ក្រុងព្រះសីហនុ ៖ មានការភ្ញាក់ផ្អើលមួយ បន្ទាប់ពីប្រជាពលរដ្ឋប្រទះឃើញគ្រាប់បែកដៃ២គ្រាប់មិនដឹងថា នរណាយកទៅប្លុងចោលទេ ទុកចោលនៅលើធុងសំរាម នៅម្តុំទួលខ្សាច់ ក្នុងសង្កាត់លេខ៤ ក្រុងព្រះសីហនុ កាលពីរសៀលថ្ងៃទី១៤ ខែតុលាឆ្នាំ២០១៩នេះ ហើយពលរដ្ឋបានរាយការណ៍ដល់សមត្ថកិច្ចឲ្យទៅត្រួតពិនិត្យ ផងដែរ ។
ក្រោយពីទទួលបានព័ត៌មានភ្លាមៗ សមត្ថកិច្ចបានចុះទៅដល់គោលដៅ ធ្វើការពិនិត្យ ហើយឆែកឆេររកឃើញគ្រាប់បែកដៃទាំង២គ្រាប់ខាងលើ គឺជាគ្រាប់បែកជរ័ទេ នេះបើតាមការបញ្ជាក់ពីសមត្ថកិច្ចដែលបានចុះពិនិត្យនោះ ។
បើតាមមន្ត្រីនគរបាលប៉ុស្តិ៍រដ្ឋបាលសង្កាត់លេខ៤ បានអះអាងថា គ្រាប់បែកជរ័ទាំងនេះ មើលទៅដូចបេះបិទទៅនឹងគ្រាប់បែកមែនទែនអ៊ីចឹង ហើយលោកសន្និដ្ខានថា ទំនងជាមានក្មេងរើសលេងហើយចោលនៅទីនោះ ទើបប្រជាពលរដ្ឋប្រទះឃើញ បង្កជាការភ័យខ្លាច ហើយរាយការណ៍មកសមត្ថកិច្ច ឲ្យចុះពិនិត្យតែម្តង ។
បច្ចុប្បន្ននេះ គ្រាប់បែកជរ័នេះ ត្រូវបានសមត្ថកិច្ចយើង យកចេញហើយ៕
