សៀមរាប ៖ នៅព្រឹកថ្ងៃទី៨ វិច្ឆិកា ២០១៩ នេះក្រុមការងារចម្រុះរដ្ឋបាលខេត្តសៀមរាប និងអាជ្ញាធរអប្សរា និងមន្ត្រីពាក់ព័ន្ធ បានចុះពិនិត្យ និងស្វែងរកមធ្យោបាយ ដើម្បីនេសាទកូនក្រពើ ដែលលោកជំទាវហ៊ុន ស៊ីណាត បានព្រលែងចូលក្នុងកសិន្ធុប្រាសាទអង្គរវត្ត ប៉ែកខាងកើត កាលពី៣ថ្ងៃមុននេះ ។
ដោយមានបញ្ជាផ្ទាល់ពីលោកអភិបាលនៃគណៈអភិបាលខេត្តសៀមរាប ក្រុមការងារចម្រុះរដ្ឋបាលខេត្ត អាជ្ញាធរអប្សរា មន្ទីរ អង្គភាពជំនាញពាក់ព័ន្ធ បានចុះដល់ទីតាំង និងបានពិនិត្យជាក់ស្ដែងរួចមក លោកនាយករដ្ឋបាលសាលាខេត្ត បានស្នើសុំអោយអាជ្ញាធរអប្សរា សហការជាមួយក្រុមការងារជលផល នៃមន្ទីរកសិកម្ម រុក្ខាប្រមាញ់ និងនេសាទ បន្តកិច្ចការតាមនេសាទកូនក្រពើនេះ ដែលមានបណ្ដោយប្រហែល៤០សង់ទីម៉ែត្រ ដោយប្រើប្រាស់កម្លាំងមន្ត្រីជំនាញតាមប្រមាញ់២៤ម៉ោង លើ២៤ម៉ោង ពិសេសពេលកូនក្រពើតូចនេះ ចេញរកចំណីនៅពេលយប់ តាមមាត់ច្រាំងនៃកសិន្ធុប្រាសាទអង្គរវត្ត ។
តាមការបញ្ជាក់របស់មន្ត្រីជំនាញថា កូនក្រពើនេះ នៅតូចមិនទាន់ចល័តចេញពីកសិន្ធុ អង្គរនេះនៅឡើយទេ។ មន្ត្រីជំនាញ នឹងប្រើប្រាស់មធ្យោបាយនេសាទ ចាប់យកមកវិញ ដោយការដាក់សន្ទូច ឬការអូសមង ឬការឆ្លុះនឹងកែឆ្លុះចាប់នៅពេលយប់ ។
វគ្គនេសាទកូនក្រពើ ដោយអាជ្ញាធរចម្រុះកំពុងដុតដៃដុតជើងតាមចាប់កូនក្រពើ ២៤ម៉ោងលើ២៤ម៉ោងនេះបន្ទាប់ពីលោកជំទាវ ហ៊ុន ស៊ីណាត បានបង្ហោះវីដេអូនៅលើហ្វេសប៊ុក នូវសកម្មភាពរបស់លោកជំទាវ យកកូនក្រពើ១ក្បាល ទៅព្រលែងចូលក្នុងទឹកនៅទក្សិណអង្គរ បំណងឲ្យសត្វក្រពើនោះ កាន់ធម៌អាថ៌ ប៉ុន្តែប្រជាពលរដ្ឋមានការបារម្ភខ្លាចមានគ្រោះថ្នាក់ នៅពេលសត្វក្រពើនោះពេលវាធំឡើង ។
បន្ទាប់ពីបង្ហោះវីដេអូនោះ ធ្វើអោយមហាជនរិះគន់យ៉ាងច្រើន និងបង្ហាញក្តីបារម្ភយ៉ាងខ្លាំង ភ្លាមៗលោកជំទាវ ក៏បានលុបវីដេអូនោះវិញផងដែរ ថ្វីបើលុបផុសនឹងក៏ដោយ ក៏កូនក្រពើ កំពុងនៅក្នុងទក្សិណនៅឡើយ ។
បើយោងតាមគណនីហ្វេសប៊ុករបស់លោកជំទាវ ហ៊ុន ស៊ីណាត បានសរសេរសារនៅថ្ងៃទី៨ វិច្ឆិកានេះថា «ថ្ងៃនេះ មានអ្នកជេរខ្ញុំច្រើន ដោយសាព្រលែងក្រពើ អ្នកដែលជេរខ្ញុំសូមអនុមោទនាទទួលយកទាំងអស់ តែក្មេងស្ទូចបានទីនោះ ខ្ញុំទិញវាព្រលែងវិញទៅ ។ ម្យ៉ាងទៀត ខ្លួនខ្ញុំ មិនបានឃើញបម្រាមហាមឃាត់មិនឲ្យលែង កូនត្រី កូនក្រពើនោះទេ ។