តាមរយៈហ្វេសប៊ុករបស់រដ្ឋមន្ត្រីក្រសួងព័ត៌មាន លោកខៀវ កាញារីទ្ធ បានបង្ហោះសារអោយដឹងនៅព្រឹកថ្ងៃទី៤ វិច្ឆិកា ២០១៩នេះថា ទាហានថៃ តាមព្រំដែនចាប់ផ្តើមបិទរូបថតមនុស្សមិនត្រូវស្វាគមន៍មួយចំនួន ។
ក្រៅពីច្រកព្រំដែនថៃ-កម្ពុជា រូបថតអតីតមន្ត្រីជាន់ខ្ពស់គណបក្សសង្គ្រោះជាតិមួយចំនួន ត្រូវបានបិទនៅតាមច្រកព្រំដែនថៃ-ម៉ាឡេស៊ី ផងដែរ ដើម្បីតាមចាប់ខ្លួន ។ រូបថតទាំងនេះ ដោយបិទផ្ទាំងជាប់គ្នា រួមមាន លោក សម រង្ស៊ី, លោក អេង ឆៃអ៊ាង, អ្នកស្រី មូរ សុខហួរ ព្រមទាំងមានមន្ត្រីជាន់ខ្ពស់ផ្សេងទៀត ដូចជា លោក ហូរ វ៉ាន់ លោក អ៊ូ ច័ន្ទឫទ្ធិ លោក ម៉ែន សុថាវរិន្ទ្រ លោក ឡុង រី និងលោក តុ វ៉ាន់ចាន់ ជាដើម ។
ទោះបីជាថ្ងៃកំណត់នៃការវិលត្រឡប់របស់លោក សម រង្ស៊ី កាន់តែខិតជិតមកដល់ក៏ដោយ រដ្ឋាភិបាលនៅតែបើកចំហព្រំដែន រវាងកម្ពុជានិង ប្រទេសថៃដដែល ដោយកម្លាំងចម្រុះរួមមាននគរបាល កងរាជអាវុធហត្ថ និងទាហាន បានចាប់ផ្តើមយាមកាមនៅទីតាំងក្បែរព្រំដែនប្រទេសថៃ និងច្រកព្រំដែនតូចៗ ក៏ដូចជាខ្សែបន្ទាត់ព្រំដែននានា ៕