កូឡាំពួរ ៖ ប៉ូលិសអន្តោប្រវេសន៍ម៉ាឡេស៊ី បានឃាត់ខ្លួនអ្នកស្រី មូរ សុខហួរ នៅព្រលានយន្តហោះ វេលាជិតពាក់កណ្តាលអាធ្រាត្រថ្ងៃទី៦ វិច្ឆិកា ២០១៩ បន្ទាប់ពីអ្នកស្រីបានធ្វើដំណើរចេញពីឥណ្ឌូណេស៊ី ទៅកាន់ម៉ាឡេស៊ី នេះបើយោងតាមការចុះផ្សាយរបស់ទីភ្នាក់ងារ Reuters នៅព្រឹកថ្ងៃទី៧ វិច្ឆិកានេះ ។
បច្ចុប្បន្នអ្នកស្រី មូរ សុខហួរ អតីតអនុប្រធានអតីតគណបក្សសង្គ្រោះជាតិ កំពុងត្រូវបានរក្សាទុកក្នុងបន្ទប់ជនអន្តោប្រវេសន៍ នៅអាកាសយានដ្ឋានក្នុងទីក្រុងគូឡាឡាំពួ ។
ជុំវិញការឃាត់ខ្លួនអ្នកស្រីនៅម៉ាឡេស៊ីនេះ ភ្លាមៗគេមិនទាន់ដឹងថា អាជ្ញាធរម៉ាឡេស៊ី នឹងបញ្ជូនអ្នកស្រីទៅទីណានោះទេ ។ ប៉ុន្តែបើតាមមន្ត្រីគណៈកម្មាធិការសិទ្ធិមនុស្សម៉ាឡេស៊ី ប្រាប់ទីភ្នាក់ងារ Reuters ថា អ្នកស្រីនឹងមិនត្រូវបានបញ្ជូនទៅកម្ពុជាឡើយ ។ យ៉ាងណាអាជ្ញាធរម៉ាឡេស៊ី អាចនឹងបញ្ជូនអ្នកស្រី ទៅកាន់សហរដ្ឋអាមេរិកវិញ ដោយសារតែអ្នកស្រីបានប្រើប្រាស់លិខិតឆ្លងដែនអាមេរិក ។
កាលពីចុង ខែតុលា ប្រទេសថៃ ដែលជាប្រទេសជិតខាងរបស់កម្ពុជាក៏ធ្លាប់បានរារាំងមិនឲ្យអ្នកស្រី ធ្វើដំណើរចូលប្រទេសថៃ ផងដែរ ។
ហើយនៅថ្ងៃទី៥ ខែវិច្ឆិកា ឆ្នាំ២០១៩ អាជ្ញាធរម៉ាឡេស៊ី ក៏បានចាប់ឃាត់ខ្លួនសកម្មជនអតីតគណបក្ស CNRP ចំនួន២នាក់ផងដែរ ខណៈដែលពួកគេព្យាយាមឡើងយន្តហោះ ពីម៉ាឡេស៊ី ទៅកាន់ថៃ អាជ្ញាធរម៉ាឡេស៊ី ឃាត់ខ្លួនសកម្មជនអតីតបក្សប្រឆាំង២នាក់ បញ្ជូនមកកម្ពុជា ៕
