ខេត្តកំពត ៖ បុរសជនជាតិចិនម្នាក់ក្នុងចំណោមបក្ខពួកមួយក្រុម ចូលទៅកម្សាន្តក្នុងហាងខារ៉ាអូខេ មួយកន្លែង គ្រាន់ដែលកំពុងអង្គុយផឹកស៊ីសប្បាយ បុរសជនជាតិចិនម្នាក់ បានសើយសំពត់នារីខារ៉ាអូខេម្នាក់ នារីរូបស្រស់ក៏បានរុញចិនរូបនេះចេញ ធ្វើអោយជនដៃដល់ខឹងសម្បារ បានទះកំផ្លៀងនាងមួយដៃ ថែមទៀត ។
ហេតុការណ៍បង្កហិង្សាខាងលើនេះ បានកើតឡើងកាលពីវេលាម៉ោងជិត១០យប់ថ្ងៃទី១៥ តុលា ២០១៩ នៅចំណុចហាងខារ៉ាអូខេយីហោ «នគរមាស» ស្ថិតក្នុងភូមិទ្វីខាងជើង សង្កាត់អណ្តូងខ្មែរ ក្រុងកំពត ខេត្តកំពត ។
ប្រភពឲ្យដឹងថា បុរសជនជាតិចិនមានឈ្មោះ វ៉ាង ជីនជិន អាយុ៤៣ឆ្នាំ មានមុខរបរជាងម៉ៅការក្រឡុកបេតុង កាន់លិខិតឆ្លងដែនលេខ… ស្នាក់នៅភូមិចំការចេក ឃុំពងទឹក ស្រុកដំណាក់ចង្អើរ ខេត្តកែប ។ ចំណែកជនរងគ្រោះមានឈ្មោះល.ដ ភេទស្រី អាយុប្រមាណជា២៨ឆ្នាំ មុខរបរជាអ្នកបម្រើការងារនៅក្នុងហាងខារ៉ាអូខេខាងលើ ស្នាក់នៅសង្កាត់អណ្តូងខ្មែរ ក្រុងកំពត ។
តាមប្រភពព័តមានពីកន្លែងកើតហេតុបានឲ្យដឹងជាបឋមថា មុនពេលកើតហេតុ ជនបង្កជាជនជាតិចិនមួយក្រុមមានគ្នាប្រមាណ៤នាក់ បានចូលទៅច្រៀងសប្បាយកម្សាន្តនៅក្នុងហាងខារ៉ាអូខេ«នគរមាស» ហើយក្រោយមកពេលកំពុងអង្គុយផឹកស៊ីសប្បាយ ជនដៃដល់ឃើញនារីរងគ្រោះដែលមកអង្គុយផឹកជាមួយជនជាតិចិនម្នាក់ទៀត ដែលជាមិត្តភក្តិរបស់ខ្លួន ស្រាប់តែជនសង្ស័យបានលូកលាន់ ចាប់សើយសំពត់នារីរងគ្រោះ ធ្វើអោយនាងខឹងក៏បានយកដៃរុញជនដៃដល់ចេញពីខ្លួន ពេលនោះធ្វើអោយជនបង្កជាបុរសចិននោះខឹងក៏ទះកំផ្លៀងនារីរងគ្រោះមួយដៃ បន្ទាប់មកសន្តិសុខដែលធ្វើការនៅទីនោះ បានចូលមកជួយឃាត់ ។
បើតាមប្រភពដដែលបានបន្តថា ក្រុមភ្ញៀវដែលមកច្រៀងកម្សាន្តខាងលើចូលមកច្រៀងដោយគ្មានសីលធម៌ក្នុងខ្លួននោះទេ ពេលខ្លះពួកគេយកដៃច្របាច់កំប៉ះគូទ និងលាត់សំពត់នារីទាំងអស់ដែលនៅក្នុងនោះថែមទៀតផង ។
ក្រោយពេលកើតហេតុជនបង្កត្រូវបានសមត្ថកិច្ចមូលដ្ឋាននាំខ្លួនបញ្ជូនទៅកាន់ប៉ុស្ដិ៍នគរបាលរដ្ឋាបាល ដើម្បីធ្វើការសាកសួរ និងចាត់ការតាមនីតិវិធី ៕