ខេត្តសៀមរាប ៖ មន្ត្រីនគរបាលចរាចរណ៍ជើងទឹកខេត្តសៀមរាបម្នាក់ ស្រវឹងស្រា បានយកកាំភ្លើង AK47 បាញ់ឡើងលើអស់ជាង១០គ្រាប់ ត្រូវបានកម្លាំងនគរបាលជំនាញសង្កាត់ចុងឃ្នៀស បានរៀបចំធ្វើសំណុំរឿងបញ្ជូនទៅ ដល់ថ្នាក់លើ ។
ហេតុការណ៍បាញ់បោះសេរីរបស់មន្ត្រីនគរបាលចរាចរណ៍ជើងទឹកនេះ បានកើតឡើងនៅវេលាម៉ោងជាង៦ល្ងាចថ្ងៃទី១៧ វិច្ឆិកានេះ ស្ថិតនៅជិតផែបណ្ដែតទឹករបស់ការិយាល័យចរាចរណ៍ផ្លូវទឹក ត្រង់ចំណុចខាងត្បូងក្បាលកន្ធីគម ក្នុងភូមិទី៥ ចម្ងាយ១០០ម៉ែត្រ ពីសង្កាត់ចុងឃ្នៀស ក្រុងសៀមរាប ។
សមត្ថកិច្ចមូលដ្ឋានបានឲ្យដឹងថា ជនដៃដល់បាញ់បោះសេរីមានឈ្មោះ ជា ប៊ុនវី ភេទប្រុស អាយុ៤៩ឆ្នាំ ជាមន្ត្រីនគរបាលចរាចរណ៍ជើងទឹក នៃស្នងការនគរបាលខេត្តសៀមរាប ដែលធ្វើការនៅក្នុងប៉ុស្តិ៍មូលដ្ឋានចុងឃ្នៀស ហើយមានទីលំនៅភូមិទី៥ សង្កាត់ចុងឃ្នៀស ក្រុងសៀមរាប ខេត្តសៀមរាប ។
ទោះជាយ៉ាងណា ករណីបាញ់បោះសេរីនេះ សមត្ថកិច្ចបានបញ្ជាក់ដែរថា មិនបណ្ដាលឲ្យនរណាម្នាក់រងរបួសនោះទេ គ្រាន់តែបង្កការភ្ញាក់ផ្អើលដល់ពលរដ្ឋតែប៉ុណ្ណោះ ដោយសារគាត់(មន្ត្រីប៉ូលិសចរាចរណ៍ជើងទឹក) បានផឹកស្រាស្រវឹង ហើយបានយកកាំភ្លើងអាកា AK47 មកបាញ់បោះដោយសេរី នៅតាមបណ្តោយផ្លូវទៅកំពង់ផែ ស៊ូ ជីង ។
ចំណែកលោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប បានមានប្រសាសន៍នៅថ្ងៃទី១៩ វិច្ឆិកានេះថា ករណីនេះ លោកបានឲ្យខាងបុគ្គលិកការិយាល័យសួរនាំ ដើម្បីចាត់ការតាមផ្លូវច្បាប់ជាធរមាន ៕