ត្រាវ គឺជាឈ្មោះប្រទាលមួយប្រភេទសន្ដានក្ដាត មានធាងមានមើមបរិភោគបាន, រមាស់បរិភោគពុំកើតក៏មាន ។ វាជារុក្ខជាតិអាចដុះលូតលាស់បាននៅក្នុងទឹក ដូចជាស្រូវ ឬផ្កាឈូកដែរ ។ វាមានឈ្មោះជាភាសាអង់គ្លេសថា Taro ។ មើមត្រាវ អាចយកចម្អិនធ្វើជាម្ហូបអាហារផង ជាបង្អែមផង និងចៀនដូចជាចេកចៀន ដំឡូងចេកក៏មាន ។ ត្រាវជាដំណាំគួរ និងងាយដាំដុះណាស់ ។ ខាងក្រោមនេះ ជាវិធីសាស្ត្រដាំត្រាវងាយៗ….
១/. ការជ្រើសរើសពូជ
– ជ្រើសរើសយកមើមត្រាវ ណាដែលមានពូជធំល្អមកទុកសម្រាប់ដាំ។
២/. ការរៀបចំដី
-មុនពេលដាំយើងភ្ជួរ២ទៅ៣ដង ឲ្យម៉ដ្ឋល្អ ភ្ជួរលើកទី១ដើម្បីលប់កំចាត់ស្មៅហើយរយៈពេលប្រមាណ ៨ថ្ងៃទើបភ្ជួរម្តងទៀតហើយត្រូវរាស់ ដើម្បីលប់កំចាត់ស្មៅម្តងទៀត និងធ្វើឲ្យដីស្មើរ។
៣/. ការដាំដុះ
– ត្រូវធ្វើរងមានទទឹងប្រមាណ៥តឹក ចន្លោះពីគ្នាប្រមាណ ១,៥ម៉ែត្រ រួចឆូតចង្អូរកណ្តាលរងនោះដើម្បីដាក់ជី (ជីលាមកសត្វ ឬជីកំប៉ុស្ត) រួចលប់វិញ ឬក៏អាចកាប់ជារណ្តៅ ១,៥តឹក បួនជ្រុង គំលាតពីគ្នាប្រមាណ ៥តឹក។
– យកមើមត្រាវមកដាំនៅលើរងដែលបានរៀបចំរួចដោយមានសំណើមខ្ពស់។
៤/. ត្រូវដាក់ជីបន្ថែមរាល់ ១ខែម្តង អាចដាក់ជាមួយគ្នានៅពេលដែលយើងបញ្ចូលទឹកឲ្យវា (ជីអ៊ុយរ៉េ ឬជីលាមកសត្វបើមាន)។
៥/. ការថែទាំ
– ស្រោចទឹកនៅពេលដែលដីស្ងួត
– ជ្រុំគល់ និងដកស្មៅ
– ការពាររោគបំផ្លាញ។
៦/. ការប្រមូលផល
ក្រោយពីដាំបានរយៈពេល៤ទៅ៥ខែអាចប្រមូលផលបានហើយ ៕