ខេត្តសៀមរាប ៖ ជនជាតិចិនចំនួន២នាក់ ត្រូវបាននគរបាលព្រហ្មទណ្ឌកម្រិតស្រាល នៃស្នងការនគរបាលខេត្តសៀមរាប សហការជាមួយ នាយកដ្ឋាននគរបាលព្រហ្មទណ្ឌក្រសួងមហាផ្ទៃ ស្រាវជ្រាវចាប់ខ្លួនបាននៅរសៀលថ្ងៃទី១៨ វិច្ឆិកានេះ ក្នុងទឹកដីខេត្តកណ្ដាល បន្ទាប់ពីជនសង្ស័យទាំង២នាក់ បានធ្វើសកម្មភាព លួចម៉ូតូមួយ គ្រឿងនៅក្រុងសៀមរាប ។
បើតាមរបាយការណ៍របស់នគរបាលខេត្តសៀមរាប បានឲ្យដឹងថា ករណីលួចម៉ូតូ០១គ្រឿង ម៉ាកហុងដាឃ្លីក នៅពីថ្ងៃទី១៨ ខែវិច្ឆិកា ឆ្នាំ២០១៩ នៅចំណុចអូតែល«បាយ័នប៊ូទិក» ស្ថិតនៅភូមិបន្ទាយចាស់ សង្កាត់ស្លក្រាម ក្រុងសៀមរាប ។
របាយការណ៍ដដែលថា កាលពីថ្ងៃទី១៧ វិច្ឆិកា ពេលព្រឹក មានបុរសជនជាតិថៃម្នាក់ បានមកជួលម៉ូតូមួយគ្រឿង ម៉ាកហុងដាឃ្លីក សេរីឆ្នាំ២០១២ ពណ៌ក្រហមលាយខ្មៅ ពាក់ស្លាកលេខបាត់ដំបង 1L-9343 ពីក្រុមហ៊ុនទេសចរណ៍មួយ ដោយបុរសជនជាតិថៃនោះ ទុកនៅមុខសណ្ឋាគារ បាយ័នប៊ូទិក លុះព្រឹកឡើងថ្ងៃទី១៨វិច្ឆិកា ស្រាប់តែបុរសជនជាតិថៃ ដឹងថាបាត់ម៉ូតូ ហើយបានខលមកប្រាប់ម្ចាស់ក្រុមហ៊ុនថាម៉ូតូដែលគេបានជួលនោះ បានបាត់ហើយ ទើបម្ចាស់ក្រុមហ៊ុនជួល បានពិនិត្យមើលតាមប្រព័ន្ធ GPS ឃើញម៉ូតូនោះកំពុងធ្វើដំណើរនៅភ្នំពេញ ទើបប្តឹងរាយការណ៍មកសមត្ថកិច្ចតែម្តង ។
បើតាមសមត្ថិច្ចបានបញ្ជាក់ថា បន្ទាបពីទទួលបានបណ្តឹងពីជនរងគ្រោះ កម្លាំងនគរបាលព្រហ្មទណ្ឌកម្រិតស្រាល របស់ខេត្តសៀមរាប បានទំនាក់ទំនង សហការណ៍ជាមួយកម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃ ធ្វើការប្រម៉ាញ់តាមចាប់បានជនសង្ស័យជនជាតិចិនទាំង២នាក់ និងម៉ូតូ ជាត់ស្តែងតែម្តង ក្នុងទឹកដីខេត្តកណ្ដាល ។
ក្រោយចាប់ខ្លួន សមត្ថកិច្ចឆែកឆេររកឃើញវត្ថុតាងមាន៖ ឧបករណ៍គាស់ទូរដែក ឧបករណ៍កាច់សោរម៉ូតូ និងខ្សែភ្លើងសម្រាប់ប្រព្រឹត្តបទល្មើសផងដែរ ។ បច្ចុប្បន្នក្រុមជនសង្ស័យ ត្រូវសមត្ថកិច្ចកសាងសំណុំរឿងចាត់តាមនីតិវិធីច្បាប់៕
