រាជធានីភ្នំពេញ ៖ ក្នុងពេលដែលប្រជាពលរដ្ឋកម្ពុជា កំពុងប្រារព្ធពិធីបុណ្យកាន់បិណ្ឌ ដែលជាពិធីព្រះពុទ្ធសាសនាដ៏សំខាន់មួយ បែរជា នៅថ្ងៃកាន់បិណ្ឌទី៦នេះ មានអ្នកភូមិម្នាក់ បានប្រគេនស្រាបៀរកំប៉ុងដល់ព្រះសង្ឃទៅវិញ ដោយគាត់យល់ខុសថា ការប្រគេនគ្រឿងស្រវឹងដល់បុព្វជិតនេះ នឹងអាចបញ្ជូនកុសល្យផលបុណ្យដល់បុព្វការីជន ជីដូនជីតា ឫសាច់ញាតិរបស់ផងខ្លួន ដែលបានទទួលមរណភាពនោះហើយមើលទៅ ។
បើតាមគណនីហ្វេសប៊ុកមួយព្រះនាម «ជ័យ ភានិត» ទំនងជាព្រះសង្ឃមួយអង្គ គង់នៅវត្តមួយ ក្នុងខេត្តកំពង់ចាម បានបង្ហោះសំណេរនៅម៉ោង៧ព្រឹកថ្ងៃទី១៩ កញ្ញា ២០១៩នេះ ថា «ញោមរដូវបុណ្យទាន គាត់យកស្រាបៀរមកប្រគេនព្រះសង្ឃ ដើម្បីឧទ្ទិសមគ្គផល ទៅឲ្យប្តីដែលស្លាប់ គាត់គិតថា មានតែធ្វើបុណ្យជាមួយព្រះសង្ឃទេ ទើបស្រាបៀរនេះ បានដល់ប្តីគាត់ ញោមៗលេងសើចជាមួយអាត្មាទេដឹង ? ឲ្យគ្រឿងស្រវឹង មិនបានបុណ្យទេញោម» ។
«ព្រះសម្មាសម្ពុទ្ធទ្រង់ហាមអ្នកបួស មិនឲ្យសេពគ្រឿងស្រវឹងទេ ព្រោះគ្រឿងស្រវឹងបំផ្លាញនូវអាយុជីវិតខ្លួនឯង ការសេពគ្រឿងស្រវឹងធ្វើឲ្យវិនាសខ្លួនឯង ។ ពីព្រោះសុរានេះកាលណាចូល គឺវង្វេងស្មារតីទាំងអស់ មិនធ្លាប់ហ៊ាន បែរទៅជាហ៊ាន ហ៊ានទាំងសម្លាប់ ហ៊ានទាំងលួចប្រពន្ធកូនគេ ហ៊ានទាំងលួចទ្រព្យ ហ៊ានទាំងពោលពាក្យមិនប្រាកដ សុរានេះនឹងនាំឲ្យវង្វេង ។ ពុទ្ធអង្គទ្រង់ត្រាស់ហាម គឺនៅក្នុងសិក្ខាបទសុរា គឺភក្ខុផឹកទឹកស្រវឹងត្រូវអាបត្តិ ឬត្រូវទោស» ។
ចំពោះបព្វជិតអ្នកបួសក្នុងពុទ្ធសាសនា ដែលសេពគ្រឿងស្រវឹង ឬសុរា ជារឿងប្រាសចាកពីសាសនាព្រះពុទ្ធដែលបានប្រតិបត្តិនោះហើយ ព្រោះសុរាជាសិក្ខាបទទី៥ ក្នុងចំណោមសីលទាំង៥ ។ និច្ចសីល ឬសីល៥មាន ៖ ១-បាណាតិបាតា, ទី២-អទិន្នាទានា, ទី៣-កាមេសុមិច្ឆាចារា, ទី៤- មុសាវាទា, និងទី៥-សុរាមេរយមជ្ជប្បមាទដ្ឋានា ។
ដោយឡែក សៀវភៅ “ទានកថា” ដែលជាការផ្សាយរបស់វិទ្យាស្ថានពុទ្ធសាសនបណ្ឌិត្យ មានសរសេរអធិប្បាយទាក់ទងនឹងទាន៥ប្រការ ដែលបុគ្គលធ្វើហើយមិនបានផលជាបុណ្យ ជាកុសលអ្វីឡើយ ។ វត្ថុជាទានទាំង៥យ៉ាងនោះ រួមមាន ៖ ទី១ ការឱ្យស្ត្រីដល់បុរស ឬការឱ្យបុរសដល់ស្ត្រី ទី២ ការឱ្យគោឧសភ គឺគោបា ឬគោឈ្មោលដល់មេគោ ឬការឱ្យមេគោដល់គោឧសភ ទី៣ ការឱ្យទឹកស្រវឹង ជាទាន ទី៤ ការឱ្យទានជាការរាំច្រៀង ឬរបាំត្លុកកំប្លែង និងទី៥ ការឱ្យទានជារូបគំនូរស្ត្រី និងបុរស ដែលជារូបនាំឱ្យកើតសេចក្ដីត្រេកត្រអាលទៅរកសេចក្ដីប្រាថ្នាក្នុងផ្លូវកាម ។ ក្នុងពុទ្ធសាសនាបណ្ដាទានទាំង៥ប្រការនេះ ហៅថា “អសម្មតទាន” គឺទានដែលមិនសន្មត ឬចាត់ចូលជាទានឡើយ ៕