រាជធានីភ្នំពេញ ៖ លោក ស សុខា រដ្ឋលេខាធិការ នៃក្រសួងអប់រំ យុវជន និងកីឡា និងប្រធានសហព័ន្ធកីឡាប៊ូល និងប៉េតង់កម្ពុជា បានជួបសំណេះសំណាល ជាមួយក្រុមគ្រូបង្វឹក កីឡាករ-កីឡាការិនីប៊ូល និងប៉េតង់កម្ពុជា ត្រៀមចូលរួមការប្រកួត SEA GAMES ២០១៩ លើកទី៣០ ដែលប្រទេសហ្វីលីពីន យើងធ្វើជាម្ចាស់ផ្ទះ ចាប់ពីថ្ងៃទី៣០ ខែវិច្ឆិកា ដល់ថ្ងៃទី១១ ខែធ្នូ ឆ្នាំ២០១៩ ។
លោក ស សុខា បានមានប្រសាសន៍កាលពីរសៀលថ្ងៃទី២៧ ខែវិច្ឆិកា ឆ្នាំ២០១៩ថា ការប្រកួតកាន់តែខិតជិត មកដល់ហើយ នៅសល់តែ ប៉ុន្មានថ្ងៃទៀតទេ ដូច្នេះកីឡាករ-កីឡាការិនី ត្រូវប្រយ័ត្នប្រយែង ការហូបចុក និងថែទាំសុខភាព ឲ្យបានល្អ ព្រមទាំងខិតខំហ្វឹកហាត់ បន្ថែមទៀត ត្រូវធ្វើការប្រកួត ឲ្យអស់សមត្ថភាព ដូចការប្រកួត នៅក្រៅប្រទេសដែរ ។
សម្រាប់កម្ពុជា បានបញ្ជូនប្រតិភូ គ្រូបង្វឹក គ្រូជំនួយ និងកីឡាករ-កីឡាការិនីប៉េតង់ ចំនួន១៧នាក់ ក្នុងនោះមានកីឡាករចំនួន៦នាក់ គឺ៖ សុខ ចាន់មាន, ញ៉ែម បូរ៉ា, ថោង ឈឿង, តិប នរ៉ា, សៀង វណ្ណា និង យឹម សុភណ្ឌ ។
ដោយឡែក កីឡាការិនីមាន៦នាក់ដែរ រួមមាន៖ វីរកីឡាការិនី កែ ឡេង ជាម្ចាស់មេដាយមាស ជើងឯកពិភពលោក ៤សម័យកាលជាប់ៗគ្នា, កីឡាការិនី អ៊ុក ស្រីមុំ, កីឡាការិនី អ៊ុន ស្រីយ៉ា, កីឡាការិនី ស្រ៊ាង សុរ៉ាឃីម, កីឡាការិនី ឃួន យ៉ារី, និងកីឡាការិនី ដួង ឌីណា ។
ក្នុងឱកាសជួបសំណេះសំណាល លោក ស សុខា ប្រធានសហព័ន្ធកីឡាប៊ូល និងប៉េតង់កម្ពុជា បានឧបត្ថម្ភដល់គ្រូបង្វឹក កីឡាករ-កីឡាការិនី ក្នុងមួយម្នាក់ទឹកប្រាក់ ចំនួន៣០០ ដុល្លារ ផងដែរ ៕
