ក្រៅពីមុខរបរធ្វើស្រែ ចំការកសិករភាគច្រើនបានចាប់យកការចិញ្ចឹមមេទាយកពង គឺជាមុខរបរមួយដែលអាចជួយលើកស្ទួយជីវភាព របស់កសិករបានមួយកម្រិត ពិសេសប្រសិនបើការចិញ្ចឹម មេទាយកពងមានបទពិសោធន៏ ឫគន្លឹះល្អណាមួយ នឹងជួយក្នុងការប្រមូលផលស៊ុតបានកាន់តែខ្ពស់ទៀតផង ។
គន្លឹះក្នុងការចិញ្ចឹមទាយកស៊ុត ទទួលបានផលខ្ពស់កសិករគប្បីអនុវត្តន៏តាមបទពិសោធន៏ដូចខាងក្រោម ៖
-អ្នកចិញ្ចឹមត្រូវជ្រើសរើសមេទាដែលមានសុខភាពល្អ នឹងមានអាយុចាប់ពី៥ខែឡើងទៅ ដែលមានទម្ងន់មិនលើសពី១,៥គីឡូក្រាម ។ ព្រោះបន្ទាប់ពីការចិញ្ចឹមបានប្រហែល២០ថ្ងៃ វានឹងចាប់ផ្តើមពង។
-ការផ្តល់ចំណីៈ ក្នុងមួយថ្ងៃយើងត្រូវដាក់ចំណីឲ្យវាស៊ីចំនួន២ដង ព្រឹកនិងល្ងាច ដោយកំណត់ទា មួយក្បាលត្រូវស៊ីអស់ត្រឹម១,៣ខាំ ។ ចំណីធម្មជាតិសម្រាប់មេទាមានដូចជា ស្រូវលាយជាមួយនឹងកន្ទក់ ក្បាលបង្គា សត្វខ្យង និងខ្ចៅជាដើម ។ យើងត្រូវបន្ថែមបន្លែបៃតង ឲ្យវាស៊ីដូចជាស្មៅខ្ចី ត្រកួន ស្ពៃជាដើម ដែលវាជួយផ្តល់វីតាមីនដល់ទារបស់យើង ។
-ត្រូវសម្អាតស្នូកសម្រាប់ដាក់ចំណីឲ្យទាស៊ីជាប្រចាំ នឹងដាក់ចំណីឲ្យបានច្រើនកន្លែង ដើម្បីជៀសវាង វាស៊ីចំណីមិនបានស្មើគ្នា ។ យើងត្រូវធ្វើទ្រុងឲ្យបានធំទូលាយ ខ្ពស់ស្រឡះ បើធ្វើដំបូលស័ង្កសី ត្រូវយកស្លឹកឈើ ឬស្លឹកដូងគ្របពីលើ នឹងដាក់ស្បៃពីក្រោមដំបូលដើម្បីកាត់បន្ថយកម្តៅ ។
-ក្នុងទា១០០០ក្បាល យើងត្រូវធ្វើរោងទទឹង១០ម៉ែត្រ បណ្តោយ២០ម៉ែត្រ ។ នៅពេលមេទាកំពុងផ្តល់ស៊ុត អ្នកចិញ្ចឹមត្រូវមានការប្រុងប្រយ័ត្នខ្ពស់ការពារកុំឲ្យវាផ្អើល ដែលបណ្តាលឲ្យវាឈប់បញ្ចេញស៊ុត ឬចំនួនស៊ុតធ្លាក់ចុះ ។ យើងត្រូវកំណត់ឲ្យទាលេងទឹកត្រឹម៥ម៉ោងក្នុងមួយថ្ងៃដោយដាក់ឲ្យវាលេង ចាប់ពីម៉ោង១០ព្រឹកទៅ ។
-ការចិញ្ចឹមបែបធម្មជាតិនេះ នឹងធ្វើឲ្យទាមានសុខភាពល្អ ស៊ុតក្រហមធំល្អស៊ុតមិនសូវមានក្លិនឆ្អាបវា ផ្តល់ស៊ុតបានច្រើនឯអ្នកបរិភោគក៏ទទួលបានអាហារដែលមានសុវត្ថិភាពផងដែរ។
-ប្រភពដដែលបានបញ្ជាក់ឲ្យដឹងថាបន្ទាប់ពីចិញ្ចឹមបាន៣ឆ្នាំយើងត្រូវលក់មេទាទាំងនោះចេញ ព្រោះវាចាស់ហើយការផ្តល់ស៊ុតក៏ធ្លាក់ចុះផងដែរ ។
-ចំពោះវិធីការពារជំងឺមេទានឹងការពុលលាមករបស់វា គឺត្រូវការពារកុំឲ្យរោងមានក្លិនមិនល្អដោយសារ លាមក របស់វាឬទឹកជាំយើងត្រូវក្រាលអង្កាមនៅក្រោមរោង ។ ការធ្វើដូចនេះ អាចជួយផ្តល់កម្តៅដល់ទា និងអាចយកអង្កាមនេះប្រើប្រាស់ជាជីបានទៀតផង៕