រាជធានីភ្នំពេញ ៖ លោក អូស្មាន់ ការាខា (Osman Karaca) អតីតនាយកសាលាហ្សាម៉ាន់ (បច្ចុប្បន្នសាលាផារ៉ាហ្គន) ដែលរដ្ឋាភិបាលតួកគី ចោទថាមានការពាក់ព័ន្ធនឹង អំពើភេរវកម្មនៅប្រទេសតួកគី ត្រូវបានសមត្ថកិច្ចចាប់ខ្លួននៅកម្ពុជា កាលពីសប្តាហ៍មុន ហើយបញ្ជូនទៅតួកគី ដើម្បីយកទៅអនុវត្តទោស ។
លោក ឆាយ គឹមឃឿន អ្នកនាំពាក្យអគ្គស្នងការនគរបាលជាតិ បានអោយដឹងថា សមត្ថកិច្ចកម្ពុជា និងតួកគី បានសហការចាប់ខ្លួនលោក អូស្មាន់ ការាខា កាលពីថ្ងៃទី១៤ ខែតុលា ឆ្នាំ២០១៩ ពីបទភេរវកម្ម តាមសំណើតួកគី ហើយត្រូវបានបញ្ជូនទៅប្រទេសតួកគីវិញកាលពីថ្ងៃទី១៨ ខែតុលា ឆ្នាំ២០១៩ ។
អ្នកនាំពាក្យ បន្តថា លោក អូស្មាន់ ការាខា ដែលសមត្ថកិច្ចចាប់ខ្លួននេះ គឺតួកគីស្នើសុំកម្ពុជាជាយូរហើយ ហើយពេលនេះក៏មានឯកសារគ្រប់គ្រាន់ កម្ពុជាក៏សហការចាប់បញ្ជូនទៅតួកគីតែបណ្ណឹងទេ ។ សមត្ថកិច្ចកម្ពុជាមានភស្តុតាងគ្រប់គ្រាន់ ដែលផ្តល់ដោយរដ្ឋាភិបាលតួកគី ដើម្បីចាប់ខ្លួនលោក អូស្មាន់ ការាខា ពាក់ព័ន្ធករណីរដ្ឋប្រហារនៅតួកតី ។ លោកបញ្ជាក់ថា ការចាប់ខ្លួនលោក អូស្មាន់ ការាខា អនុវត្តទៅតាមកិច្ចព្រមព្រៀងរវាងរដ្ឋាភិបាលប្រទេសទាំងពីរ ។ ការចុះកិច្ចព្រមព្រៀងនេះ បានធ្វើឡើងដោយ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោក Suleyman Soylu រដ្ឋមន្ត្រីក្រសួងមហាផ្ទៃនៃសាធារណរដ្ឋតួកគី ។
ដោយឡែក បើតាមសារព័ត៌មានបរទេស Aljazeera បានចុះផ្សាយកាលពីថ្ងៃទី២០ តុលានេះថា ទីភ្នាក់ងារស៊ើបការណ៍សម្ងាត់របស់តួកគី បានចាប់ខ្លួនលោក Osman Karaca សញ្ជាតិម៉ិកស៊ិក ដើមកំណើតតួកគី ពីប្រទេសកម្ពុជា ហើយនាំទៅឃុំខ្លួននៅប្រទេសតួកគី ក្រោមបទចោទ «បង្កើត និងរៀបចំផែនការរដ្ឋប្រហារ» ជាមួយបណ្ដាញភេរវកម្មមួយដឹកនាំដោយលោក ហ្វែតតូឡាស់ គូលែន ដែលកំពុងនិរទេសខ្លួន នៅសហរដ្ឋអាមេរិក ។
ក្រុមភេរវកម្មដែលរដ្ឋាភិបាលតួគីតាមកម្ចាត់នេះ ដោយសារក្រុមបានធ្វើរដ្ឋប្រហារនៅក្នុងប្រទេសតួកគី កាលពីថ្ងៃទី១៥ កក្កដា ២០១៦ ។ ក្រោយធ្វើរដ្ឋប្រហារមិនបានសម្រេច រដ្ឋាភិបាលតួកគី តាមស្រាវជ្រាវរកឃើញថា មានបណ្ដាញចលនាភេរវករដែលចង់មកសម្ងំលាក់ខ្លួននៅកម្ពុជា ។
លោក អូស្មាន់ ការាខា គឺបានបម្រើការងារ នៅសាលាហ្សាម៉ាន់អន្តរជាតិនៅកម្ពុជា ចាប់ពីឆ្នាំ២០០២ ដល់២០១១ រហូតក្លាយជានាយកគ្រប់គ្រងសាលានេះ ។ បច្ចុប្បន្នសាលាហ្សាម៉ាន់អន្តរជាតិ បានលក់បន្ត ហើយប្ដូរឈ្មោះទៅជាសាលាផារ៉ាហ្គនអន្តរជាតិវិញ បន្ទាប់ពីមានសម្ពាធ និងរងការចោទប្រកាន់ជាប់ពាក់ព័ន្ធបណ្ដាញក្រុមភេរវកម្ម ពីសំណាក់រដ្ឋាភិបាលតួកគី ។
បើតាមព័ត៌មានបរទេសដដែល បានដកស្រង់សម្តីភរិយារបស់លោក អូស្មាន់ ការាខា គឺអ្នកស្រី Grace អោយដឹងថា ប្តីរបស់គាត់ ត្រូវបានបញ្ជូនដល់ប្រទេសតួកគីហើយ ។ អ្នកស្រី Grace និយាយបន្តថា ទោះបីជានាង និងស្វាមីលោក ការាខា ធ្លាប់បានជួយដល់លោក គូលែន ដែលកំពុងនិរទេសខ្លួន នៅសហរដ្ឋអាមេរិក ក៏ដោយ ប៉ុន្តែនាងនិងប្តី មិនបានប្រព្រឹត្តបទល្មើសអ្វីនោះទេ ។
អ្នកស្រី បន្ថែមទៀត អ្វីដែលយើងធ្វើកន្លងមក គឺការងារជួយសិស្ស ដែលមិនមានប្រាក់ដើម្បីសិក្សាប៉ុណ្ណោះ ។ ពេលនេះនាងមានការភ័យខ្លាចចំពោះការចាប់បញ្ជូនស្វាមីខ្លួនទៅកាន់ប្រទេសតួកគី ក្រោមការចោទប្រកាន់គាំទ្រសកម្មភាពភេរវកម្មនេះ ។
សូមរម្លឹកថា រដ្ឋប្រហារមិនសម្រេច នៅប្រទេសតួកគី ដើម្បីផ្តួលរំលំរដ្ឋាភិបាល លោកប្រធានាធិបតី អេដូហ្គាន់ (Erdoğan) បានកើតឡើង កាលពីថ្ងៃទី១៥ ខែកក្កដា ឆ្នាំ២០១៦ ដែលរដ្ឋាភិបាលប្រទេសនេះចោទថា រៀបចំដោយ លោក Gulen ឥស្សរជននយោបាយដ៏ខ្លាំង១រូប ដែលភៀសខ្លួនទៅនៅសហរដ្ឋអាមេរិក ។ ដែលបង្កឲ្យមានអ្នកស្លាប់២៥១នាក់ និងអ្នករបួសជិត២,២០០នាក់ ។
លោក អូស្មាន់ ការាខា អតីតថ្នាក់ដឹកនាំសាលាហ្សាម៉ាន់ ត្រូវបានរដ្ឋាភិបាលតួកគីចោទថា បានផ្តល់ជាហិរញ្ញវត្ថុដល់លោក ហ្វែត តូឡាស់គូលែន ដែលភៀសខ្លួននៅអាមេរិក ដើម្បីធ្វើរដ្ឋប្រហារយោធាទម្លាក់ ប្រធានាធីបតីតួកគីស្របច្បាប់ ប៉ុន្តែការធ្វើរដ្ឋប្រហារត្រូវបានបរាជ័យ ។ ទោះជាយ៉ាងនេះក្តី នាពេលកន្លងទៅ សាលាហ្សាម៉ាន់ បានចេញប្រកាសថា ខ្លួនមិនមានការពាក់ព័ន្ធនឹងរដ្ឋប្រហារនៅប្រទេសតួកគីនោះទេ ៕
