រាជធានីភ្នំពេញ ៖ ត្រឹមតែរយៈពេល២ថ្ងៃ មានប្រជាពលរដ្ឋដែលមកលេងព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នៅរាជធានីភ្នំពេញ មានអាការឈឺក្បាល វិលមុខ ជិត១ម៉ឺននាក់ ។
លោកវេជ្ជបណ្ឌឹត ងី មានហេង ប្រធានមន្ទីរសុខាភិបាលរាជធានីភ្នំពេញ បានឲ្យដឹងថា ក្នុងរយៈពេល២ថ្ងៃនៃព្រះរាជពិធីបុណ្យអុំទូក ឆ្នាំ២០១៩នេះ ក្រុមគ្រូពេទ្យបានពិនិត្យ និងព្យាបាលជំងឺ ជូនប្រជាពលរដ្ឋបានជិត១ម៉ឺននាក់ គឺនៅថ្ងៃទីមួយ មានចំនួន៤,០៨៨នាក់ និងថ្ងៃទីពីរ មានចំនួន៤,៩៤៨នាក់ ។ ក្នុងនោះសម្រាប់ថ្ងៃទី២អ្នករងរបួសចំនួន៥៥នាក់ និងអ្នកជំងឺ ត្រូវបញ្ជូនទៅមន្ទីរពេទ្យចំនួន៥នាក់ ។ ប្រជាពលរដ្ឋភាគច្រើន មានអាការដូចជា ឈឺក្បាល វិលមុខ ផ្តាសាយ អស់កម្លាំង ចុករាគ និងខ្យល់ចាប់ ។
លោកបន្ថែមថា ដោយមានការណែនាំពីក្រសួងសុខាភិបាល និងអភិបាលរាជធានីភ្នំពេញ មន្ទីរសុខាភិបាលរាជធានីភ្នំពេញ បានពង្រាយស្តង់សុខាភិបាល តាមគោលដៅទីតាំងសេវាសុខាភិបាល ដែលមានក្រុមគ្រូពេទ្យរង់ចាំជួយសង្គ្រោះចំនួន៨ស្តង់ និងសម្រាប់ពិនិត្យ និងសង្គ្រោះបឋមដល់ប្រជាពលរដ្ឋ មានរថយន្តសង្គ្រោះប្រចាំការចំនួន១៣ក្រុម ដែលមានក្រុមគ្រូពេទ្យសរុបជិត៨០០នាក់ ប្រចាំការប្តូរវេនគ្នា ដើម្បីជួយពិនិត្យ ព្យាបាលជំងឺ ក្នុងនោះក្រុមគ្រូពេទ្យចល័ត ដើម្បីអប់រំផ្សព្វផ្សាយអនាម័យចំណីអាហារ និងផ្សព្វផ្សាយទប់ស្កាត់ជំងឺអេដស៍ ដោយឥតគិតថ្លៃផងដែរ ៕