រាជធានីភ្នំពេញ ៖ ជនជាតិវៀតណាមម្នាក់ ជាជាងធ្វើសោផង ជាមុខសញ្ញាចោរលួចរថយន្ដផង ត្រូវកម្លាំងនគរបាលព្រហ្មទណ្ឌកម្រិតធ្ងន់តាមចាប់ខ្លួនបាន ក្រោយពីជនសង្ស័យបានធ្វើសកម្មភាពលួចរថយន្ដម៉ាក Prius ១គ្រឿង នៅភូមិស្វាយប៉ាក សង្កាត់ច្រាំងចំរេះ១ ខណ្ឌឫស្សីកែវ កាលពីថ្ងៃទី១១ វិច្ឆិកា ២០១៩នេះ ។
ជនសង្ស័យឈ្មោះ Phan Van Ho អាយុ២៩ឆ្នាំ ជនជាតិវៀតណាម កាន់លិខិតឆ្លងដែនលេខ C4563131 ចាប់ខ្លួនបានជាក់ស្ដែងតែម្ដង នៅផ្លូវ៣៧០ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ ។
ក្នុងប្រតិបត្តិការនេះ កម្លាំងនគរបាលព្រហ្មទណ្ឌ ដកហូតបាន ដែកកាច់សោររថយន្ត០១, ឧបករណ៍ផ្តាច់ប្រព័ន្ធ GPS ចំនួន០១គ្រឿង, ឧបករណ៍សម្រាប់តភ្ជាប់ជាមួយស្មាតឃី ចំនួន០១គ្រឿង, ដែកកាច់សោសូឡិច ចំនួន០១ និងរថយន្តរបស់ជនរងគ្រោះ ម៉ាក Prius ពណ៌ស ពាក់ស្លាកលេខភ្នំពេញ 2Y-8393 ។
បើតាមចម្លើយសារភាពរបស់ជនសង្ស័យ បានប្រាប់កម្លាំងជំនាញការិយាល័យព្រហ្មទណ្ឌកម្រិតធ្ងន់ អោយដឹងថា រូបគេពិតជាបានលួចរថយន្ដ Prius ពណ៌ស ពិតប្រាកដមែន ដោយជនជាតិវៀតណាមរូបនេះបញ្ជាក់ថា «សម្រាប់រថយន្ដប្រើប្រាស់សោស្មាតឃី ចាប់ពីស៊េរីឆ្នាំ២០០៩ ចុះក្រោម មិនពិបាកលួចនោះទេ គឺប្រើពេលត្រឹមតែ២នាទីប៉ុណ្ណោះ លួចបានសម្រេចហើយ ព្រោះជនសង្ស័យមានឧបករណ៍គ្រប់គ្រាន់ ទាំងឧបករណ៍ផ្ដាច់ GPS និងឧបករណ៍ភ្ជាប់ជាមួយសោស្មាតឃីគ្រប់ប្រភេទ ដែលសម្ភារទាំងនេះ រូបគេយកមកពីប្រទេសវៀតណាម ។
ជាមួយគ្នានេះដែរសមត្ថកិច្ច ក៏បានអោយដឹងដែថា ជនសង្ស័យជនជាតិវៀតណាមម្នាក់នេះ ជាមុខសញ្ញាគ្រោះថ្នាក់បំផុត អាចថាជាចោរជំនាញ ព្រោះរូបគេមានមុខរបរជាជាងសោ ហើយមានទាំងឧបករណ៍គ្រប់គ្រាន់ ដើម្បីប្រើប្រាស់សម្រាប់ធ្វើសកម្មភាព ពិសេសការលួចរថយន្ដដែលប្រើសោស្មាតឃី ។
បច្ចុប្បន្នជនសង្ស័យ ត្រូវបានសមត្ថកិច្ចជំនាញ កសាងសំណុំរឿង ដើម្បីបញ្ជូនទៅតុលាការផ្ដន្ទាទោសតាមច្បាប់ ៕