រាជធានីភ្នំពេញ ៖ លោកស្រី មូរ សុខហួរ ជាអតីតអនុប្រធានគណបក្សសង្គ្រោះជាតិ បានបញ្ជាក់ប្រាប់អាស៊ីសេរី កាលពីថ្ងៃទី២២ ខែតុលា ម្សិលមិញនេះថា អាជ្ញាធរថៃហាមឃាត់អ្នកស្រីមិនឲ្យចូលទឹកដីថៃ គឺជារឿងពិតប្រាកដមែន ។
ទោះយ៉ាងនេះក្តីលោកស្រីអះអាងថា លោកស្រីជឿលើឥទ្ធិពលនៃកម្លាំងប្រជាធិបតេយ្យ ដែលមាននៅក្នុងរដ្ឋាភិបាលចម្រុះរបស់ថៃ ដែលមិនស្ថិតក្រោមការគ្រប់គ្រងផ្តាច់មុខរបស់របបសឹកដូចមុនទេ ព្រោះរាជរដ្ឋាភិបាលថៃ នៅពេលនេះ មិនមែនជារាជរដ្ឋាភិបាលយោធាទេ ជារាជរដ្ឋាភិបាលដែលមានពហុបក្ស ហើយក្នុងនោះ ក៏មានអ្នកសេរីនិយម ដែលយល់អំពីលទ្ធិប្រជាធិបតេយ្យដែរ ។ យើងនៅតែមានក្តីសង្ឃឹមថា យើងនឹងចូលប្រទេសកម្ពុជា យើងបង្ហាញនូវឆន្ទៈជូនប្រជាពលរដ្ឋ ។ សំខាន់គឺបង្ហាញឲ្យឃើញថា យើងខ្ញុំមិននិយាយលេងសើចពីការធ្វើមាតុភូមិនិវត្តន៍ទេ ទោះបីជាមានឧបសគ្គយ៉ាងណា ។
សូមជម្រាបថា កាលពីរសៀលថ្ងៃទី២០ ខែតុលាកន្លងមក នគរបាលអន្តោប្រវេសន៍ថៃ បានបិទមិនឲ្យលោកស្រី មូរ សុខហួរ ហោះចូលទៅកាន់ប្រទេសរបស់ខ្លួនទេ ដោយសារតែលោកស្រីមានឈ្មោះនៅក្នុងបញ្ជីខ្មៅ ដែលសមត្ថកិច្ចកម្ពុជាស្នើឲ្យហាមឃាត់ជាមួយឈ្មោះ សម រង្ស៊ី ។
តាមព័ត៌មានដែលផ្តល់ដោយក្រសួងការបរទេស បានឲ្យដឹងថា នៅថ្ងៃ២០ ខែតុលា ឈ្មោះមូរ សុខហួរ បានចេញដំណើរពីទីក្រុងគូឡាឡាំពួរ ប្រទេសម៉ាឡេស៊ី កាលពីម៉ោង៣និង៤នាទីរសៀល តាមជើងយន្តហោះ MH782 ហើយបានមកដល់ទីក្រុងបាងកក ប្រទេសថៃ នៅម៉ោង៤ និង៣៤នាទីរសៀល ។ ពេលមកដល់ប៉ុស្តិ៍ត្រួតពិនិត្យ នគរបាលអន្តោប្រវេសន៍ថៃ បានហាមឃាត់មិនឲ្យចូលដោយសារមានឈ្មោះក្នុងបញ្ជីខ្មៅ ដែលសមត្ថកិច្ចកម្ពុជាស្នើឲ្យហាមឃាត់ ។ សមត្ថកិច្ចថៃ ក៏បានចារពាក្យហាមឃាត់ មិនឲ្យចូលលើលិខិតឆ្លងដែនរបស់ឈ្មោះ មួរ សុខហួរ ។ ឈ្មោះមួរ សុខហួរ បានចាកចេញពីថៃ ទៅម៉ាឡេស៊ីវិញ នៅម៉ោង៨និង១០នាទីយប់ តាមជើងហោះហើរ MH781 ។
នេះជាលើកទីមួយហើយ ដែលអាជ្ញាធរថៃហាមឃាត់មិនឲ្យចូលក្នុងទឹកដីថៃ ព្រោះមានឈ្មោះក្នុងបញ្ជីខ្មៅ ដែលសមត្ថកិច្ចកម្ពុជាស្នើឲ្យហាមឃាត់ចំនួន៩រូប ក្នុងនោះរួមមាន ៖ លោក សម រង្ស៊ី, លោក អេង ឆៃអ៊ាង, លោកស្រី មូរ សុខហួរ, លោក អ៊ូ ចន្ទ័ឫទ្ធិ, លោក ហូរ វ៉ាន់, លោក ម៉ែន សុថាវរិន្ទ្រ, លោក នុត រំដួល, អ្នកស្រី ជូឡុង សូមូរ៉ា និងលោក ឡុងរី ៕