រាជធានីភ្នំពេញ ៖ ឯកឧត្តម ទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយ ACU កាលពីថ្ងៃទី០៩ ខែកញ្ញា ឆ្នាំ២០១៩កន្លងទៅ បានចេញលិខិតស្នើសុំឲ្យលោកឧត្តមសេនីយ៍ទោ(ផ្កាយ២) យឹម ឡាលី ប្រធានក្រុមចម្រុះអធិការកិច្ចហត្ថពលកម្មបរទេស នៅខេត្តព្រះសីហនុ ចូលបំភ្លឺពាក់ព័ន្ធករណីយកលុយលើសពីច្បាប់កំណត់ចំនួន១១,១៩៥ដុល្លារ ពីក្រុមហ៊ុនកាស៊ីណូ ស៊ឹង ឈឹង កាលពីថ្ងៃទី១២ ខែសីហា ឆ្នាំ២០១៩ ទោះជាយ៉ាងណាចំនួនលើសនេះ លោកផ្កាយ២ បានបដិសេធថា មិនបានធ្វើអ្វីខុសនឹងច្បាប់ទេ ។
បើតាមលិខិតរបស់ ACU បានបញ្ជាក់ថា ការស្នើសុំការបំភ្លឺពីលោកឧត្តមសេនីយ៍ទោ យឹម ឡាលី ប្រធានក្រុមចម្រុះអធិការកិច្ចហត្ថពលកម្មបរទេសនៅខេត្តព្រះសីហនុ នេះធ្វើឡើងបន្ទាប់ពី អង្គភាពប្រឆាំងអំពើពុករលួយ បានទទួលពាក្យបណ្តឹងកាលពីថ្ងៃទី ២៩ ខែសីហា ឆ្នាំ២០១៩ និងបានប្រជុំពិនិត្យកាលពីថ្ងៃទី៣០ ខែសីហា ឆ្នាំ២០១៩កន្លងទៅ ។
អង្គហេតុនៃការប្តឹងនៅក្នុងលិខិតកាលពីថ្ងៃទី១២ ខែសីហា ឆ្នាំ២០១៩ លោកឧត្តមសេនីយ៍ទោ យឹម ឡាលី ប្រធានក្រុមចម្រុះអធិការកិច្ចហត្ថពលកម្មបរទេសនៅខេត្តព្រះសីហនុ បានដឹកនាំកម្លាំងចុះទៅពិនិត្យនៅទីតាំង ក្រុមហ៊ុន កាស៊ីណូ ស៊ឹង ឈឹង ស្ថិតនៅសង្កាត់១ ក្រុងព្រះសីហនុ ខេត្តព្រះសីហនុ ។
នៅពេលចុះទៅពិនិត្យ សត្ថកិច្ចរកឃើញជនបរទេសគ្មានប័ណ្ណការងារចំនួន ៥៧នាក់ និងមានការផាកពិន័យចំនួន ៣ចំណុច សរុប ជាទឹកប្រាក់ ៨,៨០៥ដុល្លារ ប៉ុន្តែលោកឧត្តមសេនីយ៍ទោ យឹម ឡាលី ប្រធានក្រុមចម្រុះអធិការកិច្ចហត្ថពលកម្មបរទេសនៅខេត្តព្រះសីហនុ បានទទួលប្រាក់ ចំនួន ២០,០០០ដុល្លារ ពីក្រុមហ៊ុន កាស៊ីណូ ស៊ឹង ឈឹង ដែលលើសពីច្បាប់បានចំណត់រហូតទៅដល់ ១១,១៩៥ដុល្លារ ។
ពាក់ព័ន្ធ ករណីនេះ លោកឧត្តមសេនីយ៍ទោ យឹម ឡាលី ប្រធានក្រុមចម្រុះអធិការកិច្ចហត្ថពលកម្មបរទេសនៅខេត្តព្រះសីហនុ កាលពីថ្ងៃទី១៣ ខែសីហា ឆ្នាំ២០១៩ ធ្លាប់បានចេញលិខិតជម្រាបជូន ឯកឧត្តម នាយឧត្តមសេនីយ៍ អគ្គនាយក នៃអគ្គនាយកដ្ឋានអន្តោប្រវេសន៍ ថា ក្រុមការងាររបស់លោកពិតជាទទួលបានលុយចំនួន២ម៉ឺនដុល្លារ ពីក្រុមហ៊ុន កាស៊ីណូ ស៊ឹង ឈឹង ប្រាកដមែន ។
លោកឧត្តមសេនីយ៍ទោ យឹម ឡាលី ទទួលស្គាល់ថា លុយចំនួន ១១,១៩៥ ដុល្លារដែលលោកយកពីក្រុមហ៊ុន កាស៊ីណូ ស៊ឹង ឈឹង នោះគឺជាលុយលើសពីច្បាប់កំណត់មែន ប៉ុន្តែលុយនេះ គឺខាងក្រុមហ៊ុន កាស៊ីណូ ឲ្យក្រុមការងាររបស់លោកសម្រាប់ដោះស្រាយលើការចំណាយផ្សេងៗ ។
លោកអះអាងថា ការទទួលទឹកប្រាក់ទាំង២ម៉ឺនដុល្លារនោះ គឺធ្វើឡើងនៅចំពោះក្រុមការងារទាំងអស់ ហើយក្រុមការងារ គឺបានឯកភាពទទួលយកទាំងអស់គ្នា នេះបើតាមលោកផ្កាយ២ យឹម ឡាលី ថ្លែងប្រាប់អ្នកសារព័ត៌មានកាលពីថ្ងៃទី២២ កញ្ញា ម្សិលមិញនេះ ។
ឧត្តមសេនីយ៍ទោ យឹម ឡាលី បន្ថែមថា ទោះជាយ៉ាងណាលោកមិនបានធ្វើអ្វីខុសនឹងនីតិវិធីឡើយ ហើយនឹងចូលទៅបំភ្លឺជូនអង្គភាពប្រឆាំងអំពើពុករលួយក្នុងសប្ដាហ៍នេះ ប៉ុន្តែមិនទាន់បានកំណត់ពេលជាក់លាក់នៅឡើយទេ ។ ដោយលោកបញ្ជាក់យ៉ាងដូច្នេះថា «ខ្ញុំមិនទាន់ដឹងថ្ងៃណាទេ ប៉ុន្តែខ្ញុំនឹងចូលទៅបំភ្លឺក្នុងសប្ដាហ៍ក្រោយ នៅពេលដែលរៀបចំឯកសារហើយ» ៕
