អ៊ីរ៉ាក់ ៖ បាតុកម្មតវ៉ាដ៏ហិង្សា ប្រឆាំងរដ្ឋាភិបាលអ៊ីរ៉ាក់ អស់រយៈពេល៤ថ្ងៃមកនេះ ចំនួនបាតុករស្លាប់បានកើនដល់៦០នាក់ហើយ ខណៈ១១៨៨នាក់ទៀតរងរបួស និងរាប់សិបនាក់ត្រូវបានចាប់ខ្លួន។
នេះបើតាមការផ្សាយរបស់សារព័ត៌មាន BBC នៅថ្ងៃសៅរ៍ ទី០៥ ខែតុលា ឆ្នាំ២០១៩នេះ ។
បាតុកម្មតវ៉ាដ៏ហិង្សានេះ បានចាប់ផ្តើមផ្ទុះឡើងតាំងតែពីថ្ងៃអង្គារ មកម្លេះ ហើយកំពុងបន្តរីករាលដាលកាន់ខ្លាំង នៅក្នុងរដ្ឋធានីបាកដាដ ដើម្បីប្រឆាំងរដ្ឋាភិបាលរបស់នាយករដ្ឋមន្ត្រីអ៊ីរ៉ាក់ លោក អាឌែល អាប់ឌុល ម៉ាហ៍ឌី (Adel Abdul Mahdi)។ ជាមួយគ្នានេះ នៅតាមតំបន់ដទៃទៀតនៃប្រទេសអ៊ីរ៉ាក់ក៏មានសកម្មភាពតវ៉ាស្រដៀងគ្នា ដែរ។
ទោះបី អាជ្ញាធរអ៊ីរ៉ាក់បានដាក់ចេញបម្រាមគោចរ នៅទីក្រុងបាកដាដ ព្រមទាំងតំបន់មួយចំនួនទៀត ក៍ដោយ ក៍ការធ្វើបាតុកម្មនៅតែបន្ត។ មិនតែប៉ុណ្ណោះ អាជ្ញាធរអ៊ីរ៉ាក់ក៏បានបិទបណ្តាញអ៊ីនធឺណែត នៅទូទាំងរដ្ឋធានីបាកដាដ រួមជាមួយតំបន់មួយចំនួនទៀត ដែលស្ថិតនៅភាគកណ្តាល និងភាគខាងត្បូង ប្រទេសអ៊ីរ៉ាក់។ ជាមួយគ្នានេះការឆ្លងព្រំដែនជាប់ប្រទេសអ៊ីរ៉ង់ ក៏ត្រូវបានផ្អាកផងដែរ។
ក្រុមបាតុករទាំងនេះនាំគ្នាធ្វើបាតុកម្មតវ៉ា ដើម្បីទាមទារឲ្យរំលាយរដ្ឋាភិបាល និងសម្ដែងការខឹងសម្បារ ចំពោះអំពើពុករលួយ, វិបត្តិគ្មានការងារធ្វើ ព្រមទាំងទាមទារជីវិតរស់នៅតាមបែបស្ដង់ដារសមរម្យ៕
