រាជធានីភ្នំពេញ ៖ លោក សុង ប៊ុណ្ណារិទ្ធិ ប្រធានក្រុមប្រឹក្សាចៅក្រមជំនុំជម្រះនៃសាលាដំបូងរាជធានីភ្នំពេញ នៅព្រឹកថ្ងៃទី០២ ធ្នូ ២០១៩នេះ បានបើកសវនាការក្នុងសំណុំរឿងឃាតកម្មមួយ ដោយស្ត្រីសង្ស័យ ជាម្តាយក្មេក និងស្ត្រីសង្ស័យជាប្រពន្ធ រួមដៃគ្នាសម្លាប់កូនប្រសារប្រុស ។
ជនជាប់ចោទទាំង២នាក់(ម្តាយនិងកូនស្រី) ស្ត្រីជាម្តាយឈ្មោះ គង់ ធីតា អាយុ៤៩ឆ្នាំ និងកូនស្រីឈ្មោះ ង៉ូយ សុម៉ារី អាយុ២០ឆ្នាំ ត្រូវជាប្រពន្ធរបស់ជនរងគ្រោះឈ្មោះ គឹម យ៉ត ភេទប្រុស អាយុ២៩ឆ្នាំ ។
នៅក្នុងសវនាការ នៅព្រឹកនេះ ត្រូវបានតំណាងអយ្យការចោទប្រកាន់ពីបទឃាតកម្ម ប្រព្រឹត្តនៅក្នុងបន្ទប់ជួល ផ្លូវបេតុង ភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ រាជធានីភ្នំពេញ កាលពីថ្ងៃទី២៤ ខែឧសភា ឆ្នាំ២០១៩ យោងតាមមាត្រា ១៩៩នៃក្រមព្រហ្មទណ្ឌ។
យ៉ាងណា ជនជាប់ចោទទាំង២នាក់ បានសារភាពថា ពួកគេពិតជាបានរួមដៃគ្នាសម្លាប់ជនរងគ្រោះមែន ព្រោះតែជនរងគ្រោះប្រើហិង្សាលើជនជាប់ចោទជាប្រពន្ធមុន ។ ហើយនៅមុនពេលកើតហេតុ ស្ត្រីដៃដល់ ជាប្របពន្ធ បានសុំលុយជនរងគ្រោះចំនួន១ម៉ឺនរៀល តែជនរងគ្រោះមិនព្រមឲ្យ ទើបឈ្លោះគ្នា និងឈានដល់កើតជាអំពើហិង្សា បែបនេះ ។ នៅពេលហិង្សាកើតឡើង ជនរងគ្រោះបានច្របាច់កប្រពន្ធ ទើបម្តាយក្មេកចូលជួយកូនស្រី ទាញយកកាំបិតប៉័ងតោទៅកាប់ពីខាងក្រោយ ចំណែកប្រពន្ធបានយកខ្សែភ្លើង និងស្កុតចងរុំដៃ និងជើងជនរងគ្រោះ រួចយកកាំបិតចុងស្រួចចាក់ប្តីថែម២កាំបិតទៀត ស្លាប់តែម្តងទៅ ។
ក្រោយស្តាប់ចម្លើយជនជាប់ចោទទាំង២នាក់ ក្រុមប្រឹក្សាចៅក្រមជំនុំជម្រះនៃសាលាដំបូងរាជធានីភ្នំពេញ សម្រេចប្រកាសសាលក្រមសំណុំរឿងនេះ នៅព្រឹកថ្ងៃទី២៣ ខែធ្នូ ឆ្នាំ២០១៩ ខាងមុខនេះ ៕