រាជធានីភ្នំពេញ ៖ លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា នៅថ្ងៃទី២៣ ខែកញ្ញា ឆ្នាំ២០១៩នេះ បានចេញសារស្វាគមន៍ចំពោះវត្តមាន នៃការអញ្ជើញមកដល់របស់លោក Patrick Murphy ឯកអគ្គរដ្ឋទូតថ្មី របស់ស្ថានទូតអាមេរិកប្រចាំកម្ពុជា ដែលបានបង្ហាញឲ្យឃើញនូវបំណងមេត្រីភាព និងសហប្រតិបត្តិការ រវាងប្រជាជាតិទាំងពីរ ។
បើតាមផេកហ្វេសប៊ុកលោក ផៃ ស៊ីផាន បានបញ្ជាក់ថា « រាជរដ្ឋាភិបាលនៅតែបង្ហាញជំហរយ៉ាងមុតមាំ ចំពោះកិច្ចសហប្រតិបត្តិការ និងទំនាក់ទំនងល្អរវាងកម្ពុជា-អាមេរិក។ កិច្ចសហការជិតស្និទ្ធ និងជាប្រវត្តិសាស្ត្ររបស់ប្រជាជាតិទាំងពីរនេះ នៅតែបង្ហាញភាពសកម្ម និងជិតស្និទ្ធជាច្រើនវិស័យ ដូចក្នុងវិស័យដោះមីន និងវិស័យអប់រំ កសិកម្ម បេតិកភ័ណ្ឌ និងរួមគ្នាប្រឆាំងអំពើភេរវកម្មជាដើម។
កម្ពុជាសូមស្វាគមន៍ចំពោះវត្តមាននៃការអញ្ជើមមកដល់របស់ឯកឧត្តមឯកអគ្គរដ្ឋទូត Patrick Muphy ជាតំណាងប្រជាជាតិអាមេរិកប្រចាំកម្ពុជា។ វត្តមាននេះ នៅតែបង្ហាញបំណងមេត្រីភាព និងសហប្រតិបត្តិការរវាងប្រជាជាតិទាំងពីរ ដោយឈរលើគោលការណ៍នៃការគោរពគ្នាទៅវិញទៅមក និងអធិបតេយ្យភាពជារួម។
ផ្លែផ្កានៃបេសកកម្មរបស់ឯកឧត្តមឯកអគ្គរដ្ឋទូតសហរដ្ឋអាមេរិកថ្មីនេះ គឺជាបំណងដ៏ឧត្តុង្គឧត្តមរបស់ប្រជាពលរដ្ឋកម្ពុជា ក៏ដូចជារាជរដ្ឋាភិបាលក្នុងដំណើរការនៃកិច្ចសហប្រតិបត្តិការ និងទំនាក់ទំនងល្អរវាងប្រជាជាតិទាំងពីរ។ ផលប្រយោជន៍ និងទស្សនៈយល់ឃើញរបស់អ្នកសិក្សាស្រាវជ្រាវ ដែលបានលើកឡើងនៅសន្និសីទសារព័ត៌មាននោះ គឺគ្រាន់តែជាសិទ្ធិនៃការបញ្ចេញយោបល់ មិនមែនជាជំហររបស់រាជរដ្ឋាភិបាលឡើយ ។
អង្គភាពអ្នកនាំពាក្យ សូមស្វាគមន៍ និងប្រសិទ្ធិពរជ័យជូនឯកឧត្តមអគ្គរដ្ឋទូតសហរដ្ឋអាមេរិក ក្នុងបេសកកម្មការទូតនៅកម្ពុជា» ។
សូមជម្រាបថា លោកឯកអគ្គរដ្ឋទូតថ្មី Patrick Murphy និងភរិយារបស់ខ្លួន បានមកដល់ប្រទេសកម្ពុជា កាលពីយប់ថ្ងៃទី១៨ ខែកញ្ញា ឆ្នាំ២០១៩ ដើម្បីផ្តើមការងាររបស់ខ្លួននៅកម្ពុជា ជំនួសឯកអគ្គរដ្ឋទូតអាមេរិកប្រចាំនៅកម្ពុជាផុតអាណត្តិ លោក William A. Heidt ។
បើតាមផេកហ្វេសប៊ុករបស់ស្ថានទូតសហរដ្ឋអាមេរិកនៅភ្នំពេញ បានអោយដឹងថា «នៅព្រឹកមួយ នៃព្រឹកដំបូងរបស់លោក នៅកម្ពុជា លោកឯកអគ្គរដ្ឋទូត Murphy និងបុគ្គលិកស្ថានទូត បានទៅវត្តគល់ទទឹង សម្រាប់ពិធីបុណ្យភ្ជុំបិណ្ឌ និងដើម្បីគោរពដល់ដូនតា បុព្វការីជនទាំងអស់ ។ លោកឯកអគ្គរដ្ឋទូត មានកិត្តិយសយ៉ាងធំធេង ដោយបានជួបព្រះតេជគុណ គូ សុភាព ហើយបានទទួលពរពីលោកសម្រាប់ឆ្នាំខាងមុខ » ៕