រាជធានីភ្នំពេញ ៖ ជនសង្ស័យ២នាក់ (ឪពុកនិងកូនប្រុសចុង) ជាប់ចោទពីបទប៉ុនប៉ង និងរំលោភសេពសន្ថវៈនារីម្នាក់ ត្រូវកម្លាំងសមត្តកិច្ចនគរបាលការិយាល័យនគរបាលប្រឆាំងការជួញដូរមនុស្ស និងការពារអនិតិជន ចាប់បញ្ជូនខ្លួនទៅកាន់សាលាដំបូងរាជធានីភ្នំពេញ កាលពីព្រឹកថ្ងៃទី១៨ វិច្ឆិកា ២០១៩ តាមពាក្យបណ្តឹងរបស់ម្តាយនារីរងគ្រោះ ។
ករណីប៉ុនប៉ង និងរំលោភសេពសន្ថវៈខាងលើនេះបានកើតឡើងលើកទី១ នៅវេលាយប់ថ្ងៃទី១០ វិច្ឆិកា និថលើកទី២ នៅយប់ថ្ងៃទី១៣ វិច្ឆិកា ត្រង់ចំណុចហាងថតរូបមួយកន្លែង ក្បែរវិទ្យាល័យសន្ធមុក ស្ថិតក្នុងសង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ ។
ប្រភពពីមន្ត្រីនគរបាលប៉ុស្តិ៍រដ្ឋបាលសង្កាត់ទឹកល្អក់៣ បានឲ្យដឹងថា បុរសជាឪពុកមានឈ្មោះ អៀម ស្វិត អាយុ៣៧ឆ្នាំ និងកូនប្រុសចុង នៅកម្លោះមានឈ្មោះ អ៊ែន មេសា អាយុ២០ឆ្នាំ អ្នកទាំង២ជាកម្មករបម្រើការងារនៅហាងថតរូប មានទីតាំងកើតហេតុដូចខាងលើ ។ ចំណែកនារីរងគ្រោះ ក៏ធ្វើការនៅហាងថតរូបនោះដែរ តែមិនជាប់សាច់ញាតិគ្នាជាមួយក្រុមជនសង្ស័យទេ នាងមានស្រុកកំណើតនៅខេត្តកំពង់ចាម ហើយថៅកែហាងថតរូប តម្រូវឲ្យពួកគេស្នាក់នៅលើផ្ទះល្វែងជាន់ទី១ ជុំគ្នា ។
ប្រភពដដែល បានបន្តឲ្យដឹងថា មុនកើតហេតុនៅវេលាយប់ជ្រៅ ថ្ងៃទី១០ វិច្ឆិកា ២០១៩ ក្រោយបញ្ចប់ការងារ នារីរងគ្រោះបានដេកលង់លក់ នៅជាប់ជញ្ជាំងផ្ទះម្ខាង តែម្នាក់ឯង ហើយអំពូលភ្លើងត្រូវបិទ ងងឹតសូន្យឈឹង ពេលនោះបុរសជាឪពុកឈ្មោះ អៀម ស្វិត ដែលកំពុងដេកជាមួយកូន និងប្រពន្ធខ្លួន នៅកណ្តាលផ្ទះជាន់ទី១ ជុំគ្នានោះ បានងើបលបលួចដើរទៅរកនារីរងគ្រោះ ដោយធ្វើសកម្មភាព យកដៃស្ទាបអង្អែល នឹងច្របាច់សុដន់នាងលេង រួចហើយប៉ុនប៉ងរំលោភសេពសន្ថវៈនាង ប៉ុន្តែជាសំណាងល្អ ជនរងគ្រោះដឹងខ្លួនទាន់ ហើយរឿងក៏ស្ងាត់ស្ងៀមទៅ ។ លុះដល់យប់ថ្ងៃទី១៣ វិច្ឆិកា នារីរងគ្រោះបានដេកនៅ កន្លែងនាងដូចធម្មតា ពេលនោះបុរសជាឪពុក បានដេញកូនប្រុសឈ្មោះ អ៊ែន មេសា ដែលកំពុងដេកជាមួយខ្លួនឲ្យងើបចេញ ដោយសារកូនប្រុសចុចលេងទូរស័ព្ទរំខានដំណេកគាត់ ។ ស្រាប់តែកូនប្រុស អ៊ែន មេសា បានងើបទៅដេកក្បែរជាមួយនារីរងគ្រោះហើយធ្វើសកម្មភាពចាប់អោបរឹតនាង រួចបង្ខិតបង្ខំរួមរ័ករហូតឡើងឋានសួគ៌បានសម្រេច ពេលនោះរូបនាងមិនហ៊ានស្រែកទេ ដោយខ្លាចបុរសឈ្មោះ អ៊ែន មេសា នោះគំរាមច្របាច់កនាងសម្លាប់ចោល ។
លុះព្រឹកឡើង នៅថ្ងៃទី១៤ វិច្ឆិកា នារីរងគ្រោះបានសុំច្បាប់ថៅកែហាង ដើម្បីធ្វើដំណើរទៅលេងស្រុកកំណើត ពេលទៅដល់ផ្ទះ នាងបានទៅរៀបរាប់អំពីសកម្មភាពរបស់ឪពុកនិងកូន ដែលបានប្រព្រឹត្តមកលើរូបនាង ម្តងហើយម្តងទៀតនេះ ប្រាប់ឪពុកម្តាយទាំងអស់ ។ ពេលដឹងរឿងនេះភ្លាម អាណាព្យាបាលជនរងគ្រោះបាននាំកូនឡើងពីខេត្ត មកភ្នំពេញ ឆ្ពោះទៅកាន់ស្នាក់ការប៉ុស្តិរដ្ឋបាលនគរបាលសង្កាត់ទឹកល្អក់៣ ខ័ណ្ឌទួលគោក ដាក់ពាក្យប្តឹងជនកំហូចទាំង២នាក់ឪពុកនឹងកូនចុង ពីបទ ប៉ុនប៉ង នឹងរំលោភសេពសន្ថវៈ ។
ក្រោយពីទទួលបានពាក្យបណ្តឹង សមត្ថកិច្ចនគរបាលមូលដ្ឋាន បានចុះទៅហៅជនសង្ស័យទាំងពីរ ពីហាងថតរូប មកកាន់ស្នាក់ការប៉ុស្តិរដ្ឋបាល ដើម្បីធ្វើការសាកសួរ ជំវិញការចោទប្រកាន់នោះ ។
នៅប៉ុស្តិ៍ប៉ូលិស ឪពុកនិងកូនប្រុស បានសារភាពដូចគ្នាថា រូបគេពិតជាបានប្រព្រឹត្តដូចអ្វីដែលចោទប្រកាន់មែន ។
មន្ត្រីនគរបាលប៉ុស្តិ៍ នៅថ្ងៃទី១៦ វិច្ឆិកា បានបញ្ជូនសំណុំរឿងនេះទៅកាន់ការិយាល័យប្រឆាំងការជួញដូរមនុស្ស និងការពារអនីតិជនរាជធានីភ្នំពេញ ដើម្បីចាត់ការបន្ត ។ នៅព្រឹកថ្ងៃទី១៨ វិច្ឆិកា សមត្ថកិច្ច បានកសាងសំណុំរឿងបញ្ជូនជនសង្ស័យ ឪពុក និងកូនចុង ទៅតុលាការកាត់ទោស តាមច្បាប់៕
