រាជធានីភ្នំពេញ ៖ នៅព្រឹកថ្ងៃទី២១ តុលា ២០១៩នេះ ជនជាតិចិនតៃវ៉ាន់ ជាជនដៃដល់ឈ្មោះ TSAI JIDA ហៅ ADA និងបក្ខពួក ត្រូវកម្លាំងនគបាលព្រហ្មទណ្ឌ នៃអធិការខណ្ឌទួលគោក បានបញ្ជូនមកសាលាដំបូងរាជធានីភ្នំពេញ ក្រោយពីជនដៃដល់ព្រួតគ្នាវាយលើបុរសជនជាតិខ្មែរ បណ្ដាលឲ្យត្រូវរបួស ។
បើតាមរបាយការណ៍របស់ សមត្ថកិច្ចបានបញ្ជាក់ថា ហេតុការណ៍អំពើហិង្សានេះ បានកើតឡើងកាលពីម៉ោងប្រហែល ២៣:០០នាទី ថ្ងៃទី១៥ តុលា ២០១៩កន្លងទៅ នៅតាមបណ្តោយផ្លវកម្ពុជាក្រោម សង្កាត់ផ្សារដេប៉ូ២ ខណ្ឌទួលគោក ដែលជនរងគ្រោះត្រូវបានគេស្គាល់ថា ឈ្មោះ សឿន រដ្ឋា ភេទប្រុស អាយុ៣៨ឆ្នាំ ជនជាតិខ្មែរ មុខរបរ អាជីវករ ស្នាក់នៅផ្ទះលេខ៤៣ ផ្លូវរំដួល បូរីអ័រគីដេរ សែនសុខ សង្កាត់អូរបែកក្អម ខណ្ឌសែនសុខ រាជធានីភ្នំពេញ ។ ចំណែកឯ ជនសង្ស័យឈ្មោះ TSAI JIDA ហៅ ADA ភេទប្រុស អាយុ៣៨ឆ្នាំ ជនជាតិចិនតៃវ៉ាន់(គ្មានលិខិតឆ្លងដែន)មុខរបរ អាជីរវករស្នាក់នៅផ្ទះលេខ២៦៦ ផ្លូវលេខ ១០Mថ្មីបូរីពិភពថ្មីសែនសុខ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
សូមជម្រាបថា កាលថ្ងៃទី១៧ ខែតុលា ឆ្នាំ២០១៩ កម្លាំងផ្នែកព្រហ្មទណ្ឌ នៃអធិការដ្ឋាននគរបាលខណ្ឌទួលគោក បានធ្វើការស្រាវជ្រាវ ឈានដល់ការឃាត់ខ្លួនជនសង្ស័យម្នាក់ មានឈ្មោះ TSAI JIDA ហៅ ADA នៅចំណុចមុខខារ៉ាអូខេទន្លេសេកុង មានទីតាំងផ្ទះលេខ៧៧ ផ្លូវ១២២ ក្រុមទី១៨ ភូមិ៦ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ ។ បន្ទាប់សាកសួរយកចម្លើយពីជនដៃដល់ ADA នគរបាលខណ្ឌទួលគោក បានកំណត់បានមុខសញ្ញាដែលត្រូវបន្តចាត់ការតាមផ្លូវច្បាប់ មានចំនួន០៣នាក់ ទី១ ៖ ឈ្មោះ LE CHEN LANG អាយុប្រហែល៤២ឆ្នាំ ជនជាតិចិនតៃវ៉ាន់, ទី២ ៖ ឈ្មោះ អ៊ូកឺ ប្រហែល៤៥ឆ្នាំ ជនជាតិចិនតៃវ៉ាន់ និងទី៣ ៖ ឈ្មោះ ALON អាយុប្រហែល២៥ឆ្នាំ ជនជាតិចិនតៃវ៉ាន់ ។
ដំណើររឿងហេតុ នៅថ្ងៃទី១៥ ខែតុលា ឆ្នាំ២០១៩ វេលាម៉ោងប្រហែល១១យប់ ជនរងគ្រោះឈ្មោះ សឿន រដ្ឋា ភេទប្រុស អាយុ៣៨ឆ្នាំ ជនជាតិខ្មែរ និងឈ្មោះ អាន ភេទប្រុស អាយុប្រហែល២៤ឆ្នាំ ជនជាតិខ្មែរ បានបើករថយន្តម៉ាក ឆែរ៉ូឡែត ពណ៌ខ្មៅ ស៊េរី 2018 ពណ៌ខ្មៅ ចេញពីផ្ទះក្នុងគោលបំណងទៅរកញាំអាហារនៅខាងក្រៅ តែមិនបានញាំទេ ជនរងគ្រោះនិងឈ្មោះ អាន ក៏បានជិះរថយន្តដើរលេងតាមផ្លូវ ។
លុះជិះមកដល់ចំណុចមុខផ្ទះ៦២៤ ផ្លូវលេខ១២៨ ក្រុមទី១៥ ភូមិ៦ សង្កាត់ផ្សារដេប៉ូទី២ ខណ្ឌទួលគោក រាជធានីភ្នំពេញ ស្រាប់តែមានជនសង្ស័យឈ្មោះ TSAI JIDA ហៅ ADA ភេទប្រុស អាយុ៣៨ឆ្នាំ ជនជាតិចិនតៃវ៉ាន់ និងបក្សពួកមានគ្នា០៣នាក់ទៀត ទី១,ឈ្មោះ LE CHEN LANG ហៅ លីកឺ ភេទប្រុស អាយុ ប្រហែល៤២ឆ្នាំ ជនជាតិចិនតៃវ៉ាន់ , ទី៣,ឈ្មោះ អ៊ូកឺ ភេទប្រុស ប្រហែល៤៥ឆ្នាំ ជនជាតិចិនតៃវ៉ាន់ និងឈ្មោះ ALON ភេទប្រុស អាយុប្រហែល២៥ឆ្នាំ ជនជាតិចិនតៃវ៉ាន់ បានបើករថយន្តចំនួន០១គ្រឿងម៉ាក Ford Ranger ពណ៌ស មិនចាំស្លាកលេខ និងម៉ូតូ០២គ្រឿងម៉ាក Honda Zoomer X ពណ៌ខ្មៅ លាយក្រហម ពាក់ស្លាកលេខ ភ្នំពេញ 1HF-0713 និងម៉ូតូ០១គ្រឿងទៀត ម៉ាក DIO ពណ៌ស ពាក់ស្លាកលេខ ភ្នំពេញ1HP-1073 តាមផ្លូវ១២៨ ពីលិចទៅកើត ពេលនោះជនរងគ្រោះឈ្មោះ សឿន រដ្ឋា ក៏បានបើករថយន្តវ៉ាទៅមុនក្រុមជនសង្ស័យជាជនជាតិចិនខាងលើ រួចហើយជនសង្ស័យឈ្មោះ TSAI JIDA ហៅ ADA និងបក្សពួកក៏បានចុចស៊ីផ្លេររថយន្តជាច្រើនដងខ្លាំងៗ រួចហៅជនរងគ្រោះឈ្មោះ សឿន រដ្ឋា ឲ្យឈប់ ពេលនោះជនរងគ្រោះក៏បានឈប់រថយន្តរួចហៅជនសង្ស័យឈ្មោះ TSAI JIDA ហៅ ADA និងបក្សពួក០៣នាក់ ថាមានរឿងអីបានហៅអញ់ឲ្យឈប់ ពេលនោះជនសង្ស័យឈ្មោះ TSAI JIDA ហៅ ADA និង បក្សពួកក៏បានឈប់រថយន្តនិងម៉ូតូ រួចនិយាយជាភាសាចិនខ្លាំងៗ រួចហើយក្រុមជនសង្ស័យទាំង០៤នាក់ខាងលើ ក៏បានចុះពីលើរថយន្ត និងម៉ូតូ រួចដើរសំដៅមករកជនរងគ្រោះរួចវាយលើជនរងគ្រោះបណ្ដាលឲ្យត្រូវរបួសជាច្រើនកន្លែង ក្នុងពេលនោះជនរងគ្រោះ ក៏បានវាយតបតទៅលើក្រុមជនសង្ស័យវិញ ដើម្បីការពារខ្លួនទៅវិញ ក្រោយមកក៏មានអ្នកជិតខាងជួយឃាត់បំបែកគ្នា ។
លុះមួយសន្ទុះក្រោយមក ក៏មានការប្រតាយប្រតប់គ្នាជាលើកទី២ ដោយដេញវាយគ្នាពេញផ្លូវ១២៨ ដោយក្រុមជនសង្ស័យទាំង០៤នាក់បានប្រើដៃវាយមកលើជនរងគ្រោះឈ្មោះ សឿន រដ្ឋា និងលោតធាក់ដើមទ្រូង០១កន្លែងជាំ, កញ្ចឹងកខាងក្រោយ, ជើងខាងស្ដាំ, ចង្កេះស្ដាំ, ដៃស្ដាំ, ភ្នែកទាំងសងខាង, ត្រជៀកទាំងសងខាង, ក្បាលជាទម្ងន់ជាំហើមជាំ និងត្រជៀកទាំងសងខាង ក្នុងពេលវាយតាយប្រតប់គ្នា ក្រុមជនសង្ស័យឈ្មោះ ALON បានរត់ចោល ម៉ូតូ០១គ្រឿង ម៉ាក DIO ពណ៌ស ពាក់ស្លាកលេខ ភ្នំពេញ 1HP-1073 នៅលើផ្លូវលេខ១២៨ រួចហើយក្រុមជនសង្ស័យទាំង០៤នាក់ខាងលើ ក៏បានគេចរត់ខ្លួនបាត់ទៅ ចំណែកជនរងគ្រោះត្រូវបានក្រុមគ្រួសារដឹកយកទៅសង្គ្រោះបន្ទាន់នៅមន្ទីរពេទ្យតែម្ដង ក្រោយពេលកើតហេតុសមត្ថកិច្ចយើងក៏បានចុះទៅដល់កន្លែងកើតហេតុ ដើម្បីចាប់យកម៉ូតូ០១គ្រឿងម៉ាក DIO ពណ៌ស ពាក់ស្លាកលេខ ភ្នំពេញ 1HP-1073 ដែលក្រុមជនសង្ស័យជនជាតិចិនបានរត់ចោល និងបានធ្វើការស្រាវជ្រាវចាប់ខ្លួនជនសង្ស័យខាងលើ យកមកផ្តន្ទាទោសទៅតាមផ្លូវច្បាប់ ៕
