធិការ ពួកគាត់និយាយថា ព្រះគ្រូចៅអធិការ សេង ថង មិនមានកំហុសអ្វីដល់ថ្នាក់ត្រូវដកចេញ ឬបណ្ដេញចេញពីវត្តនោះឡើយ ព្រះអង្គជាអ្នកកសាងទីវត្តអារាមមានការរីកចម្រើនខ្លាំងណាស់ ហើយកន្លងមកមានអ្នកមានអំណាចនានា បម្រុងលេបយកដីវត្តហៅថា ដីព្រះទន្លេជាបន្តបន្ទាប់ ប៉ុន្តែត្រូវបានព្រះអង្គការពារដីយ៉ាងដាច់ខាត ទើបគង់វង្សរហូតមកដល់សព្វថ្ងៃ ដូច្នេះព្រះអង្គពុំមែនអាក្រក់ដូចជាការចោទប្រកាន់ខាងលើនេះទេ ។
ទោះជាយ៉ាងណា អាជ្ញាធរនិងសមត្ថកិច្ចនគរបាលខណ្ឌពោធិ៍សែនជ័យ និងសង្កាត់ចោមចៅទី២ បានដាក់កម្លាំងការពារសុវត្ថិភាព ខ្លាចក្រែងមានអំពើហិង្សាណាមួយកើតឡើង ព្រមទាំងសម្របសម្រួលឲ្យមានការស្ងប់ស្ងាត់ នៅវេលាម៉ោង១០និង៣០នាទីព្រឹកថ្ងៃទី១ ធ្នូ ២០១៩ ប្រជាពលរដ្ឋក៏បានរំសាយទៅផ្ទះវិញរៀងៗខ្លួន ។
រឿងកន្លងមក រកមុខអ្នកបញ្ជាអោយគេបោះបង្គោល រំលោភយកដីវត្តគោកបញ្ជាន់ ដែលមានតម្លៃជិត២០លានដុល្លារ ព័ត៌មាន Fresh News បានចុះផ្សាយ ។
ដោយឡែកបើតាមសារព័ត៌មាន Fresh News បានដកស្រង់ សង្ឃដីការបស់ព្រះតេជគុណ សេង ថង ព្រះចៅអធិការវត្តគោកបញ្ជាន់ អោយដឹងថា ព្រះអង្គ បានបិណ្ឌបាតដល់សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ត្រីក្រសួងការពារជាតិ ឲ្យជួយពិនិត្យលើយោធាថ្នាក់ឧត្តមសេនីយ៍២រូប និងបក្ខពួក រួមទាំងកូនប្រុសរបស់គាត់ម្នាក់ទៀត ដែលតែងដឹកនាំបាតុកម្មទម្លាក់ព្រះអង្គ ទាំងគ្មានកំហុសសោះ តាមរករឿងឈ្នានីសបង្កាច់បង្ខូចព្រះកិត្តិនាមព្រះអង្គ និងគណៈកម្មការអាចារ្យជាច្រើនឆ្នាំមកហើយ តាមរយៈការធ្វើបាតុកម្មនេះហើយ ដែលបានធ្វើឲ្យប៉ះពាល់ដល់តម្លៃព្រះពុទ្ធសាសនា ដែលជាសាសនារបស់រដ្ឋ ។
ព្រះចៅអធិការ មានសង្ឃដីកាបន្តថា រឿងហេតុនេះ ផ្ដើមចេញពីរឿងចង់បានដីធ្លីរបស់វត្ត ដែលឧត្តមសេនីយ៍ទាំង២នាក់ គឺទី១លោក ហង្ស ប៊ុនណា និងទី២លោក ហង្ស ប៊ុនឡេង និងកូនប្រុសរបស់គាត់ម្នាក់ទៀតឈ្មោះ សំអាត វាសនា ដែលជាមន្ត្រីយោធា នៅក្រសួងការពារជាតិ រួមនឹងគូកនមួយចំនួនទៀត ។
ព្រះចៅអធិការ មានសង្ឃដីកា ទៀតថា កាលពីព្រឹកថ្ងៃទី០១ ធ្នូ ម្សិលមិញនេះ មានបាតុករមួយក្រុមដឹកនាំ ដោយឈ្មោះ ហង្ស ប៊ុនឡេង និងកូនប្រុស ឈ្មោះ សំអាត វាសនា និងឈ្មោះ ពុំ ផល្លី បានសម្រុកចូលទៅក្នុងវត្តគោកបញ្ជាន់ ស្ថិតនៅក្នុងភូមិចោមចៅ២ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ដោយនាំគ្នា ទាមទារឲ្យដកព្រះអង្គចេញពី ចៅអធិការវត្ត ព្រមទាំងបណ្ដេញព្រះអង្គចេញពីវត្ត ហើយដែលអ្នកចូលរួមធ្វើបាតុកម្មនោះ ពុំមែនជាពុទ្ធបរិស័ទចំណុះជើងវត្តនោះឡើយ ។
ពួកគេអ្នកតវ៉ាភាគច្រើន គឺជាកម្មករ កម្មការិនីរោងចក្រ ដែលឈប់សម្រាកពីការងារនៅថ្ងៃអាទិត្យ ហើយត្រូវបានមេខ្លោងខាងលើ ជួលក្នុងម្នាក់១០ដុល្លារ និងខ្លះទៀត ប្រាប់ថា ទៅបើកអំណោយនៅក្នុងវត្ត ។ ប៉ុន្តែផ្ទុយទៅវិញ បែរជាធ្វើបាតុកម្មប្រឆាំងព្រះសង្ឃ ហើយក្រោយមកអ្នកទាំងខកចិត្ត និងក្រហាយគ្រប់គ្នា ព្រោះតែមេខ្លោងបោកប្រាស់អត់ឲ្យលុយ១០ដុល្លារ ដែលបានសន្យាឡើយ ។
ព្រះចៅអធិការអង្គ បានអោយដឹងបន្ថែមថា ពួកគេបានចោទព្រះអង្គថា បានលក់ដីវត្តទំហំ៧ម៉ែត្រ គុណ១៥០ម៉ែត្រ ទៅឲ្យឈ្មួញ ប៉ុន្តែព្រះអង្គពុំបានដឹងឡើយ ព្រោះបើតាមប្លង់វត្ត ដែលបានធ្វើនៅក្នុងឆ្នាំ២០០៥ ដីនោះ គឺស្ថិតនៅក្រៅដីវត្តទេ ហើយកាលនោះ អាជ្ញាធរសង្កាត់ ដែលមានលោក សុទ្ធ សាធ ជាចៅសង្កាត់ បានកាត់យកធ្វើជាផ្លូវ ឬលក់ដូរ ក៏ព្រះអង្គមិនបានដឹងដែរ ព្រោះជាដីក្រៅប្លង់វត្ត។
ចំណែករឿងអធិករណ៍វត្ត បានផ្ទុះឡើងនៅក្នុងឆ្នាំ២០១៦ ដែលកាលនោះ មានមេក្លោង៤នាក់ បានដឹកនាំបាតុកម្មទម្លាក់ព្រះអង្គ គឺទី១ លោកឧត្តមសេនីយ៍ឯក ហង្ស ប៊ុនណា, ទី២ លោកឧត្តមសេនីយ៍ត្រី ហង្ស ប៊ុនឡេង, ទី៣ ឈ្មោះ ពុំ ផល្លី និងទី៤ ឈ្មោះ ឃី ជឺ ។ អ្នកទាំងនោះ ចង់លេបយកដីវត្ត តែមិនបានសម្រេច បែរជាមកប្ដឹងចោទប្រកាន់ព្រះអង្គ ជាអ្នកលួចលក់ដីវត្ត ឈ្មោះដីស្រះព្រះទន្លេ ទំហំជាង៣ហិចតាទៅវិញ ប៉ុន្តែក្រោយមកអាជ្ញាធរពាក់ព័ន្ធ បានធ្វើការស្រាវជ្រាវ រកមិនឃើញកំហុស ទើបដោះស្រាយបញ្ចប់រឿងអធិករណ៍ តាំងពីពេលនោះមកហើយ ។ ប៉ុន្តែក្រុមនេះ នៅតែមិនព្រមបញ្ឈប់សកម្មភាពរបស់ខ្លួនឡើយ នៅតែបន្តរករឿងព្រះអង្គ ឥតឈប់ រហូតដល់ពេលនេះ បានដឹកនាំធ្វើបាតុកម្មទម្លាក់ព្រះអង្គបែបនេះទៀត ។
ព្រះអង្គ បានបញ្ជាក់ថា សូមពុទ្ធបរិស័ទទាំងឡាយ កុំយល់ច្រឡំទៅលើព័ត៌មានមិនពិតមួលបង្កាច់បង្ខូចព្រះកិត្តយសរបស់ព្រះអង្គ និងនាំឲ្យខូចតម្លៃព្រះពុទ្ធសាសនា ដែលជាសាសនារបស់រដ្ឋ ហើយព្រះសង្ឃ និងទីវត្តអារាមជាកន្លែងធ្វើបុណ្យទានផ្សេងៗ តែបែរជាមន្ត្រីយោធាខាងលើដឹកនាំបាតុកម្មអុកឡុក ជាបន្តបន្ទាប់បែបនេះទៅវិញ ។
យ៉ាងណា ព្រះអង្គ មានព្រះសូមទទូចដល់សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ត្រីក្រសួងការពារជាតិ ជួយពិនិត្យមើលលើឧត្តមសេនីយ៍យោធា និងកូនប្រុសម្នាក់ទៀត ដែលជាមន្ត្រីយោធា នៅក្រសួងការពារជាតិ ហើយតែងបានដឹកនាំបាតុកម្មទម្លាក់ព្រះអង្គ ទាំងគ្មានកំហុសបែបនេះ ។
រហូតមកដល់រសៀលថ្ងៃដដែលនេះ អ្នកសារព័ត៌មាន មិនទាន់ទទួលបានការបកស្រាយពីក្រុមមន្ត្រីយោធាខាងលើ នៅឡើយទេ ។ ទោះជាយ៉ាងនេះក្តីរឿងមួយនេះ រង់ចាំចំណាត់ការរបស់ក្រសួងធម្មការ និងសាសនា ព្រមទាំងស្ថាប័នពាក់ព័ន្ធនានា ដោះសា្រយ ៕