ខេត្តកណ្តាល ៖ ជនសង្ស័យម្នាក់ត្រូវ កម្លាំងនគរបាលកំរិតស្រាលនៃស្នងការដ្ឋាននគរបាលខេត្តកណ្តាលសហការជាមួយនគរបាលខេត្តបន្ទាយមានជ័យ ធ្វើការឃាត់ខ្លួន បន្ទាប់ពីទទួលពាក្យបណ្តឹងពីជនរងគ្រោះ ក្រោយពីជនសង្ស័យរូបនេះ ខឹងនារីរងគ្រោះសុំបែកទៅរៀបការជាមួយអ្នកថ្មី ទើបយករូបថតអាក្រាតកាយរបស់នាងទៅបង្ហោះចែកចាយលើបណ្តាអសង្គមហ្វេសប៊ុក ។
ប្រភពពីសមត្ថកិច្ច បានឲ្យដឹងនៅថ្ងៃទី៣ វិច្ឆិកា នេះថា បន្ទាប់ពីទទួលបានពាក្យបណ្តឹងភ្លាម កម្លាំងសមត្ថកិច្ចខេត្តកណ្ដាល បានចុះស្រាវជ្រាវប្រើរយ:ពេល៣ថ្ងៃ រហូតកំណត់មុខសញ្ញាបាន និងសហការជាមួយនគរបាលខេត្តបន្ទាយមានជ័យ ចុះឃាត់ខ្លួនជនសង្ស័យតែម្តង ។
ជនសង្ស័យមានឈ្មោះ លឹម សេងហៀង ភេទប្រុស អាយុ២៧ឆ្នាំ មានទីលំនៅភូមិឯកភាព ឃុំថ្មពួក ស្រុកថ្មពួក ខេត្ដបន្ទាយមានជ័យ ។ ចំណែកជនរងគ្រោះឈ្មោះ ជ.ល.ដ ភេទស្រី អាយុ២០ឆ្នាំ មានទីលំនៅស្រុកកោះធំ មុខរបរបុគ្គលិកកាស៊ីណូ ។
ប្រភពពីសមត្ថកិច្ច បន្តឲ្យដឹងថា កាលពីកំឡុងខែកញ្ញា ២០១៨ ឈ្មោះ លឹម សេងហៀង បានទំនាក់ទំនងស្រលាញ់គ្នាជាមួយនារីរងគ្រោះ និងបានរស់នៅជាមួយគ្នាបានរយៈពេលប្រហែល៣ខែ ។ រហូតដល់កំឡុងខែមេសា ឆ្នាំ២០១៩ នាងបានសុំផ្តាច់ទំនាក់ទំនងស្នេហា ជាមួយឈ្មោះ លឹម សេងហៀង ព្រោះនាងមានបំណងរៀបការជាមួយអ្នកផ្សេង ប៉ុន្ដែឈ្មោះលឹម សេងហៀង មិនព្រមបែកគ្នា ហើយបានគំរាមកំហែងជនរងគ្រោះថា នឹងយករូបដែលខ្លួនថតទុកនោះ បង្ហោះតាមប្រព័ន្ធហ្វេសប៊ុក ហើយឲ្យគេឯងមើលទៀតផង ។
បន្ទាប់មកឈ្មោះ លឹម សេងហៀង ក៏បានផ្ញើរូបអាក្រាតកាយ របស់ជនរងគ្រោះ ទៅឲ្យបងប្អូន និងមិត្តភ័ក្តរបស់នាងមើល ហើយឈ្មោះ លឹម សេងហៀង នៅតែ បន្ដចែកចាយរូបអាក្រាតកាយរបស់នារីរងគ្រោះ រួមទាំងរូបរបស់អ្នកទាំងពីរធ្លាប់ដេកជាមួយគ្នាទៀត ទៅតាមរយៈឆាត ក្នុងគ្រុបផ្សេងៗជាច្រើនទៀត ។ ដោយជនសង្ស័យប្រើគណនីហ្វេសបុកច្រើន រួមមាន៖ ទី១.លឹម សេងហៀង ប្ដូរទៅ លោក ព្រះ ទី២.អ្នកក្លាហាន បង្ហុយផ្សែង យកឃ្មុំលើភ្នំទឹកកក ទី៣.Bro Heang ទី៤.Heang Bmc ទី៥.Bro Net ទី៦.Hea Heang ទី៧.Thai khmer ទី៨.Bro Dy ទី៩.Bro Oun ទី១០.Acc Ort Banka និងទី១១.Oun Nich ។
តាមចម្លើយសារភាពរបស់ឈ្មោះ លឹម សេងហៀង បានឲ្យដឹងថា ខ្លួនពិតជាបានស្រលាញ់ រស់នៅជាមួយជនរងគ្រោះ និងបានថតរូបអាក្រាតកាយ របស់ជនរងគ្រោះទុកជាច្រើន។ ដោយសារតែជនរងគ្រោះ ព្យាយាមសុំបែកគ្នា ទើបខ្លួនសម្រេចចិត្ដផ្ញើរូបអាក្រាតកាយរបស់ជនរងគ្រោះ ទៅឲ្យបងប្អូន មិត្ដភក្តិនៅក្នុងគ្រុបផ្សេងៗទៀតបានមើល ដើម្បីឲ្យខូចកិត្ដិយស កេរ្ដិ៍ឈ្មោះ ក្នុងបំណងឲ្យជនរងគ្រោះ មករស់នៅជាមួយខ្លួនវិញ ។
បច្ចុប្បន្ន កម្លាំងជំនាញកំពុងកសាងសំណុំរឿងរបស់ជនសង្ស័យ បញ្ជូនទៅសាលាដំបូងខេត្តកណ្តាលហើយនៅព្រឹកថ្ងៃទី៣ វិច្ឆិកា ២០១៩ នេះ ៕
