រាជធានីភ្នំពេញ ៖ កម្ពុជារហូតមកដល់បច្ចុប្បន្ននេះ លក់ឥណទានកាបូន បានជាង១១លានដុល្លារអាមេរិក ពីដែនជម្រកសត្វព្រៃដែលមាននៅទូទាំងប្រទេស ដែលធានាដល់កិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការអភិវឌ្ឍដោយចីរភាព ។
លោក សាយ សំអាល់ រដ្ឋមន្ត្រីក្រសួងបរិស្ថាន មានប្រសាសន៍បែបនេះនៅក្នុងពិធីបើក «សន្និបាតបូកសរុបលទ្ធផលការងារបរិស្ថានឆ្នាំ២០១៩ និងលើកទិសដៅការងារឆ្នាំ២០២០» របស់ក្រសួងបរិស្ថាន នៅថ្ងៃទី៤ វិច្ឆិកា ២០១៩នេះ ។
លោករដ្ឋមន្ត្រីក្រសួងបរិស្ថានបានបញ្ជាក់ថា ឥណទានកាបូនដែលបានលក់នេះ មានប្រភពមកពីដែនជម្រកសត្វព្រៃកែវសីមា ដែនជម្រកសត្វព្រៃព្រៃឡង់ ស្ថិតក្នុងភូមិសាស្ត្រខេត្តស្ទឹងត្រែង ដែនជម្រកសត្វព្រៃក្រវ៉ាញខាងត្បូង និងដែនជម្រកសត្វព្រៃតាតៃ ក្រោមក្របខណ្ឌទីផ្សារស្ម័គ្រចិត្តសម្រាប់ទ្រទ្រង់ដល់ការការពារ និងអភិរក្សបរិស្ថាន និងធនធានធម្មជាតិ ក៏ដូចជាជួយលើកម្ពស់ជីវភាពរបស់ប្រជាសហគមន៍មូលដ្ឋាន ដែលឆ្លើយតបទៅនឹងគោលការណ៍ហិរញ្ញប្បទាននិរន្តរភាព ។
ថ្លែងនៅក្នុងពិធីបើកសន្និបាតបូកសរុបលទ្ធផលការងារបរិស្ថានឆ្នាំ២០១៩ និងលើកទិសដៅការងារឆ្នាំ២០២០ របស់ក្រសួងបរិស្ថាន នៅថ្ងៃទី៤ ខែវិច្ឆិកានេះ ឯកឧត្តមរដ្ឋមន្ត្រី បានបញ្ជាក់ថា នេះគឺជាអត្ថប្រយោជន៍ជាក់ស្តែង ដែលកើតចេញពីកិច្ចខិតខំប្រឹងប្រែង ក្នុងការគ្រប់គ្រងតំបន់ការពារធម្មជាតិបានល្អប្រសើររបស់ក្រសួងបរិស្ថាន និងក្រុមប្រឹក្សាជាតិអភិវឌ្ឍន៍ដោយចីរភាព ជាមួយដៃគូអភិវឌ្ឍន៍ជាតិ និងអន្តរជាតិ មានដូចជា កិច្ចសហប្រតិបត្តិការល្អជាមួយអង្គការសមាគមអភិរក្សសត្វព្រៃ ហៅកាត់ WCS អង្គការអភិរក្សអន្តរជាតិ ហៅកាត់ CI និងអង្គការសម្ព័ន្ធមិត្តសត្វព្រៃផ្តល់ការការពារដល់ព្រៃឈើនិងសត្វព្រៃ ហៅកាត់ Wildlife Alliance ជាដើម។
បើតាមអ្នកជំនាញមកពីអង្គការ WCS បានឲ្យដឹងថា ប្រភេទព្រៃឈើដែលអាចស្តុកកាបូនបានច្រើន គឺជាប្រភេទព្រៃឈើធម្មជាតិ ហើយព្រៃឈើ ត្រូវបានបែងចែកជា៣ប្រភេទ គឺព្រៃស្រោង ពាក់កណ្តាលស្រោង និងព្រៃរបោះ ក្នុងប្រភេទព្រៃស្រោង មានកាបូនស្តុកច្រើនជាងគេ ។ អ្នកជំនាញរូបនេះ បានបញ្ជាក់ថា ក្នុងមួយហិកតានៃព្រៃស្រោង មានផ្ទុកកាបួនប្រមាណ៧០០តោន ចំណែកឯប្រភេទព្រៃរបោះមានផ្ទុកកាបូនប្រមាណ៥០០តោន ។
គួររំឭកថា កាលពីឆ្នាំ២០១៦ ស្ថិតក្រោមកម្មវិធីការកាត់បន្ថយការបំភាយឧស្ម័នដោយសារការកាប់បំផ្លាញព្រៃឈើ និងការខូចខាត ឬ REDD+ ដែលគាំទ្រដោយអង្គការសហប្រជាជាតិ ក្រុមហ៊ុន Walt Disney បានទិញឥណទានកាបូនពីកម្ពុជា ក្នុងតម្លៃ២លាន៦សែនដុល្លារ នៅក្នុងព្រៃក្នុងខេត្តមណ្ឌលគិរី ដែលស្មើនឹងតម្លៃការបំភាយកាបូនប្រមាណ៣៦ម៉ឺនតោន ៕