រាជធានីភ្នំពេញ៖ លោកស្រី Angela Corcoran ឯកអគ្គរដ្ឋទូតអូស្រ្តាលីប្រចាំនៅកម្ពុជា បានអញ្ជើញទៅសួរសុខទុក្ខលោក កឹម សុខា ដល់គេហដ្ឋាន នារសៀល ថ្ងៃទី១២ ខែវិច្ឆិកា ឆ្នាំ២០១៩នេះ ដោយគ្រាន់តែសួរសុខទុក្ខធម្មតា គឺមិនបានពិភាក្សាអំពីរឿងនយោបាយនោះឡើយ ដោយសារតែលោក កឹម សុខា ត្រូវបានតុលាការហាមឃាត់សកម្មភាពនយោបាយ។
នេះបើតាមការឲ្យដឹងពីលោក មុត ចន្ថា ជាមនុស្សជំនិតរបស់ លោក កឹម សុខា ថ្លែងប្រាប់ក្រុមអ្នកសារព័ត៌មានបន្ទាប់ពីបញ្ចប់ជំនួបរវាង លោក កឹម សុខា និងអគ្គរដ្ឋទូតអូស្រ្តាលីប្រចាំនៅកម្ពុជា នៅគេហដ្ឋានរបស់លោក កឹម សុខា នារសៀល ថ្ងៃទី១២ ខែវិច្ឆិកា ឆ្នាំ២០១៩នេះ។
លោកមុត ចន្ថា បានបញ្ជាក់ថា ជំនួបលើកនេះក៏មុនខុសនឹងជំនួបមុនៗដែរ ដោយលោកស្រីអគ្គរដ្ឋទូតអូស្រ្តាលីបានមកសួរសុខទុក្ខលោក កឹម សុខា។ លោកបញ្ជាក់បន្តថា ភាគីទាំងពីរ ក៏មានបំណងចង់ជួយលើកកម្ពស់ស្ថានភាពនៅក្នុងប្រទេសកម្ពុជាផងដែរ។
លោក កឹម សុខា ត្រូវបានសាលាដំបូងរាជធានីភ្នំពេញ បានសម្រេចដាក់ឲ្យស្ថិតក្រោមការត្រួតពិនិត្យតាមផ្លូវតុលាការដដែល ប៉ុន្តែទទួលបានការបន្ធូរបន្ថយលក្ខខណ្ឌត្រួតពិនិត្យមួយចំនួន។ លក្ខខណ្ឌថ្មីនេះ រួមមាន៖ ១៖ មិនត្រូវចេញក្រៅព្រំប្រទល់ដែនដីនៃព្រះរាជាណាចក្រកម្ពុជា។ ២៖ មិនត្រូវធ្វើសកម្មភាពនយោបាយ និង៣៖ ត្រូវឆ្លើយតបនឹងការកោះហៅពីគ្រប់សមត្ថកិច្ច៕
