រាជធានីភ្នំពេញ ៖ ក្រោយពីមានហេតុការណ៍ធ្លាក់ដែកលើរថយន្តទំនើបមួយគ្រឿង កាលពីរសៀលថ្ងៃម្សិលមិញនោះ ក្រសួងរៀបចំដែនដី នគរូបនីយកម្ម និងសំណង់ បានសម្រេចផ្អាកការដ្ឋានសំណង់អគារ៤២ជាន់ GOLD TOWER 42 ជាបណ្តោះអាសន្ន ។
យោងតាមលិខិតចុះថ្ងៃទី២០ ខែវិច្ឆិកា ឆ្នាំ២០១៩ របស់លោក ឆាន់ សូរ្យផល អគ្គនាយកនៃអគ្គនាយកដ្ឋានសំណង់ ក្រសួងរៀបចំដែនដីនគរូបនីយកម្ម និងសំណង់ បានជម្រាបមកលោក លី សាន់ហ៊ីម តំណាងក្រុមហ៊ុន យ៉ុន វូ (ខេមបូឌា) ជាម្ចាស់សំណង់អគារមជ្ឈមណ្ឌលពាណិជ្ជកម្ម GOLD TOWER 42 មានទីតាំងស្ថិតនៅលើមហាវិថីព្រះសីហនុ កែងមហាវិថីព្រះមុនីវង្ស ក្នុងភូមិ៤ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ ថាការដ្ឋានសំណង់របស់លោកត្រូវផ្អាកការងារសាងសង់ជាបណ្តោះអាសន្ន ចាប់ពីថ្ងៃចេញលិខិតនេះតទៅ ។
លិខិតផ្អាកការដ្ឋាននេះ បានការណែនាំឲ្យជាម្ចាស់សំណង់ GOLD TOWER 42 អនុវត្តនូវចំណុចសំខាន់ ដូចខាងក្រោម ៖
ទី១- ត្រូវរុះរើចេញកន្ត្រកយោងសម្ភារដែលនៅជាប់តាមបណ្តោយផ្លូវសាធារណៈ ។
ទី២- ត្រូវរកក្រុមហ៊ុនឯកទេសផ្នែកសុវត្ថិភាពការដ្ឋាន មកធ្វើការវាយតម្លៃ និងបញ្ជាក់អំពីសុវត្ថិភាពការដ្ឋានរបស់លោក ដែលបានចុះបញ្ជីពីក្រសួងរៀបចំដែនដីនគរូបនីយកម្ម និងសំណង់ ។
និងទី៣- ការដ្ឋានអាចបន្តការសាងសង់បានលុះត្រាតែមានលិខិតអនុញ្ញាតពីក្រសួងរៀបចំដែនដី នគរូបនីយកម្មនិងសំណង់ ។
ក្នុងករណីលោកមិនអនុវត្តតាមលិខិតនេះទេ នោះលោកនឹងត្រូវប្រឈមមុខតាមផ្លូវច្បាប់ជាធរមាន ។
សូមរម្លឹកថា ញាក់សាច់ទ្រើកៗ ! ដុំដែកយ៉ាងធំធ្លាក់ពីលើអគារ៤២ជាន់ ចំលើរថយន្តពលករដ្ឋទៀតហើយ កាលពីវេលាម៉ោង ១និង៤០នាទីរសៀល ថ្ងៃទី២០ ខែវិចិ្ឆកា ឆ្នាំ២០១៩ ៕