ខេត្តស្វាយរៀង ៖ ករណីហិង្សាក្នុងគ្រួសារមួយ ដោយប្រពន្ធទាញ ញញួរមកវាយក្បាលប្តីច្រើនញញួរ បណ្តាលឲ្យរងរបួសធ្ងន់ ត្រូវបានសាច់ញាតិបញ្ជូនទៅសង្គ្រោះនៅមន្ទីរពេទ្យភ្លាមៗ សង្ស័យជម្លោះកើតចេញពីភ្លើងប្រចណ្ឌ ។
ករណីហិង្សានេះបានកើតឡើងកាលពីល្ងាចថ្ងៃទី១៩ ខែវិច្ឆិកា ឆ្នាំ២០១៩ ស្ថិតនៅភូមិបាក្រុង ឃុំស្វាយចេក ស្រុករំដួល ខេត្តស្វាយរៀង ។
សមត្ថកិច្ចបានឲ្យដឹងថា ស្ត្រីជាប្រពន្ធមានឈ្មោះ ឡៅ សាម៉ាច អាយុ៥៣ឆ្នាំ រស់នៅភូមិបាក្រុង ឃុំស្វាយចេក ស្រុករំដួល មូលហេតុទំនងដោយសារកើតការប្រចណ្ឌប្តី ទើបប្រើហិង្សាទាញញញួរមកវាយប្តីឈ្មោះ សូ សារិត អាយុ៥៥ឆ្នាំ រស់នៅភូមិឃុំជាមួយគ្នា ជាច្រើនញញួរចំក្បាល បណ្ដាលឲ្យរងរបួសធ្ងន់ធ្ងរបែបនេះ ។
បច្ចុប្បន្ន ជនដៃដល់ត្រូវសមត្ថកិច្ចហៅមកសួរនាំ និងកំពុងស្រាវជ្រាវដើម្បីធ្វើសំណុំរឿងតាមនិតិវិធីច្បាប់ ។ ចំណែកជនរងគ្រោះ ក្រោយកើតហេតុភ្លាមៗ ត្រូវបានសាច់ញាតិដឹកបញ្ជូនទៅមន្ទីរពេទ្យខេត្តស្វាយរៀង ដើម្បីសង្គ្រោះផងដែរ ៕
