ហុងកុង ៖ យ៉ាងហោចណាស់បាតុករម្នាក់បានរងរបួសហូរឈាមដេកដួលលើថ្នល់ ដោយប៉ូលិសបាញ់ស្តែងៗតែម្តង នៅពេលមិនអាចរក្សាការអត់ធ្មត់ ទៅលើក្រុមបាតុករដែលតវ៉ាគ្មានថ្ងៃបញ្ចប់ រហូតឈាន់ដល់ការបង្ក្រាបដ៏ក្តៅគគុកឡើង ។
ប្រព័ន្ធផ្សព្វផ្សាយក្នុងស្រុកជាច្រើន បានចុះផ្សាយពីករណីបង្ក្រាបនៅភាគខាងកើត នៃកោះហុងកុងនេះ នាព្រឹកថ្ងៃទី១១ ខែវិច្ឆិកា ឆ្នាំ២០១៩នេះ ។
សកម្មភាពបាញ់ប្រហារនេះ ក៏ត្រូវបានក្រុមបាតុករធ្វើការផ្សាយផ្ទាល់(Live) នៅក្នុងបណ្តាញសង្គមហ្វេសប៊ុកផងដែរ ហើយត្រូវបានគេមើលឃើញថា មន្ត្រីប៉ូលិសហុងកុងមួយរូប បានប្រើប្រាស់កាំភ្លើង បាញ់ទៅលើបាតុករពាក់ម៉ាស់ម្នាក់ បណ្តាលឲ្យរងរបួស ដោយសារតែរូបគេ បានធ្វើការតវ៉ាបំពានលើបំរាម ខណៈការតវ៉ាក្នុងទីក្រុងស្វយ័តចិនមួយនេះ កំពុងពុះកញ្ជ្រោលកាន់តែខ្លាំងឡើងៗ ក្រោយការស្លាប់របស់និស្សិតម្នាក់ ដែលបានធ្លាក់ពីលើអគារមួយ កំឡុងការតវ៉ា កាលពីសប្តាហ៍មុន ហើយការបាញ់ប្រហារនេះ កាន់តែដុតកំហឹងបន្ថែមឡើងៗ ។
សូមជម្រាបថា ប្រមាណជាង៥ខែមកហើយ ដែលបាតុករធ្វើការតវ៉ានៅទីក្រុងហុងកុង បានផ្ទុះឡើង ដំបូងឡើយ ផ្តើមពីការរៀបចំសេចក្តីព្រាង នៃច្បាប់ធ្វើបត្យាប័នដែលបានបង្កឲ្យប្រជាជនហុងកុង ជាពិសេសបណ្តាក្រុមនិស្សិត មានការខឹងសម្បារ រហូតធ្វើការតវ៉ាឲ្យមានការលុបច្បាប់នេះចោលវិញ ហើយពួកគេក៏ទទួលបានជោគជ័យផងដែរ ។ ទោះបីជារដ្ឋបាលទីក្រុងហុងកុង បានដកថយអស់ជាច្រើនជំហាន ដើម្បីស្របតាមការចង់បានរបស់ក្រុមបាតុករក៏ដោយ ក៏បាតុកម្ម ហាក់គ្មានភាពស្ងប់ស្ងាត់នោះដែរ ព្រោះអ្វីដែលក្រុមបាតុករ បាននិងកំពុងទាមទារបន្ថែមទៀតនោះ គឺការលាលែងចេញពីតំណែងរបស់លោកអភិបាលក្រុង ខារី ឡាំ (Carrie Lam) ព្រមទាំងការរៀបចំបោះឆ្នោតជ្រើសរើស សមាជិកសភាក្រុងជាថ្មី ទៅតាមលក្ខខណ្ឌដែលក្រុមបាតុករកំណត់ទៀតផង ។
ទោះបីជាបែបនេះក្តី ទីក្រុងប៉េកាំងដែលមានសិទ្ធិអំណាចធំ លើទីក្រុងស្វយ័តមួយនេះ កាលពីសប្តាហ៍មុនបានបង្ហាញការគាំទ្រពេញទំហឹង ចំពោះការដឹកនាំរបស់លោកស្រី ខារី ឡាំ ជាពិសេស គឺចំណាត់ការដើម្បីបង្ក្រាបបាតុកម្មហិង្សា ដែលបំពានច្បាប់ ៕
