ខេត្តកោះកុង ៖ នារីបុគ្គលិកក្រុមហ៊ុនឯកជនម្នាក់ បានបែកគំនិតធ្វើសកម្មភាពលួចកេងបន្លំយកលុយរបស់ក្រុមហ៊ុនអស់ប្រមាណជាង១ម៉ឺនដុល្លារ លុះក្រុមហ៊ុនស៊ើបដឹង ក៏ប្តឹងនគរបាលព្រហ្មទណ្ឌកម្រិតស្រាលខេត្តកោះកុង ឱ្យជួយអន្តរាគមន៍ចាប់ខ្លួននាំយកទៅចាត់ការតាមច្បាប់ ។
នារីជាប់សង្ស័យមានឈ្មោះដាំ ចរិយា ហៅស្រីល័ក្ខ អាយុ២១ឆ្នាំ មុខបរបរបុគ្គលិកក្រុមហ៊ុនមង្គលរស្មីរតនៈ ត្រូវសមត្ថកិច្ចចាប់ឃាត់ខ្លួនកាលពីវេលាម៉ោង៨ព្រឹក ថ្ងៃទី០៨ ឆ្នាំ២០១៩ ។
បើតាមសមត្ថកិច្ចអោយដឹងថា នៅមុនពេលឈានដល់ការចាប់ឃាត់ខ្លួននារីវ័យក្មេងខាងលើ ការចាប់ខ្លួននារីសង្ស័យខាងលើធ្វើឡើងតាមពាក្យបណ្តឹងរបស់តំណាងក្រុមហ៊ុនមង្គលរស្មីរតនៈ ពីបទរំលោភលើទំនុកចិត្ត កេងបន្លំយកលុយក្រុមហ៊ុនចំនួន១៤,៤៨០ដុល្លារ កាលពីថ្ងៃទី០៦ វិច្ឆិកា ។
បច្ចុប្បន្ន ស្ត្រីសង្ស័យ ត្រូវបានកម្លាំងបញ្ជូនទៅឃុំខ្លួនបណ្តោះអាសន្ន នៅស្នងការដ្ឋាននគរបាលខេត្តកោះកុង ដើម្បីធ្វើការសាកសួរ និងកសាងសំណុំរឿងចាត់ការតាមនីតិវិធី ៕
