តាមរយៈគូស្នេហ៍ស្រលាញ់ភេទដូចគ្នា ស្រីស្រលាញ់ស្រី១គូនេះ ដែលតួអង្គជាប្តី មានឈ្មោះក្នុងហ្វេសប៊ុកថា “Bong Ta” ចំណែកតួអង្គជាប្រពន្ធមានឈ្មោះក្នុងហ្វេសប៊ុក “Nivin Na” បានបង្ហោះរឿងរ៉ាវដ៏គួរឲ្យភ្ញាក់ផ្អើលមួយនៅលើបណ្តាញសង្គមហ្វេសបុក ដោយគូស្នេហ៍នេះ ក៏អាចផ្ទៃពោះលើកដំបូង ដោយប្រើប្រាស់បច្ចេកវិទ្យាទំនើប គឺបង្កកំណើតក្នុងកែវ (IFV) ។
ម្ចាស់គណនីហ្វេសប៊ុក “Bong Ta” បានបង្ហោះរូបប្រពន្ធមានផ្ទៃពោះ និងសម្តែងក្តីរំភើបយ៉ាងដូច្នេះថា ៖ នេះជាកាដូដ៏ធំបំផុតក្នុងជីវិតខ្ញុំ ជាសុភមង្គលដ៏ពិតប្រាកដ ជាគ្រួសារដ៏ពេញលេញដូចគេឯង អរគុណអូនដែលលះបង់រូបសម្រស់ លះបង់សុខភាព ផ្ញើអនាគតជាមួយបង(ស្រី) ការលះបង់នេះ វាធំខ្លាំងណាស់ ស្ទើរតែគ្មានមនុស្សស្រីណា ហ៊ានលះបង់បែបនេះដូចអូនឡើយ ។
គូស្នេហ៍ស្រីស្រលាញ់ស្រីដូចគ្នា សប្បាយរីករាយចិត្តជាខ្លាំង ដោយពួកគេកូនម្នាក់ នៅក្នុងផ្ទៃ មានវ័យ២០អាទិត្យទៅហើយ នៅពេលនេះ តួអង្គជាប្តី ព្រមទម្លាយមូលហេតុដែលនាំឲ្យតួអង្គ ជាប្រពន្ធមានគភ៌ ជាលើកដំបូងនេះផងដែរ ។
“Bong Ta” ស្ត្រីជាតួអង្គប្តីនោះ បានបង្ហោះសារថា ថ្ងៃនេះ សុំធ្វើការបកស្រាយ ចំពោះចម្ងល់របស់បងប្អូន ដែលគាត់បានចោទជាសំនួរដូចខាងក្រោម ៖
ស្រី និងស្រី មានកូនតាមណា ?
តើគេចាក់មេជីវិតឈ្មោលចូលស្បូនមែនទេ ?
តើកូនក្នុងផ្ទៃមានជាប់សាច់ឈាមខ្ញុំទេ ?
អ្វីទៅដែលហៅថាបង្កកំណើតក្នុងកែវ ?
តម្លៃ ប៉ុន្មានទៅ ?
“Bong Ta” ប្រាប់យ៉ាងដូច្នេះថា «ខ្ញុំសូមបកស្រាយសាច់រឿងខ្ញុំផ្ទាល់ ៖ ស្រីនិងស្រី ពិតជាអាចមានកូនជាមួយគ្នាមែន តែត្រូវមានការបង្កជាមួយមេជីវិតឈ្មោល ។ វិធីរបស់ខ្ញុំ គឺមិនមែនជាការចាក់មេជីវិតឈ្មោលចូលទៅក្នុងស្បូនប្រពន្ធខ្ញុំទេ គឺខ្ញុំធ្វើការបង្កកំណើតក្នុងកែវ (IFV) ដោយតម្រូវអោយខ្ញុំ រកទិញមេជីវិតឈ្មោល ដើម្បីបង្កកទុកបង្កាត់ រួចគ្រូពេទ្យចាប់ផ្តើមអោយថ្នាំខ្ញុំលេប ពិនិត្យសុខភាព និងចាក់ថ្នាំ ដើម្បីភ្ញាស់អោយមេជីវិតញីរបស់ខ្ញុំទុំ (ពងញី ឫអូវ៉ុល) ខ្ញុំផ្ទាល់ធ្វើការចាក់ថ្នាំ ពិនិត្យសុខភាព និងលេបថ្នាំអស់ប្រហែលជា៤ទៅ៥ខែ ទើបមេជីវិតញីខ្ញុំទុំ បន្ទាប់មកទៀត ពេទ្យបានប៊ូមមេជីវិតញីរបស់ខ្ញុំចេញមកក្រៅ រួចយកទៅបង្កាត់ជាមួយមេជីវិតឈ្មោល ដែលខ្ញុំបានទិញវាមក ធ្វើការបង្កាត់បានជោគជ័យ តែត្រូវប្រើរយៈពេល១២ថ្ងៃទៀត ដើម្បីពិនិត្យចំនួនកូន ដែលមានសុខភាពល្អ» ។
“Bong Ta” បន្តថា «កូនខ្ញុំ ដែលបង្កាត់ម្តង មានចំនួន៩កូន ដែលមានសុខភាពល្អ ដូច្នេះ ខ្ញុំសម្រេចចិត្តថា ដកយក២កូន មកទុកប្រើ ដើម្បីបង្កាត់វាជាកូនភ្លោះ ហើយនៅសល់៧កូនទៀត ត្រូវបង្កកទុកប្រើពេលក្រោយ នៅពេលដែលចង់បានកូនទៀត ។ បន្ទាប់ពីបង្កាត់កូនរួចរាល់ ពេទ្យគាត់ចាប់ផ្តើមអោយថ្នាំប្រពន្ធខ្ញុំ លេប និងធ្វើការចាក់ថ្នាំ អោយបើកមាត់ស្បូន ចំណាយរយៈពេល១០ថ្ងៃ ពេលដែលពិនិត្យទៅឃើញថា ដល់វេលាដែលអាចដាក់កូនចូលស្បូនគាត់បាន ពេទ្យក៏ចាប់យកកោសិកាកូន ដែលបង្កាត់រួចចំនួន២ ធ្វើការដាក់ចូលស្បូនប្រពន្ធខ្ញុំ អោយនាងពពោះជំនួស យើងយកកូនភ្លោះ» ។
“Bong Ta” បន្ថែមទៀតថា «កូននេះ គឺមានហ្សែនរបស់មេជីវិតឈ្មោល៤០ភាគរយ ហ្សែនរបស់ខ្ញុំ៤០ភាគរយ (ម្ចាស់មេជីវិតញី) និងហ្សែនប្រពន្ធខ្ញុំមានតែ២០ភាគរយប៉ុណ្ណោះ ព្រោះពេលដែលដាក់កូនចូលពោះគាត់ កូនខ្ញុំមានអាយុ១២ថ្ងៃរួចទៅហើយ គ្រាន់តែវាត្រូវការជីវជាតិ ពីសារពាង្គកាយពីខ្លួនរបស់ប្រពន្ធខ្ញុំ ដើម្បីលូតលាស់ ។ ចុងក្រោយការពិនិត្យផ្ទៃពោះ គឺជោគជ័យ ប៉ុន្តែយើងសោកស្តាយ ដោយសារមិនជាប់កូនភ្លោះទេ គឺជាប់បានតែ១ កូន គឺកូនប្រុស» ។
ជាចុងក្រោយ តួអង្គជាប្តីបានបញ្ជាក់ថា ទោះបីជាកូនក្នុងពោះប្រពន្ធខ្ញុំ ជាកូនរបស់ខ្ញុំ មិនមែនជាកូនគាត់ តែគាត់ជាអ្នកពពោះជំនួសខ្ញុំ រហូតដល់ទៅ៩ខែ១០ថ្ងៃ វាប្រៀបដូចគាត់ក៏ជាម្តាយក្មេងនេះដែរ ។ ខ្ញុំទោះបីជាមិនបានពពោះដោយខ្លួនឯង តែក្មេងនេះ កើតមានជីវិតដោយសារមេជីវិតញីរបស់ខ្ញុំប្រៀបដូចជាខ្ញុំ ជាឪពុកម្នាក់អ៊ីចឹងដែរ ។ ចំណែកឯម្ចាស់មេជីវិតឈ្មោល គឺគេអោយមើលតែរូបថតមិនដែលជួបគ្នាឡើយ ដឹងត្រឹមតែថា មេជីវិតឈ្មោលបានមកពីបុរសថៃកូនកាត់ចិន រីឯតម្លៃវិញ សរុបទៅអស់ប្រហែលជាំ ២៣,០០០ដុល្លារសហរដ្ឋអាមេរិក ពួកយើងធ្វើនៅមន្ទីរពេទ្យមួយក្នុងប្រទេសថៃ» ៕