សៀមរាប ៖ រថយន្តក្រុងរបស់ក្រុមហ៊ុនបូព៌ាអាស៊ីមួយគ្រឿង ត្រូវសមត្ថកិច្ចកងរាជអាវុធហត្ថខេត្តកំពង់ធំ ឃាត់ក្នុងករណីដឹកជញ្ជូនសត្វព្រៃខុសច្បាប់ ។
រថយន្តដឹកសត្វព្រៃទម្ងន់២៣២គីឡូក្រាមនេះ ចេញពីខេត្តសៀមរាប ហើយចាប់បាននៅភូមិស្លាកក្រាញ់ ឃុំសំព្រោជ ស្រុកស្ទោង ខេត្តកំពង់ធំ នៅថ្ងៃទី២២ ខែកញ្ញា ឆ្នាំ២០១៩ ។
សមត្ថកិច្ចបានឃាត់ខ្លួនជនសង្ស័យម្នាក់ឈ្មោះ ងន វុនរ៉ា ភេទប្រុស អាយុ២៧ឆ្នាំ រស់នៅភូមិប្រម៉ោយ ឃុំប្រម៉ោយ ស្រុកវាលវែង ខេត្តពោធិសាត់ ជាអ្នកបើកបររថយន្ដក្រុង ពាក់ស្លាកលេខ ភ្នំពេញ ៣D-២៤១៧ ជារបស់ក្រុមហ៊ុនបូព៌ាអាស៊ី ដឹកអ្នកដំណើរ ។
បើតាមសមត្ថកិច្ចកងរាជអាវុធហត្ថខេត្តបានឱ្យដឹងថា កិច្ចប្រតិបត្តិការនេះដោយមានការសម្របសម្រួលពីលោកអ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ និងដឹកនាំកម្លាំងផ្ទាល់ដោយលោកវរសេនីយ៍ទោ ឃុន ប៊ុនហូ មេបញ្ជាការរងកងរាជអាវុធហត្ថខេត្ត ។
សមត្ថកិច្ចចាប់យកវត្ថុតាងមានដូចជា សត្វអណ្តើកសកលចំនួន២៨ក្បាល ស្មើនឹង១៧៩ គីឡូក្រាម, សត្វពស់ចាន់ល្មម ចំនួន៨២ក្បាល ស្មើនឹង៤៥គីឡូក្រាម និងសត្វទន្សងចំនួន៤ក្បាល ស្មើនឹង៨គីឡូក្រាម ។
ក្រោយធ្វើកំណត់ហេតុរួច វត្ថុតាងសត្វព្រៃត្រូវបានសមត្ថកិច្ចប្រគល់ទៅឱ្យនាយសង្កាត់រដ្ឋបាលព្រៃឈើស្ទោង ចំណែកវត្ថុតាងរួមមានរថយន្តនិងអ្នកបើកបរ កសាងសុំណុំរឿងបញ្ជូនទៅតុលាការ ៕
