រាជធានីភ្នំពេញ ៖ កម្លាំងសមត្ថកិច្ច បានឃាត់ខ្លួនជនសង្ស័យឈ្មោះ ឡុ ង វុទ្ធី ជាថៅកែក្រុមហ៊ុនពុះដីឡូត៍ម្នាក់ ក្នុងគម្រោងអិវឌ្ឍន៍ ឡុង វុទ្ធី ពាក់ព័ន្ធ ករណីឈូសឆាយកាប់រានទន្ទ្រានយកដីរដ្ឋ ដែលជាតំបន់ការពាររបស់ក្រសួងបរិស្ថាន នៅក្នុងភូមិភ្នំដំបង ឃុំសន្តិភាព ស្រុកសំឡូត ខេត្តបាត់ដំបងយកទៅពុះឡូត៍លក់ដោយខុសច្បាប់ ។
ការឃាត់ខ្លួនជនសង្ស័យឈ្មោះ ឡុង វុទ្ធី បានធ្វើឡើងកាលពីថ្ងៃទី១៧ ខែកញ្ញា ឆ្នាំ២០១៩ ដោយកម្លាំងគណៈបញ្ជាការឯកភាពខេត្តបាត់តំបង សហការជាមួយក្រុមការងាររបស់ គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ។
បើតាមសេចក្ដីប្រកាសព័ត៌មាន នៃក្រសួងបរិស្ថាន ចុះថ្ងៃទី១៧ ខែកញ្ញា បានឲ្យដឹងថា យោងតាមច្បាប់ស្ដីពីតំបន់ការពារធម្មជាតិ គឺដីតំបន់ការពារធម្មជាតិជាដីសាធារណៈរបស់រដ្ឋ មិនអនុញ្ញាតឲ្យកាប់ទន្ទ្រានកាន់កាប់លក់ដូរបានឡើយ និងមិនអាចស្ថិតនៅក្រោមការកាន់កាប់ ដោយលទ្ធកម្មពិសេសនៃភោគៈឡើយ ។ ការចាត់ចែងលក់ដូរដីសាធារណៈ របស់រដ្ឋ គឺជាបទល្មើសព្រហ្មទណ្ឌ ដោយអ្នកប្រព្រឹត្ត និងអ្នកជាប់ពាក់ព័ន្ធ ត្រូវផ្តន្ទា ទោសជាប់ពន្ធនាគារ និងត្រូវបានចាត់ចូលជាឧក្រិដ្ឋកម្ម ដូចមានចែងក្នុងច្បាប់ស្តីពីការប្រឆាំងសម្អាតប្រាក់ និងហិរញ្ញប្បទានភេរវកម្ម ។
ជុំវិញបញ្ហាខាងលើនេះ ប្រជាពលរដ្ឋបានលើកឡើងថា ការដែលឈ្មួញឈ្មោះ ឡុង វុទ្ធី ហ៊ានធ្វើសកម្មភាពទន្ទ្រានកាន់កាប់ដីព្រៃ តំបន់ការពារធម្មជាតិទំហំ ៤៩,៦០០ម៉ែត្រការ៉េ យកទៅរៀបចំបោះបង្គោល បំបែកក្បាលដីជាឡូត៍ៗរួចទៅហើយនោះ គឺអាចមានការឃុបឃិតជាប្រព័ន្ធ ព្រោះថាបើគ្មានការឃុបឃិតជាប្រព័ន្ធបើកដៃពីមន្ត្រីទេនោះ គឺមេឈ្មួញ ឡុង វុទ្ធី មិនអាចធ្វើអ្វីៗស្រេចតែអំពើចិត្តរបស់ខ្លួនប្រព្រឹត្តទៅដោយរលូនបានឡើយ ៕