ខេត្តកំពង់ស្ពឺ ៖ យប់មិញនេះមានករណីគ្រោះថ្នាក់ចរាចរណ៍ដ៏រន្ធត់មួយ កើតឡើងរវាងរថយន្តFORD ចំណុះ១៨កៅអី ដឹកអ្នកដំណើរបុកជាមួយរថយន្តសណ្ដោងកុងតឺន័រ ដែលកំពុងចតស្ងៀម បណ្ដាលឲ្យផ្ទុះឆេះយ៉ាងសន្ធោសន្ធៅ រងរបួសធ្ងន់និងស្រាលមនុស្សចំនួន០៦នាក់ ។
ហេតុការណ៍គ្រោះថ្នាក់ចរាចរណ៍បានកើតឡើងនៅវេលាម៉ោង២៣និង៥៥នាទីឈានចូលថ្ងៃទី១៧ តុលា ២០១៩នេះ ស្ថិតនៅលើផ្លូវជាតិលេខ៤ ចន្លោះគីឡូម៉ែត្រលេខ(38-39) ត្រង់ចំណុចទំនប់អូរក្រាំងអំបិល ក្នុងភូមិស្លាឃុំវល្លិ៍ស ស្រុកសំរោងទងខេត្តកំពង់ស្ពឺ ។
មន្ត្រីនគរបាលចរាចរណ៍ខេត្តកំពង់ស្ពឺ បានឲ្យដឹងថា ក្នុងហេតុការណ៍គ្រោះថ្នាក់ចរាចរណ៍នេះ មិនបណ្តាលឲ្យមានជនរងគ្រោះស្លាប់ឡើយ ដោយសារមានការអន្តរាគមន៍ជួយសង្គ្រោះទាន់ពេលវេលា ។
ប៉ូលិសចរាចរណ៍បានបន្តថា មុនកើតហេតុ រថយន្ត Ford ដឹកអ្នកដំណើរប្រភេទ១៨កៅអី មកពីខេត្តព្រះសីហនុឆ្ពោះទៅភ្នំពេញ បើកបរមកពីលិចទៅកើត មកដល់ចំណុចខាងលើ បានបុករថយន្តមួយគ្រឿងទៀត ម៉ាកHYUNDAI ពណ៌ស ពាក់ស្លាកលេខភ្នំពេញ 3D-9186 មានសណ្ដោងរ៉ឺម៉ក ពាក់ស្លាកលេខ ភ្នំពេញ 4A-5956 ពីក្រោយ ដែលកំពុងឈប់នៅខាងស្តាំ(កង់ម្ខាង នៅលើផ្លូវកៅស៊ូ និង កង់ម្ខាងទៀត នៅលើគ្រួសក្រហម បណ្តាលឲ្យរថយន្ត Ford ឆេះ ក្រោយពេលកើតហេតុប្រមាណ១៥នាទី កម្លាំងអន្តរាគមន៍ជួយសង្គ្រោះយកអ្នករបួសចេញពីរថយន្តអស់ទើបរថយន្តឆេះកាន់តែខ្លាំងឡើងៗយ៉ាងសន្ធោសន្ធៅតែម្ដង ។ អ្នកបើកបរមិនទាន់ស្គាល់អត្តសញ្ញាណ បានរត់គេចខ្លួនបាត់ ។
បច្ចុប្បន្ន ជនរងគ្រោះ កំពុងសង្គ្រោះក្នុងមន្ទីរពេទ្យ ។ ចំណែករថយន្តសមត្ថកិច្ចបានយកទៅរក្សាទុកដើម្បីស្រាវជ្រាវ និងកសាងសំណុំរឿងតាមនីតិវិធី ៕
