ការថែបំប៉នកូនត្រី ឲ្យឆាប់ធំធាត់គឺជាដំណាក់កាលដំបូងបំផុតក្នុងការយកវាទៅចិញ្ចឹមបន្តបន្ទាប់ទៀត។ ដើម្បីចិញ្ចឹមកូនត្រីឲ្យបានល្អ គឺសំខាន់បំផុតអាស្រ័យទៅលើការជ្រើសរើសពូជត្រី ស្រះចិញ្ចឹម ការការពារថែទាំ និងចំណីអាហាររបស់វា។ ការថែបំប៉នកូនត្រីក្នុងស្រះ ត្រូវបំប៉នជាពីរដំណាក់កាលផ្សេងៗគ្នាគឺ៖
១/. ដំណាក់កាលថែបំប៉នកូនត្រីពូជ
សម្រាប់កសិករមានដើមទុនតិច គួរជ្រើសរើសប្រភេទត្រីទាំងឡាយណា ដែលស៊ីចំណីធម្មជាតិមាន ស្រាប់នៅក្នុងស្រះជាអាហារសំខាន់ និងចំណីបន្ថែមអាចរកបាន ឬមានស្រាប់នៅតាមមូលដ្ឋាន ភូមិ ឃុំ របស់ខ្លួនដូចជា កន្ទក់ ចុងអង្ករ ជន្លេន កន្តៀរ ចកបាយទា កាកសំណល់បន្លែ ឬផ្ទះបាយជាដើម ។ ល។ ប្រភេទត្រីទាំងនោះរួមមានដូចជា៖ ត្រីឆ្អិន ត្រីកន្ធរ ត្រីឡាព្យា ត្រីកាបសាមញ្ញ ត្រីកាបស និងត្រីកាបឥណ្ឌា (ដូចរូបភាពខាងក្រោម) ។
២/. ការថែបំប៉នកូនត្រីម្សៅ និងកូនត្រីពូជ
– កូនត្រីម្សៅ គឺជាកូនត្រីមានទំហំតូចៗដែលទើបនឹងញាស់ និងចាប់ផ្ដើមចេះស៊ីចំណី ។ ចំណែកកូន ត្រីពូជមានទំហំធំជាងកូនត្រីម្សៅ ។ ការថែបំប៉នកូនត្រីម្សៅក្នុងស្រះទាមទារត្រូវយកចិត្តទុកដាក់ បំផុត ដើម្បីឲ្យកូនត្រីមានបរិមាណរស់ច្រើន និងធំធាត់ឆាប់រហ័ស ។
– ក្រោយពីថែបំប៉នកូនត្រីម្សៅក្នុងរយៈពេលពី ២-៣ សប្ដាហ៍នោះកូនត្រីមានទំហំកាន់តែធំ ធ្វើឲ្យទីធ្លា រស់នៅកាន់តែចង្អៀតដែលមានផលប៉ះពាល់មិនល្អដល់ការលូតលាស់របស់កូនត្រី ដូច្នេះចាំបាច់យើង ត្រូវចាប់រំលែកកូនត្រីមកដាក់បំប៉នក្នុងស្រះមួយផ្សេងទៀត ដើម្បីឲ្យកូនត្រីលូតលាស់បានឆាប់រហ័ស ។ បច្ចេកទេសថែបំប៉នកូនត្រីម្សៅ និងកូនត្រីពូជ មានដូចជាខាងក្រោមនេះ៖
ក. ស្រះ និងការរៀបចំស្រះបំប៉នកូនត្រីម្សៅ
– ស្រះថែបំប៉នកូនត្រីម្សៅ គួរមានទំហំតូចល្មម ដើម្បីងាយស្រួលក្នុងការថែបំប៉ន ដូចជាទំហំពី ៥០ទៅ ១៥០ ម៉ែត្រការេ ឬមាន បណ្ដោយពី ១០ម៉ែត្រទៅ ២០ម៉ែត្រ ទទឹងមានពី ៥ ទៅ ១០ ម៉ែត្រ និងមានជម្រៅ ០.៥ ម៉ែត្រ (ដូចរូបភាពខាងក្រោម) ។
– ដើម្បីថែបំប៉នកូនត្រីម្សៅមានបរិមាណរស់ច្រើន ស្រះថែបំប៉នកូនត្រីម្សៅ ចាំបាច់ត្រូវរៀបចំឲ្យបាន ស្អាតល្អ គឺគ្មានត្រីកាច កង្កែប កូនក្អាត់ ពស់ អន្ទង់ សត្វដងរែក ទោម ក្ដាមទូក ។ ល។ ដែលស៊ី បំផ្លាញកូនត្រីម្សៅជាអាហារ ។ ដូចនេះស្រះត្រូវបូមទឹកពង្រឹងឲ្យអស់ ដើម្បីចាប់ត្រីកាច កង្កែប កូនក្អាត់ ពស់ អន្ទង់។ល។ ទាំងអស់នេះ កុំឲ្យមានសល់ស្រះ រួច ស្ដារភក់បាតស្រះទុកឲ្យមានជម្រៅ តែពី ១០ ទៅ ២០ សង់ទីម៉ែត្រ ។
– រួចបាចកំបោរពី ៣ ទៅ គ.ក្រ ១០០ ម៉ែត្រការ៉េ សម្រាប់ស្រះចាស់ ឬពី ១០ទៅ ១៥ គ.ក្រ ក្នុង ១០០ ម៉ែត្រការ៉េសម្រាប់ ស្រះថ្មី និងទុកស្រះហាលថ្ងៃចំនួន ២ ទៅ ៣ថ្ងៃ ។
– បន្ទាប់មកបង្ហូរទឹកចូលស្រះដោយប្រើតម្រងច្រោះ ដើម្បីការពារកុំឲ្យមានត្រីកាច ឬសត្វល្អិតចូល ស្រះ និងត្រូវមានទ្រនាប់ទ្រទឹក បាញ់ចូលក្នុងស្រះ ដើម្បីកុំឲ្យទឹកស្រះល្អក់ ។
– ក្រោយពីស្រះបង្ហូរទឹកចូល និងសាបជាតិកំបោរអស់ហើយ ត្រូវលែងកូនត្រីម្សៅចូលក្នុងស្រះភ្លាម ដើម្បីកុំឲ្យមានសត្វល្អិតកើតក្នុង ស្រះ មុនពេលដាក់កូនត្រីម្សៅបំប៉ន ។
– ដូចនេះ ពេលរៀបចំស្រះថែបំប៉នកូនត្រីម្សៅ មិនត្រូវប្រើជីដាក់ក្នុងស្រះទេ ព្រោះវានឹងកើតសត្វល្អិត ច្រើនស៊ីបំផ្លាញកូនត្រីម្សៅ ។ ប៉ុន្តែក្រោយពេលបំប៉នកូនត្រីម្សៅមានទំហំធំ ស្រះចាំបាច់ត្រូវប្រើជី ដើម្បីបង្កើនបរិមាណចំណីធម្មជាតិ ដែលជាចំណីសំខាន់សម្រាប់កូនត្រី (មានបញ្ជាក់ពីរបៀបប្រើជី ក្រោយពេលដាក់កូនត្រីចិញ្ចឹមបំប៉ននៅមេរៀនខាងក្រោយ) ។
៣/. ស្រះ និងការរៀបចំស្រះបំប៉នកូនត្រីពូជ
– ស្រះថែបំប៉នកូនត្រីពូជ អាចមានទំហំប៉ុនទំហំស្រះថែបំប៉នកូនត្រីម្សៅ ឬមានទំហំធំជាងនេះក៏បាន ប៉ុន្តែកុំឲ្យមានទំហំធំពេក ព្រោះពិបាកគ្រប់គ្រង ។ ជាទូទៅសម្រាប់កសិករ ទំហំស្រះបំប៉នកូនត្រីពូជ អាចមានពី ១៥០ ទៅ ២០០ ម៉ែត្រការ៉េ ឬមានបណ្ដោយពី ១៥ ម៉ែត្រ ទៅ ២០ ម៉ែត្រ និងទទឹង ១០ ម៉ែត្រ និងមានជម្រៅពី ០.៥ ម៉ែត្រ ទៅ ១ ម៉ែត្រ ។
– ក្រោយពីកូនត្រីម្សៅមានទំហំធំ ត្រូវចាប់វាផ្ទេរទៅបំប៉នក្នុងស្រះមួយផ្សេងទៀត ដែលត្រូវរៀបចំ តាមវិធីដូចបានរៀបរាប់ខាងលើ តែស្រះនេះត្រូវប្រើជី ដើម្បីបង្កើនសត្វល្អិតប្លង់តុងដែលជាចំណី សំខាន់របស់កូនត្រីពូជ ។
– ដូចនេះ ស្រះថែបំប៉នកូនត្រីពូជ ត្រូវប្រើជីដាក់ក្នុងស្រះ ។ ប្រភេទជីដែលប្រើសម្រាប់កសិករ គឺ ជីធម្មជាតិ ដូចជា លាមកគោ ក្របី លាមកមាន់ ទា ជ្រូក ជាដើមដោយដាក់វាត្រាំក្នុងរណ្ដៅជីរយៈ ពេល ១ សប្ដាហ៍ទើបបង្ហូរទឹកជីនោះចូលទៅក្នុងស្រះ (ដូចរូបខាងក្រោម)។
– គួរកុំប្រើជីគីមី ដែលនាំឲ្យខាតបង់ថវិកា ព្រោះប្រើតែជីធម្មជាតិក៏ធ្វើឲ្យទឹកស្រះមានពណ៌បៃតង និងសម្បូរចំណីធម្មជាតិបានដែរ
– ក្រោយពេលដាក់ជីហើយរយៈពេលប្រមាណពី ២ទៅ ៣ថ្ងៃ បើសង្កេតឃើញទឹកស្រះមានពណ៌បៃតងទើបលែងកូនត្រីពូជចូលក្នុងស្រះបាន ។ ម្យ៉ាងទៀត ដើម្បីថែបំប៉នកូនត្រីម្សៅ និងកូនត្រីពូជមានបរិមាណរស់ច្រើន គួរព័ទ្ធសំណាញ់ជុំវិញស្រះ ដើម្បីការពារកុំឲ្យត្រីកាច ឬកង្កែប កូនក្អាត់ ពស់ ឬកណ្ដុរ ចូលក្នុងស្រះស៊ីកូនត្រី ៕
