កម្លាំងនគរបាលនាយកដ្ឋានប្រឆាំងបទល្មើសបច្ចេកវិទ្យា ចុះបង្ក្រាបទីតាំងបង្កើតល្បែងភ្នាល់ casino online÷
រាជធានីភ្នំពេញ ៖ សមត្ថកិច្ចចុះបង្ក្រាបករណី ល្បែងកាសស៊ីណូអនឡាញខុសច្បាប់ (casino online) មួយកន្លែង ត្រង់ចំណុចផ្ទះលេខ ១០ ផ្លូវលេខ៤ ស្ថិតភូមិបឹងឈូក សង្កាតនិរោធ ខណ្ឌច្បារអំពៅ រាជធានីភ្នំពេញ កាលពីថ្ងៃទី៥ វិច្ឆិកា ២០១៩ ដោយទីតាំងនេះមានម្ចាស់ឈ្មោះ គីម អានស្រីនាថ ភេទស្រី អាយុ២១ឆ្នាំ ជនជាតិខ្មែរ មានមុខរបរ បកប្រែភាសាចិន ។
ករណីបង្ក្រាបល្បែងអនឡាញខុសច្បាប់នេះ មន្ត្រីជំនាញធ្វើការស្រាវជ្រាវ និងតាមដានរកមុខសញ្ញា ក្រុមបើកល្បែងកាស៊ីណូ តាមបណ្ដាញទូរស័ព្ទ និងតាមប្រព័ន្ធអ៊ីនធឺណិត បន្ទាប់ពីបើកការស្រាវជ្រាវរួចមក កម្លាំងជំនាញ របស់នាយកដ្ឋានប្រឆាំងបទល្មើសបច្ចេកវិទ្យា បានកំណត់មុខសញ្ញា និងទីតាំងជនសង្ស័យ និងដោយមានការចូលរួមដឹកនាំពីលោក សេង ហៀង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ព្រមទាំងកម្លាំងនគរបាលខណ្ឌច្បារអំពៅ កម្លាំងជំនាញរបស់នាយកដ្ឋានប្រឆាំងបទល្មើសបច្ចេកវិទ្យា បានបើកប្រតិបត្តិការចុះឃាត់ខ្លួន ជនសង្ស័យជាជនជាតិម៉ាឡេស៊ីចំនួន០៤នាក់ ដែលជាអ្នកគ្រប់គ្រង និងអនុវត្តប្រតិបត្តិការ Casino Online ព្រមទាំងរឹបអូសបានសម្ភារៈសម្រាប់ផ្សព្វផ្សាយ ដែលមានកុំព្យូទ័រ និងទូរស័ព្ទជាច្រើនគ្រឿង ។
បច្ចុប្បន្នជនសង្ស័យ និងវត្ថុតាង កំពុងត្រូវបានរៀបចំកសាងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់ ។
សូមបញ្ជាក់ផងដែរថា កន្លងមកប្រជាពលរដ្ឋដែលបានប្រើប្រាស់ទូរស័ព្ទចល័ត តែងតែទទួលបាននូវសារអូសទាញតាមហ្វេសប៊ុក ឲ្យលេងល្បែងភ្នាល់អនឡាញជាច្រើនប្រភេទ ដែលជាអំពើផ្ទុយនឹងច្បាប់ ។
លោកឧត្តមសេនីយ៍ឯក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យា បានអំពាវនាវឲ្យប្រជាពលរដ្ឋខ្មែរ ប្រសិនបើបងប្អូនទទួលបាននូវសារតាមទូរស័ព្ទ ឬបណ្ដាញសង្គមហ្វេសប៊ុក ដើម្បីចូលរួមលេងល្បែងភ្នាល់ផ្សេងៗនោះត្រូវរាយការណ៍មក នាយកដ្ឋានប្រឆាំងបទល្មើសបច្ចេកវិទ្យាជាបន្ទាន់ (តាមរយៈផេកហ្វេសប៊ុក) ដើម្បីសមត្ថកិច្ច ធ្វើការស្រាវជ្រាវបង្ក្រាបទាន់ពេលវេលា ៕
