ប្រជាពលរដ្ឋខ្មែរ ដែលប្រើប្រាស់រថយន្តនៅលើដងផ្លូវ បានផ្ទុះការរិះគន់ជាបន្តបន្ទាប់ ទៅលើសមត្ថកិច្ចត្រួតពិនិត្យ ពិសេសប៉ូលិសចរាចរណ៌ និងក្រសួងសាធារណការ និងដឹកជញ្ជូនតែម្តង ព្រោះថា រថយន្តរបស់ពួកគាត់ មានឯកសារបិទនៅលើកញ្ចក់រថយន្តត្រឹមត្រូវហើយ បែរជារងនូវការផាកពិន័យទៀត ក្នុងហេតុផលថា គ្មានឯកសារច្បាប់ដើមតាមខ្លួនទៅវិញ ធ្វើអោយមហាជនដែលជាអ្នកនិយមប្រើប្រាស់បណ្ដាញសង្គមហ្វេសប៊ុសម្តែងការហួសចិត្តយ៉ាងខ្លាំង ។
ជាក់ស្តែងនៅថ្ងៃទី០៥ ខែវិច្ឆិកា ឆ្នាំ២០១៩ម្សិលមិញនេះ បើតាមគណនីហ្វេសប៊ុកឈ្មោះ Kim Vang បានបង្ហោះវីដេអូឃ្លីបមួយ បង្ហាញអារម្មណ៍ហួសចិត្តនឹងសមត្ថកិច្ចខេត្តព្រះសីហនុ ដែលធ្វើការផាកពិន័យ ទោះបីមានចុះបញ្ជីរថយន្តរថយន្តរបស់លោក មានទាំងកាតគ្រី និងត្រួតពិនិត្យបច្ចេកទេសត្រឹមត្រូវយ៉ាងណាក៏ដោយ ក៏សមត្ថកិច្ចនៅតែផាកពិន័យ៦ម៉ឺនរៀល ដោយសារតែមិនបានយកវិញ្ញាបណ្ណបត្រត្រួតពិនិត្យបច្ចេកទេសរថយន្តច្បាប់ដើមមកតាមខ្លួន ទោះបីមានបិទតែមឆៀករថយន្តបិទលើកញ្ចក់ទៅតាមផ្លូវច្បាប់របស់ក្រសួងសាធារណការ និងដឹកជញ្ចូន ហើយក្តី ។ អ្វីដែលចាប់អារម្មណ៏ខ្លាំងនោះ គឺសមត្ថកិច្ចបានប្រាប់វិញថា «តែមឆៀករថយន្តលើកញ្ចក់នឹងអត់មានប្រយោជន៍ទេ បងចង់បកចោល! ក៏បកទៅ ស្រេចតែចិត្តបងឯងតើ!» ។
លោក Kim Vang មានការងឿងឆ្ងល់ដែរថា តើតែមឆៀកឡានដែលបិទនៅលើកញ្ចក់នោះ វាមានន័យអ្វីទៅ ហើយដាក់ QR Code ដើម្បីអ្វី ? បើសមត្ថកិច្ចនៅតែចាប់ផាកពិន័យដដែលនោះ ?
ដោយឡែកកាលពីថ្ងៃទី២៨ តុលា កន្លងទៅនេះ ករណីដូចគ្នានេះដែរ មានគណនីហ្វេសប៊ុកឈ្មោះ Sreng Sovuthy បានបង្ហោះថា ៖ «រាល់ឯកសារដែលបិទនៅលើកញ្ចក់រថយន្ត មិនបាច់បិទទេ ព្រោះអីលោកប៉ូលីស គាត់អត់មើលទេ គាត់ចង់បានឯកសារច្បាប់ដើម បើអត់មានយកទៅតាមខ្លួនទេ ត្រូវគាត់ផាកពិន័យហើយ អញ្ចឹងមិនបាច់បិទទេបកចោលទៅ យកតែឯកសាររថយន្តដាក់តាមខ្លួនទៅបានហើយ (ប៉ូលីសខេត្តបាត់ដំបង) សួររកអាជីវកម្ម អត់មាន៥០,០០០រៀល» ។
សូមទស្សនាវីដេអូ មនាដូចខាងក្រោម ៖