រាជធានីភ្នំពេញ ៖ សត្វពស់ថ្លាន់មួយក្បាល បានលូនចូលសំងំនៅក្នុងរថយន្តបុរសម្នាក់ ម្ចាស់មិនដឹងបានបើករថយន្តចេញពីផ្ទះទៅតាមបណ្ដោយផ្លូវជាតិលេខ៤ ស្រាប់តែក្រឡេកឃើញពស់នៅក្រោមពូក ធ្វើឲ្យព្រលឹងស្ទើរចេញទៅស៊ីព្រលឹត ប៉ុន្តែជ្រុលខ្លួនហើយ មានតែបើកនាំពស់ថ្លាន់ចូលសាលាសង្កាត់ចោមចៅ៣ ខណ្ឌពោធិ៍សែនជ័យ ទាំងភ័យស្លន់ស្លោ ដើម្បីឲ្យសមត្ថកិច្ចជួយចាប់ចេញ ។
ករណីនេះបង្កឲ្យមានការភ្ញាក់ផ្អើលកាលពីម៉ោង១០ព្រឹកថ្ងៃទី១៩ វិច្ឆិកា ២០១៩ នៅក្នុងសាលាសង្កាត់ចោមចៅ៣ ក្នុងភូមិព្រៃព្រីងខាងត្បូង ខណ្ឌពោធិ៍សែនជ័យ ។
បើតាមបងប្រុសម្ចាស់រថយន្ត TOYOTA RAV4 ពណ៌ស្លែ ពាក់ស្លាកលេខភ្នំពេញភ្នំពេញ 2R-6262 មិនបានប្រាប់អត្តសញ្ញាណទេ បានប្រាប់ថា គាត់ជាអ្នករស់នៅក្នុងភូមិព្រៃព្រីងខាងត្បូង២ មិនបានដឹងថា សត្វពស់ថ្លាន់១ក្បាលទំហំប៉ុនក.ដៃមនុស្សចាស់លូនចូលទៅសំងំ នៅក្នុងរថយន្តរបស់គាត់ តាំងពីពេលណាមកនោះទេ ហើយនៅព្រឹកថ្ងៃកើតហេតុ គាត់បានបើករថយន្តចេញពីផ្ទះ ដែលជិតសាលសង្កាត់ចោមចៅ៣ដែរ ហើយពេលរូពគាត់បើកទ្វារចូលដំបូង អត់ឃើញមានពស់ថ្លាន់នេះទេ លុះពេលបើកចេញផុតបន្តិចតាមបណ្ដោយផ្លូវជាតិលេខ៤ ស្រាប់តែប្រទះឃើញ ពស់នេះនៅលូណចេញមកពីក្រោមពូករថយន្តតែម្តង ។
បងប្រុសម្ចាស់រថយន្ត បន្តថា ពេលនោះរូបគាត់មានការភិតភ័យ និងខ្លាចយ៉ាងខ្លាំង ប៉ុន្តែមិនដឹងធ្វើយ៉ាងម៉េចបើជ្រុលខ្លួនហួសទៅហើយ មានតែបន្តដំណើរសំដៅចូលទៅកាន់សាលាសង្កាត់ចោមចៅ៣ ឲ្យអាជ្ញាធរជួយចាប់វាចេញពីក្នុងរថយន្ត ដើម្បីប្រគល់ជូនខាងក្រុមអភិក្សសត្វព្រៃ ។
បើតាមភ្នាក់ងារអភិរក្សសត្វព្រៃ ក្រោយពីទទួលដំណឹងថា ពលរដ្ឋចាប់បានពស់ថ្លាន់១ក្បាល លោកបានមកទទួលភ្លាម ។ លោកអះអាងថា មិនដឹងថា នៅក្នុងខណ្ឌនេះមានពស់ច្រើន ឬក៏ពស់ដដែលៗនោះទេ តែសម្រាប់សត្វពស់ថ្លាន់មួយក្បាលនេះ បើតាមលោកចាំមិនភ្លេចទេ វាជាលើកទី១០៤ហើយ សម្រាប់ខណ្ឌពោធិ៍សែនជ័យ ពេលចាប់បានម្ដងៗ តែងតែយកទៅលែង នៅតំបន់ភ្នំតាម៉ៅ ជាកន្លែងដែលមានសុវត្ថិភាព តែវាហាក់ដូចជាមិនចេះអស់សោះ ៕