ប្រិយមិត្តប្រហែលជាជ្រាបរួចហើយ ស្របពេលដែលថ្ងៃទី០១ ខែវិច្ឆិកា ២០១៩ ជាថ្ងៃចូលរោងការរបស់សកម្មជនហ្វេសប៊ុក លោក ផែ សុវណ្ណារិទ្ធ និងកញ្ញា ធី សុវណ្ណថា នៅទឹកដីខេត្តកោះកុង ស្រាប់តែ ផ្ទុះនូវការភ្ញាក់ផ្អើលយ៉ាងខ្លាំងមួយលើទំព័រហ្វេសប៊ុករបស់លោក ហេង ឡុង បានទម្លាយនូវនារីម្នាក់ចេញមុខអះអាងថា ជាអតីតប្រពន្ធរបស់កូនកំលោះគឺលោក ផែ សុវណ្ណារិទ្ធ ទៅវិញ ។
ហ្វេសប៊ុករបស់លោក ហេង ឡុង ដដែលបានភ្ជាប់ទាំងវីដេអូជាង៤នាទី បានបង្ហាញការលេចធ្លាយនូវស្ត្រីជាអ្នកសិល្បៈមួយរូប បានទាក់ទងមកកាន់លោក ហេង ឡុង ទាំងទឹកភ្នែកស្រែកយំឡាំប៉ា តវ៉ាព្រហ្មលិខិតថា លោក ផែ សុវណ្ណារិទ្ធ ជាអតីតប្ដីរបស់ខ្លួនដែលរស់នៅរួមគ្នារាប់សិបឆ្នាំស្គាល់អស់រសជាតិជីវិត ទាំងក្ដៅ និងត្រជាក់ ហើយការលើកឡើងនេះទៀតសោតត្រូវធ្វើឡើងចំថ្ងៃមង្គលជ័យរបស់ លោក ផែ សុវណ្ណារិទ្ធ និងកញ្ញា ធី សុវណ្ណថា ។
ក្នុងវីដេអូនោះដែរ លោក ហេង ឡុង ក៏បានផ្តល់យោបល់ទៅកាន់ស្ត្រីឈ្មោះយ៉ា ត្រូវមានភស្តុតាងបញ្ជាក់អោយច្បាស់ មុននឹងចោទប្រកាន់ចំពោះនរណាម្នាក់ ហើយលោកសន្យាក៏នឹងជួយផងដែរ ប្រសិនបេីរឿងនេះជាការពិតនោះ ពិសេសលោកធានាដោះស្រាយជូនប្រកបដោយភាពយុត្តិធម៌គ្មានយោគយល់ប្រសិនមានភស្ដុតាងច្បាស់លាស់ ។
ទន្ទឹមនឹងរឿងរ៉ាវខាងលើនេះដែរ លោក ផែ សុវណ្ណារិទ្ធ បានចេញធ្វើការបញ្ជាក់តាមរយៈលោក ហេង ឡុង អោយដឹងថា «លោកសុំធ្វើបដិសេធទាំងស្រុង ចំពោះព័ត៌មានមួយនេះ គឺវាមិនមែនជាការពិតនោះទេ ហេីយចំពោះករណីមួយនេះ បានធ្វើឲ្យមានការប៉ះពាល់ដល់កិត្តិយសរបស់លោក និងភរិយាលោកជាខ្លាំង ។ បន្ថែមទៀតនោះ លោក ផែ សុវណ្ណារិទ្ធ ក៏មានបំណងចង់ជួបផ្ទាល់ជាមួយនឹងស្ត្រីរូបនេះផងដែរ និងសង្ឃឹមទៅលើផ្លូវច្បាប់ ដើម្បីបញ្ជាក់ភាពស្អាតស្អំជូនក្រុមគ្រួសារ ពិសេសភរិយារបស់លោកតែម្ដង ។
ស្របពេលដែលសាមីខ្លួនបានបង្ហាញជំហរបដិសេធ នៅម៉ោង១០និង៣១នាទីយប់ថ្ងៃទី៣ វិច្ឆិកា ២០១៩នេះ អ្នកនាង ធី សុវណ្ណថា ព្រមានប្តឹងលោក ហេង ឡុង ដោយទុកពេលអោយត្រឹម២៤ម៉ោង ត្រូវបង្ហាញមុខនារីម្នាក់ដែលវាយប្រហារនាងនៅថ្ងៃរៀបការ ។
ដោយអ្នកនាងចេញសារថា ៖ “សារព្រមាន ខ្ញុំទុកពេលឲ្យលោក ហេង ឡុង២៤ម៉ោង បង្ហាញមុខនារីម្នាក់ដែលវាយប្រហារខ្ញុំថ្ងៃរៀបការ បើនាងមិនចេញមុខទេ ខ្ញុំនឹងប្តឹងលោក ហេង ឡុង ករណីបង្កើតព័ត៌មានក្លែងក្លាយ បរិហាកេរ្តិ៍…” ។ និង “៤ថ្ងៃហើយ ស្រីម្នាក់វាយប្រហារខ្ញុំ ថ្ងៃរៀបការ មិនទាន់ចេញមុខទេ
នាងឆាប់ចេញមក កុំនៅយូពេក នាងមិនរួចខ្លួនទេ លោក ហេង ឡុង ក៏មិនរួចខ្លួនដែរ…” ។
ប្រភពគួរទុកចិត្តមួយគឺលោក ឃឿន សឡា ដែលគេស្គាល់ថា K០១ បានចូលទៅខមិន(Comment) នៅលើហ្វេសប៊ុកនោះថា «ខន្តីណព្វគាត់ធ្វើលេងទេ កុំប្រកាន់ តែរៀងជ្រុលតិច.. បាទ គាត់សម្តែងតើ» ។
ប្រសិនដូចតាមការអះអាងរបស់លោកK០១ មែន មហាជនអ្នកលេងនៅលើបណ្ដាញសង្គមហ្វេសប៊ុក ឆ្ងល់ថា ហេតុអីបង្កើតរឿងនេះ ចំថ្ងៃជ័យមង្គល បែបនេះទៅវិញ ?
