ខេត្តឧត្តរមានជ័យ៖ កម្លាំងនគរបាលខេត្តឧត្តរមានជ័យ បានឃាត់ខ្លួនជនសង្ស័យឈ្មោះ ធឹង សំបាន អតីតប្រធានប្រតិបត្តិ និងជាអតីតសមាជិកក្រុមប្រឹក្សាស្រុកចុងកាល់ ខេត្តឧត្តរមានជ័យ ក្រោយបុគ្គលនេះ បានកៀរគរកម្លាំងដើម្បីចូលរួមទទួលលោកសម រង្ស៊ី ដែលបានប្រកាសវិលចូលប្រទេសកម្ពុជាវិញ នៅថ្ងៃទី០៩ ខែវិច្ឆិកា ឆ្នាំ២០១៩ ខាងមុខនេះ ។ ការឃាត់ខ្លួននេះ បានធ្វើឡើង នៅថ្ងៃទី១៧ ខែតុលា ឆ្នាំ២០១៩ ម្សិលមិញនេះ។
លោក ធឹង សំបាន ត្រូវបានព្រះរាជអាជ្ញារង នៃសាលាដំបូងខេត្តឧត្តរមានជ័យ ចេញដីកាបង្គាប់ឱ្យចូលខ្លួន កាលពីថ្ងៃទី១៤ ខែតុលា ឆ្នាំ២០១៩ ពាក់ព័ន្ធនឹងបទ រួមគំនិតក្បត់ ដែលបទនេះប្រឈមនឹងការជាប់ពន្ធនាគារពី០៥ឆ្នាំ រហូតដល់១០ឆ្នាំ។
សូមបញ្ជាក់ថា លោកសម រង្ស៊ី បានប្រកាសវិលចូលប្រទេសកម្ពុជាវិញ នៅថ្ងៃទី០៩ ខែវិច្ឆិកា ឆ្នាំ២០១៩ ខាងមុខនេះ ដោយលោកបានអំពាវនាវឱ្យកងទ័ពផ្តាច់ខ្លួនពីរាជរដ្ឋាភិបាលទៅចុះចូលជាមួយខ្លួន ដោយប្រកាសថានឹងផ្តល់ថវិកាលើកទឹកចិត្តដល់ពួកគេ មិនតែប៉ុណ្ណោះលោកបានរិះគន់ថា ព្រះមហាក្សត្រជាអាយ៉ងរបស់សម្ដេចហ៊ុន សែន និងបានបង្គាប់ឱ្យព្រះមហាក្សត្រដាក់រាជ្យ ដើម្បីរំលាយរបបរាជានិយមថែមទៀតផង៕
