ភ្នំពេញ ៖ យុវតីម្នាក់ជិះទូកលេងជាមួយយុវជន២នាក់ កម្សាន្តលេងយ៉ាងសប្បាយ ស្រាប់តែចៃដន្យលិចទូក លង់ទឹកស្លាប់ ខណៈយុវជន២នាក់ទៀត បានហែលរួច រត់ទៅប្រាប់គេឯង បង្កឲ្យមានការភ្ញាក់ផ្អើល នៅវេលាម៉ោង៤និង៤០នាទីល្ងាច ថ្ងៃអង្គារ ទី៨ ខែតុលា ឆ្នាំ២០១៩ ត្រង់ចំណុចក្នុងបឹងកន្លែងដាក់បែលត្រី ក្នុងភូមិតាគរ សង្កាត់ សំរោងកណ្តាល ខណ្ឌព្រែកព្នៅ ។
សពជនរងគ្រោះមានឈ្មោះ ពេជ្រ លាងហេង ភេទស្រី អាយុ១៧ឆ្នាំ ជនជាតិខ្មែរ មុខរបរនៅផ្ទះ មានទីលំនៅបច្ចុប្បន្ន ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ ។
ប្រភពពីកន្លែងកើតហេតុ បានឲ្យដឹងថា មុនពេលកើតហេតុ គេឃើញយុវតីរងគ្រោះជិះទូកលេងជាមួយយុវជន២នាក់ តាមទឹកបឹងខាងលើបានមួយសន្ទុះ ក៏ឃើញយុវជន២នាក់ ដែលជិះទូកជាមួយនាង បានហែលទឹកមកដល់គោកវិញ ហើយរត់មកប្រាប់ថាលិចទូក តែមិនឃើញនារីរងគ្រោះ ហែលមកវិញទេ ទើបបង្កការភ្ញាក់ផ្អើលដល់ប្រជាពលរដ្ឋ និង សមត្ថកិច្ចចុះមកជួយអន្តរាគមន៍ រាវរកយុវតីរងគ្រោះ រហូតដល់ម៉ោង៥ជាងល្ងាច ទើបឃើញសាកសពទាំងអាក្រាតកាយផ្នែកខាងក្រោម ។
ករណីនេះក្រុមគ្រួសារអះអាងថា នារីរងគ្រោះចេះហែលទឹក ហេតុអីក៏ត្រូវលង់ទឹក ហើយអក្រាតកាយទៀត ទើបស្នើសុំសមត្ថកិច្ចជួយពិនិត្យ ក្រែងករណីនេះជារឿងរំលោភសម្លាប់ តែដោយរង់ចាំសមត្ថកិច្ចជំនាញ យូរពេក មិនឃើញមក ក៏នាំគ្នាយកសាកសពនារីរងគ្រោះទៅមណ្ឌសុខភាពឬស្សីកែវ ដើម្បីឲ្យគ្រូពេទ្យពិនិត្យ និងធ្វើកោសល្យវិច័យរកការពិត។
ក្រោយមកខាងគ្រូពេទ្យបានបញ្ជាក់ប្រាប់ថា នារីរងគ្រោះពិតជាបាត់បង់ជីវិតដោយសារលង់ទឹកប្រាកដមែន ។ តែទោះជាយ៉ាងណា ខាងសមត្ថកិច្ចនៅតែបន្តស្រាវជ្រាវបន្ថែមទៀត ។ ចំណែក សាកសពត្រូវបានក្រុមគ្រួសារយកទៅតម្កល់នៅវត្តទួលអស់លោក ធ្វើបុណ្យតាមប្រពៃណីហើយ ៕
