លោក វ៉ា សម្បត្តិ ជាកសិកររស់នៅភូមិស្អំ ឃុំក្រែក ស្រុកពញាក្រែក ខេត្តត្បូងឃ្មុំ។ គាត់មានបទពិសោធន៍ក្នុងការដាំដំណាំម្រេចយ៉ាងល្អដែលបទពិសោធន៍នេះ គឺគាត់ចេះតាមរយៈកសិករដែលមានជំនាញនិងឪពុកម្តាយរបស់គាត់ គួបផ្សំនឹងគំនិតច្នៃប្រឌិតផ្ទាល់ខ្លួនរបស់គាត់ផងដែរ។ បទពិសោធន៍នេះ គាត់បានចែករំលែកដល់កសិករដទៃទៀតនៅជិតខាងដែលដាំដំណាំម្រេចដូចគាត់ដែរ។ ចំពោះបច្ចេកទេសនៃការដាំបង្ហាញជូន ដូចខាងក្រោម៖
១/-បច្ចេកទេសដាំដុះ៖
ក–រដូវដាំដុះ ជាទូទៅគាត់ដាំម្រេចនៅរដូវវស្សា ពីព្រោះនៅរដូវប្រាំងគាត់មិនមានទឹកគ្រប់គ្រាន់សំរាប់ ស្រោចស្រព ហើយត្រូវបូមទឹកស្រោចស្រពដែលធ្វើឲ្យគាត់ចំណាយប្រាក់ច្រើន។
ខ–ការជ្រើសរើសពូជ គាត់បានជ្រើសរើសពូជ២ប្រភេទយកមកដាំគឺ ម្រេចធម្មតាដែលភាគច្រើនកសិករ និយមដាំដែលសំបកវាមានពណ៌ក្រហមនៅពេលផ្លែវាទុំ ផ្លែវាមានលក្ខណៈមូលតូចជាកួរ ហើយគ្រាប់ធំជាងពូជម្រេចឥណ្ឌា។ ពូជនេះមានផ្លែច្រើនក្នុងមួយដើមៗ ហើយវាមានកួរផ្លែធំៗ។ ប្រភេទពូជនេះវាសមស្របទៅនឹងអាកាសធាតុនៅក្នុងតំបន់នោះដែលគេអាចដាំដុះបាន។ ជាពិសេសវាផ្តល់ទិន្នផលខ្ពស់នៅតំបន់ដាំដុះរបស់គាត់ ជាពូប្រពៃណីអាចទុកបន្តពូជនៅជំនាន់ក្រោយៗទៀតជាពូជធន់ទ្រាំជំងឺ សត្វល្អិតបំផ្លាញ ហើយភាគរយនៃការដុះលើសពី ៨០%។
គ-បច្ចេកទេសរៀបចំដី និងការជ្រើសរើសទីតាំង ប្រភេទដីដែលអំណោយផលដល់ដំណាំម្រេចគឺ ដីសម្បូរដោយមមោក ដីក្រហម និងជ្រើសរើសដីមិនលិចទឹក។ មុនដាំត្រូវភ្ជួររាស់ដីចំនួន ២ ទៅ ៣សារ ដើម្បី សំអាតស្មៅ ជ្រោយដីឲ្យបានផុសល្អ និងហាលដីសំលាប់មេរោគ។
២/-បច្ចេកទេសជីករណ្ដៅដាំ និងការរៀបចំដាក់ជន្លង់៖
ក-ការរៀបចំរណ្ដៅដាំ
- ក្នុងការដាំត្រូវជ្រើសរើសទងដែលមានដើមថ្លោស រឹងមាំល្អ ឫសជើងតុកកែ ដុះគ្រប់ថ្នាំង
- រណ្តៅត្រូវជីកទំហំ ៣០, ៤០ និង ៥០ស.ម.
- ជីកចំងាយ ១៥ ទៅ ២០ស.ម. ពីជន្លង់
- ជាទូទៅចំនួនកូនម្រេច ២.០០០ដើម ក្នុង ១ហិកតា
- ក្នុងរណ្តៅដាក់ជីលាមកសត្វ ៣០ ទៅ ៤០ គ.ក្រ. លាយជាមួយដី។
ខ-ការរៀបចំដាក់ជន្លង់
- ការដាក់ជន្លង់អាចដាក់នៅពេលដាំ មុនពេលដាំ និងក្រោយពេលដាំ ១៥ ទៅ ២០ថ្ងៃ
- ជន្លង់នេះគឺត្រូវជ្រើសរើសមើលគុណភាពឲ្យបានយូរគឺ ១៥ ទៅ ២០ឆ្នាំ
- ជន្លង់ជាទូទៅមានកំពស់ ៣ ទៅ ៤ម៉ែត្រ
- ចន្លោះពីជន្លង់មួយទៅជន្លង់មួយ ២ម៉ែត្រ
- ជន្លង់ដែលគាត់ជ្រើសរើសជាឈើខ្លឹមដូចជា ផ្ចឹក សុក្រម (ប្រភេទជន្លង់ងាប់)។
៣/-ការកាត់ទងម្រេចទុកសំរាប់ដាំ៖
ក-ការកាត់ទង
ម្រេចបន្តពូជដោយទង។ គាត់ជ្រើសរើសទងវានៅមិនទាន់បែកខ្នែង យកទងដែលមានអាយុ១ឆ្នាំ ហើយ កាត់ទងប្រវែង ៣តឹក។ ប្រលះយកមែកចេញឲ្យអស់យកទៅដោតផ្សាំសិន ឬដោតក្នុងរណ្តៅតែម្តង (ទងម្រេចគាត់ផ្សាំខ្លួនឯង និងទិញទងម្រេចពីគេបន្ថែមខ្លះ)។
ខ-ការដាក់ដាំ
របៀបទី១. ដាក់ទងរាងបញ្ឆិត ឲ្យទងអោនទៅរកជន្លង់
របៀបទី២. យកកំណាត់ទងពីដើមម្រេចថ្មីៗ ជ្រលក់ទឹកពី ១៥ ទៅ ២០នាទី។ ដាំរាងបញ្ឆិតដូចខាងលើ ដោយឲ្យទងអោនទៅរកជន្លង់។ ដាក់ដាំ២ទងក្នុង១រណ្ដៅដោយឲ្យជើងតុកកែផ្ងារឡើងលើ។ កំណាត់ទងកប់ចូលក្នុងដី ២ភាគ៣ លុបទងកម្រាស់ ៣ស.ម. បង្ហាប់ដោយជាន់ជើងឲ្យណែន។
របៀបទី៣. យកកំណាត់ទងម្រេច២ ដាក់ទន្ទឹមគ្នាក្នុងរណ្ដៅផ្តេកទងទាំងពីរឲ្យងាកទ្រេតចេញពីគ្នា។ យកលាមកសត្វដាក់ក្នុងរណ្តៅដោយទុកឲ្យទងលេចចេញមកលើតែ ២ ទៅ ៣ថ្នាំងប៉ុណ្ណោះ។
៤/-បច្ចេកទេសនៃការថែទាំដំណាំម្រេច៖
- ធ្វើស្មៅ ជ្រោយដី (ធ្វើស្មៅ ១ ទៅ ២ដង ក្នុង១ឆ្នាំ)
- គ្របគល់ម្រេចនៅពេលធ្វើស្មៅ
- ស្រោចទឹកពេលដាំ (៥លីត្រក្នុង១រណ្ដៅ) នៅរដូវប្រាងស្រោច ១ថ្ងៃម្តង
- ចងទងម្រេចជាប់ជន្លង់ការពារខ្យល់បោកបក់
- បេះផ្កាចោលខ្លះជំរុញលូតលាស់ដើម
- ការធីវកូន មានការកាត់ខ្នែង និងដករំលោះកូនចេញ (ទុក ៣ ទៅ ៤ដើមក្នុង ១គុម្ព)
- ការចាក់ដីបន្ថែម៖ ធ្វើក្រោយពីការជ្រោយដី លុបគល់ (ធ្វើ២ដងក្នុង១ឆ្នាំ ដើមរដូវភ្លៀង និងចុងរដូវភ្លៀង)
- ការដាក់ដី ចាបើផ្តើមពេលផ្កានិងចាប់ផ្តើមផ្លែ បន្ទាប់ពីបេះផ្លែ (ជីធម្មជាតិ ១០ ទៅ ១៥គីឡូក្រាមក្នុង១រណ្តៅ)
- ការកាត់ខ្នែង អនុវត្ត៤ឆ្នាំដំបូងបន្ទាប់ពីដាំ។
៥/-ការប្រមូលផល៖
- បេះក្រោយផ្ការយៈពេល ៩ខែ ផ្លែទុំមានពណ៌ក្រហមជាំ
- ការប្រមូលផលធ្វើច្រើនសារ
- ម្រេចអាយុ ៣ឆ្នាំ ផ្តល់ទិន្នផល ១ ទៅ ២ គីឡូក្រាមក្នុង ១ដើម
- ម្រេចអាយុបាន ៤ ទៅ ៦ឆ្នាំ ផ្តល់ផល ៤ ទៅ ៧ គីឡូក្រាម ក្នុង១ដើម។
៦/-ចំណាប់អារម្មណ៍របស់កសិករ
លោកពូមានប្រសាសន៍ថា ការដាំដំណាំម្រេចត្រូវចំណាយច្រើនពេលចាប់ផ្តើម ប៉ុន្តែវាមានតម្លៃនៅលើទីផ្សារ។ ចំពោះការងាររបស់គាត់នៅឆ្នាំដំបូងចំណាយអស់ ៥០.២០៦.០០០រៀល គាត់ទទួលបានផលមកវិញនៅឆ្នាំទី១ ៧៥.០០០.០០០រៀល។ បើទូទាត់លើការចំណាយ គាត់ទទួលបានប្រាក់ចំណេញ ២៤.៧៩៤.០០០រៀល។ ដូច្នោះបើកសិករមានលក្ខខណ្ឌសមស្របក្នុងការដាំដុះ គួរដាំម្រេច ដើម្បីបានប្រាក់ចំណូលច្រើនសំរាប់គ្រួសារ។ ពីព្រោះដំណាំម្រេចនេះ អាចទទួលផលបាន ១ ទៅ ២ដង ក្នុង ១ឆ្នាំ ៕