រាជធានីភ្នំពេញ ៖ សមត្ថភាព និងកេរ្តិ៍ឈ្មោះដ៏ល្បីល្បាញនៅលើឆាកអន្តរជាតិរបស់ម្ចាស់មេដាយមាសកីឡាប៉េតង់ពិភពលោក៣ជំនាន់ជាប់ៗគ្នា គឺវីរកីឡាការិនី កែ ឡេង បាននឹងកំពុងបង្ហាញភាពអស្ចារ្យជាថ្មី ក្នុងព្រឹត្តិការណ៍ប្រកួតកីឡាប៉េតង់ជើងឯកពិភពលើកទី១៧ នៅកម្ពុជា ធ្វើឲ្យគូប្រកួតគ្រប់គ្នាមិនចង់ជួបមនុស្សម្នាក់ដ៏គួរឲ្យខ្លាចរអាក្នុងវិស័យកីឡាប៉េតង់ ។
តាមអ្នកជំនាញវិស័យកីឡាប៉េតង់ បានសង្កេតឃើញថា គូប្រកួតតែងតែមានការភ័យខ្លាច ពេលមានវត្តមានរបស់វីរកីឡាការិនី កែ ឡេង ក្នុងការប្រកួតម្តងៗ ហើយគូប្រកួតខ្លាចរអាមិនចង់ជួបនោះទេ ដោយសារសមត្ថភាពវាយរបស់អ្នកស្រី កែ ឡេង វាយចំគោលដៅច្បាស់ៗ ដោយគ្រាប់ប៊ូលដាំនៅនឹងមួយកន្លែង ។
ជាក់ស្តែងក្នុងការប្រកួតជុំទី១ វិញ្ញាសា៣នាក់ទល់៣នាក់នេះ នាថ្ងៃទី១៩ វិច្ឆិកា នៅពហុកីឡដ្ឋានជាតិ កម្ពុជាប៉ះជាមួយក្រុមឡេតូនី ដំបូងឡើយលោក សុខ ម៉ុង ដែលជាគ្រូបង្វឹក បានឲ្យអ្នកស្រី កែ ឡេង អង្គុយកៅអីបម្រុងក្នុងសិតទី១ ព្រោះថា ដើម្បីទុកកម្លាំងប្រកួតលើវិញ្ញាសាវាយយកពិន្ទុ ដោយដាក់ជំនួសកីឡាការិនី កែវ វណ្ណា, អ៊ុក ស្រីមុំ និងអ៊ុន ស្រី ប្រកួតនៅសិតទី១ ក្រោយមក ឡេតូនីនាំមុខ ៣-០ ដូច្នេះគ្រូក៏សម្រេចចិត្តប្ដូរអ្នកស្រី កែ ឡេង ចូលលេងវិញ នៅសិតទី២ ។
គ្រាន់តែឃើញអ្នកស្រី កែ ឡេង ដូរចូលភ្លាមដៃគូភ័យ ហាក់បាក់ទឹកចិត្តបាត់ទៅហើយ ខណៈការប្រកួតមានការប្រែប្រួលតែម្ដង ។ អ្វីដែលគួរឲ្យកត់សម្គាល់ ក្រោយការចូលលេងរបស់កីឡាការិនី កែ ឡេង ក្រុមប៉េតង់ឡេតូនី គ្មានពិន្ទុកើតឡើងឡើយ តាមរយៈការវាយច្បាស់ៗ ចំគោលដៅ ទៅលើគ្រាប់ប៊ូល ដែលចូលយ៉ាងល្អនោះ ធ្វើអោយកម្ពុជាបានយកឈ្នះក្នុងលទ្ធផល ១៣-៣ ។
វីរកីឡាការិនី កែ ឡេង ដណ្ដើមបានមេដាយមាស៣លើកជាប់ៗគ្នា ជូនជាតិរួចមកហើយ ពោលគឺឆ្នាំ២០១៣ ដណ្ដើមបាននៅបារាំង ឆ្នាំ២០១៥ ដណ្ដើមបាននៅថៃ និងឆ្នាំ២០១៧ ដណ្ដើមបាននៅប្រទេសចិន ចំណែកឆ្នាំ២០១៩នេះ ខណៈការប្រកួតកំពុងប្រព្រឹត្តទៅលើទឹកដីកម្ពុជា ។
ដូច្នេះបើវីរកីឡាការិនី កែ ឡេង អាចយកមេដាយមាសពិភពលោកបានទៀត មានន័យថា អ្នកស្រីអាចបង្កើតកំណត់ត្រាប្រវត្តិសាស្ដ្រកាន់តែអស្ចារ្យ ក្នុងវិស័យកីឡាប៉េតង់ពិភពលោក ក្នុងការដណ្ដើមបានមេដាយមាសពិភពលោក៤ជំនាន់ជាប់ៗគ្នា ។
សូមបញ្ជាក់ថា សម្រាប់ការប្រកួតកីឡាប៉េតង់ជ្រើសរើសជើងឯកពិភពលោកយុវជន និងស្ដ្រី លើកទី១៧ ដែលកម្ពុជាទទួលបានសិទ្ធិធ្វើជាម្ចាស់ផ្ទះលើកដំបូងនេះ គឺចាប់ផ្ដើមការប្រកួតពីថ្ងៃទី១៩ ដល់ថ្ងៃទី២៣ ខែវិច្ឆិកា ២០១៩ នៅពហុកីឡដ្ឋានជាតិ រាជធានីភ្នំពេញ ដោយមានក្រុមកីឡាករ-កីឡាការិនីមកពី៤៩ប្រទេស រួមទាំងម្ចាស់ផ្ទះកម្ពុជាចូលរួមប្រកួត ៕